fbpx

यलया पट्को दबलीइ ४० दँ लिपा थेच्वया गथु प्याखं

रेखा शाक्य

यल । काैलाथ्व पंचमी

४० दँ लिपा यलया पट्कोया दबली थेच्वया गथु प्याखं हुइकीगु जूगुु दु ।  थी थी हुनिं दिपा कयाच्वंगु थुगु प्याखंयात हाकनं कथंह हंकेया नितिं गथु प्याखंया गुथियार, पट्को त्वाः सुधार समिति व यल महानगरपालिका वडा नं १६ ज्याकूया पुचःलं आः वइगु कौलाथ्व दशमी (आश्विन २१ गते) कुन्हु बहनी प्याखं हुइकेगुया व्यवस्था जुइकथं निर्णय याःगु दु ।

थौं सम्बन्धित पुचः दथुइ जूगु  सहलह कथं वडां माःगु सकतां पुजाया हलंज्वलं, बलिया व्यवस्था याइगु जूगु दुःसा मेगु दँनिसें प्याखं हुइकेत माःगु सकतां ध्यबाया व्यवस्था महानगरपालिकां दरबन्दी कथं हे तयेगु निर्णय तकं याःगु दु ।

लिच्छवीकालीन राजा मानदेवया आराध्यदेव कथं मनमानेश्वरीदेवी व मल्लकालीन तलेजु भवानीनाप स्वापू दूगु थेच्वःया गथु प्याखं यल लाय्कूनाप स्वापू दूगू सकतां प्याखं मध्येय् नं पुलांगु प्याखं कथं गथु प्याखंयातं कायेगु या ।

थेच्वया गथु प्याखं मोहनी व यःमह्रि पुन्हि बलय् विशेष खःसां थेच्वय् बैशाख शुक्ल तृतीया, अक्षय तृतीया , श्रावणय् कृष्णपक्ष त्रयोदशी,भाद्र कृष्णपक्ष त्रयोदशीया दिनसया यायेमाःगु चलन दु । दँय्दसं थेच्वया गथु देवगणपिं मोहनीया सिन्ह फयेत यल मंगःया लाय्कू हयेमाःगु चलन दूगु खः ।

न्हापा मोहनीया दशमी व कतिंपुन्हिबलय् यल लाय्कूया मू चुकय् प्यन्हु तक प्याखं हुइकेमाःगु परम्परा दूगु खः । वंगु निदँ न्ह्यः २०७४ सालया आश्विनं थ्यंमथ्यं २४ दँ लिपा दिपा कयाच्वंगु थुगु प्याखं गथु प्याखंया गुथियार, यल लाय्कूया मूछेँ, यल सांस्कृतिक पर्व संरक्षण समिति व नेवाः पत्रकार राष्ट्रिय दबू यलया कुतलय् हाकनं यलय् हयेगु ज्या जूगु खः ।

उगु इलय् याकनं थुगु प्याखंयात यल पट्कोया दबली हयेगु जुइ धकाः वडा नायः निर्मल रत्न शाक्यं थुम्ह पंक्तिकारयात जानकारी ब्यूगु खः ।

मोहनीया तिथि दशमी कुन्हु मंगःया प्यकालंय् गथु प्याखंया मू द्यः व मनमानेशवरीया लसकुस व स्वां देछासें  थवंथवय् भागी यायेगु चलन दु । अथेहे गथुप्याखंया भैरव, काली व बाराहीं मनमानेश्वरीयात प्याखं हुला हे स्वां द्यःछायगु याइ । (व हे स्वांमायात बुंगया नाइकेपिन्सं बुंगया ह्यग्रीव भैरवया तःजिक जात्रा न्ह्याकेगु चलन तकं दु ।) अनंलिपा गथु देवगणपिं सकलें लाय्कूया मू चुकय् दुहाँ बिज्याइ । प्याखं हुइ । अन नं लिपा मंगःया लिक्क लाःगु पट्कोया दबलीइ प्याखं हुइगु चलन दुगु खः ।

Leave a Reply

Your email address will not be published. Required fields are marked *