fbpx

म्हः पूजाया मन्द च्वयेगु धेंधेंबल्ला कासा -काठमाडौं नेवाः किन्डरगार्टेनय्

रेखा शाक्य

येँ । काैलागाः द्वादशी ।

काठमाडौं नेवाः किन्डरगार्टेन खुसिबुँ येँया ब्वनेकुथिइ म्हः पूजाया मन्द च्वयेगु धेंधेंबल्ला कासा जुल । थ्व कासा यू के जी तगिमय् ब्वनादिइपिं मस्तय् दथुइ मखसें मचया मां अबुपिं दथुइ जूगु खः ।

मुक्कं १९ मां अबुया दथुइ जूगु उगुु कासाय् खः । मन्द च्वयेत माःगु सकतां हलंज्वलं ब्वनेकुथिं हे बन्दोबस्त यानाः ३० गू मिनेटया ई ब्यूगु खः ।

This slideshow requires JavaScript.

मन्द च्वज्याया निरिक्षण व निर्णायक भूमिका इमेज च्यानलया संचारकःमि विराजकाजी राजोपाध्यायं यानादीगु खः । । वय्कलं मन्द च्वयेगु ज्या छेँ व जातजाति कथं अले थःथःगु दर्शन कथं च्वयेगु याइगु खःसां मन्दलय् तयेगु हलंज्वलं नं दर्शनयात बांलाक ब्वयेगु नियम कथं च्वःगुयात हे दकलय् बांलाःगु मन्द कथं ल्ययाःगु धकाः धाःगु दु । वय्कलं निर्णय बिइ न्ह्यः झीगु नेवाः समाजया स्वन्तिया बारे व म्हपूजाया लिसें मन्दलय् च्वयेगु व हलंज्वलं ब्वयेगु पहःयात अर्थ सहित ध्वाथुइका बियादीगु खः ।

मन्द च्वज्या क्वचायेके धुंकाः उगु हे मन्दलय् ब्वति कयाःदिपिं मां अबुया मस्तय्त अन हे फ्यतुकाः विधिवत रुपं मू पाहाँ मय्जु नेपालभाषा संकिपाया नकिं हिसिला महर्जनजुं मस्तय्त म्हः पूजा नं याकादीगु खः ।

महर्जन मय्जुं मस्तय् पुचलय् च्वना मस्तय्त म्हः पुजा याका बलय् ब्वनेकुथिइ मखु थःगु हे छेँय् म्हः पुजा याना थें ताःगु धाःसें थःम्ह नं म्हः पुजाया मन्दया बारे आपालं खँ थुइकागु धयादिल ।

ब्वनेकुथिया डाइरेक्टर भाजु राजेन्द्र महर्जनजुं विगत ७/ ८ वर्ष न्ह्यःनिसें थःगु ब्वनेकुथिइ स्वन्तिया अवसरय् म्हपुजा याका वयाच्वनागु खःसां वंगु ४/५ दँ न्ह्यःनिसें जक थुकथं मन्द च्वज्या कासा याना वयाच्वनागु धयादिल ।

मस्तय्त मात्र ब्वनेकुथि सफूया ज्ञान जक मखसें व्यवहारिक शिक्षा नं बिया यंकल धाःसा जक झीगु रितिथिति संस्कार व तजिलजिया ज्याखँ पुस्तान्तरण याना यंके फइ । थज्यागु कासां मां अबुं मस्तलिसे थथे व्यवहारिक खँ न्यनेकने यानाः हे शिक्षा काइगु धाःसें मस्त व मांअबुया दथुइ सहजीकरण भुमिका नं म्हितेमाःगु थौंकन्हेया माग खः धाःसें थौं कन्हे छेँय् छेँय् म्हपुजा यायेगु व नखःचखः हनेगुलिइ म्हो जुया वंगु ईयात हाकनं थातं तयेफइगु वय्कःया विश्वास खः थ्व हे आजु ज्वना थज्यागु ज्याखँ याना वयाच्वनागु धकाः झीगु डटकमया थुम्ह पंक्तिकारयात कनादिल ।

थौंया म्हः पुजा मन्द च्वयेगुलिइ तामा‌ंग जाति व बुढाथाेकि जातिया मा‌ं अबुं न‌ं ब्वति काःगु व थ्जायगु ज्याखँ मात्र नेवाःतय् दथुइ जक मखु अन्य जाति (ब्वनेकुथिइ ब्वनाच्वंपिं मेमेगु जाति) नाप नं संस्कृतिया आदानप्रदान यायेगु बांलागु लँपु खः जुइगु गुह्य खँ कनादिल ।

ज्याझ्वःया लिपांगु इलय् न्हाप लाम्ह सलिना डंगोलयात मतिना चिं लः ल्हाःगु खःसा जा मनः गुभाजु संकिपाया निर्माता भाजु रवि साय्मिजुं जा मनः गुभाजु च्वया तःगु टिर्शट नं देछागु खः । अथेहे जज भाजु राजोपाध्याय व मू पाहाँ कथं झाम्ह महर्जन मय्जुयात नं सम्मान पत्र व मतिना चिं राजेन्द्रजुं लःल्हानादीगु खः ।

Leave a Reply

Your email address will not be published. Required fields are marked *