fbpx

यःमह्री पुन्हिया झालय् हे १६ क्वःगु राष्ट्रिय ज्यापु दिवस हन- करीब ३० म्ह सम्मानित (१८ पाः किपाः)

 

रेखा शाक्य । झीगु सम्वाददाता

येँ । थिंलाथ्व पुन्हि

सकल नेवाःतय्गु मौलिक नखःकथं थौं देय् न्यंक यःमह्री पुन्हि नखः झःझः धायेक हंगु दु । थ्वहे यःमह्री पुन्हिया झालय् हे “१६ क्वःगु राष्ट्रिय ज्यापु दिवस समारोह समिति – ११४०” परम्परागत गोफःत्वाः माकगल्ली ज्यापू समाजया संयोजकत्वय् “झी ज्यापू, झी नेवाः झी नेपाःमि” नारा तयाः ज्यापू दिवस हंगु खः ।

नेपाः थी थी जातजाति, भाषाभाषी, धर्म व तजिलजिया मंकाः देश खः । हलिमय् थःगुु मौलिक कला, संस्कृति रहनसहन, नखःचखःया लिसें थी थी प्राकृतिक सम्पदा व ऐतिहासिक महत्वं जाःगु अनेक थाय्या कारणं थःगुु बिस्कं म्हसिका ब्वयेत ताः लागु स्वतन्त्र देय् कथं नेपाःया नां जाः ।
थ्व हे थी थी कला व संस्कृतिया छगू अभिन्न अगंकथं कयातःगु ज्यापु समुदायया गौरव कथं ज्यापू संस्कृति विकास कोष २०५८ नी स्वने धुंकाः सांस्कृतिक अधिकारया नितिं सांस्कृतिक पुचःत जागरुक जुइ धुंकाःया अवस्थाय् वि.सं २०६१ सालंनिसें हे जीवन्त कला संस्कृतिया संरक्षण व सम्बद्र्धनया तातुना ज्वनाः सांस्कृतिक अभियानया रुपय् सकल नेवाःतय्गु मौलिक नखः यःमह्री पुन्हिया दिनस ज्यापू दिवस हनेगु चलन न्ह्याकूगु खः ।

थौं सुथय् लगं गोफःत्वाःया माकः गल्लीं करिब ११ बजेति ज्याझ्वःया उलेज्या यासें ज्यापू दिवसया लसताय् न्ह्याःगु र्यालीं ब्रम्हत्वाः, ओन्दे, ह्युमत, कोहिती, भिंद्यःत्वाः, मरु, यतखा, न्यत, त्यंगःत्वाः, वास्याःद्यः, असं, भोताहिति रत्नपार्क, महाँकाल, न्हूसतक जुयाः जुद्ध शालिक जुयाः बसन्तपुरया दबलीइ समापनया नितिं मूंगु खः ।

This slideshow requires JavaScript.

उगुु र्यालीया नितिं ६३ त्वाः, यल, ख्वपया लिसें स्वनिगः पिनेया मकवानपुरया टिष्टुंगया सांस्कृतिक बाजागाजा सहित नेवाः समुदाय् पिन्सं ब्वति काःगु खः । र्याली बसन्तपुर दबलीइ थ्यंका समापनया ज्याझ्वः न्ह्याःगुु खः ।

ज्यापू दिवसयात सम्बोधन यायेत मूपाहाँ प्रधानमन्त्री के पी शर्मा ओलीया आमन्त्रण यानातःगुु खःसां वय्कःया उसाँय् सुथांमलाःगु हुुनिं उपप्रधानमन्त्री तथा रक्षामन्त्री ईश्वर पोखरेलजुं प्रधानमन्त्रीया प्रतिनिधित्व याःसें बसन्पुरया दबलीइ जुयाच्वंगुु समारोहयात सम्बोधन यानादीगु खः । उगु हे समारोहस प्रदेश नं ३या सामाजिक विकास मन्त्री युवराज दुलाल, येँ महानगरपालिकाया मेयर विद्या सुन्दर शाक्य लगायत अन्य सम्मानित व्यक्तित्वपिन्सं यःमह्री पुन्हि व ज्यापू दिवस व नेपाःया मौलिक संस्कृतिं नेपाःयात हलिमय् म्हसिकूगु खः धैगु खँया चर्चा यानादिल ।

उगु हे ज्याझ्वलय् ज्यापू प्रतिभा सम्मान व पुरस्कार सिफारिस समिति –  २०७६ पाखें सिफारिस जूूपिं थी थी व्यक्तित्वःपिन्त सम्मानित यायेगु झ्वलय् “बाल प्रतिभा” गुन्जना डंगोल, “युवा प्रतिभा” जुजुकाजी महर्जन, सुनिता महर्जन, उज्वल डंगोल, नरेश प्रजापति,लक्ष्मण मान डंगोल, रत्नकाजी महर्जन, मनिका डंगोल यात लल्हाःगु खः । अथेहे “ज्यापू महिला सशक्तीकरण सम्मान” सरिता महर्जन, “ज्यापू सरस्वती पदक” सुर्वण केशरी महर्जन, “ज्यापू उद्यमी पदक” कृष्णलाल महर्जन, “श्री चक्रमान डंगोल समाजसेवा पुरस्कार” बाबुकृष्ण महर्जन, “ज्यापू रत्न “डा. मृगेन्द्रलाल सिंह, “ज्यापू प्रज्ञा” हरिराम जोशी, “ज्यापू विशिष्ट सम्मान” कृष्णगोपाल श्रेष्ठ, “ज्यापू विशेष सम्मान” देव नेवार, एस पी प्रधान, सोमबहादुर श्रेष्ठ, डा. हिरामन प्रधान, जितेन्द्रलाल श्रेष्ठ रसिक, रत्नकेशरी प्रजापति, सुरेन्द्र महर्जन अमर, रत्नकाजी महर्जन व सांस्कृतिक गुरु भाइराजा महर्जन यात लःल्हागु खः ।

अथेहे “संस्थागत विशेष सम्मान” कथं धमाथू पुलांगु बाँसुरी पुचः, गःछेँ दापा खलः किपू, किपुल्चा दापा खलः, किपुल्चा, धाः बाजं खलः थसि व श्री सिद्धी गणेद्यः दापा खलः झ्वापुननि नगदेशयात लःल्हागु खः ।

नापनापं ज्यापू दिवस मूल समारोह समितिया संयोजकत्वया जिम्मेवारी सफलतापूर्वक निर्वाह यागु पुचःया लिसें ज्यापू दिवसनाप प्रत्यक्ष स्वानाच्वंगु थी थी त्वाःयात व वंगु दँया समारोह समितिया संयोजक तीर्थ नारायण महर्जनयात नं कदर पत्र देछागु खः ।

Leave a Reply

Your email address will not be published. Required fields are marked *