fbpx

“म्युजियम” चीहाः संकिपाः – निर्देशक रजिन महर्जनलिसेया खँल्हाबल्हा

स्वकःगु चीहाः संकिपाः धेंधेंबल्लाकासाय् न्हापांगु खुसिइ थःगु उपस्थिति बियादीम्ह युवा निर्देशक खः किपूया रजिन महर्जन । वय्कलं निर्देशन यानादीगु चीहाः संकिपा “म्युजियम” ल्यूया सिरपाः त्याकेत ता लाःगु दु ।

वय्कः ता ई न्ह्यःनिसें प्राविधिक क्षेत्रय् थःत पानाच्वना दीम्ह खः । न्यूज २४, हिमालय टिभि, माउण्टेन टिभि, लगायत टिभि च्यानलय् एडिटर व ग्राफिक्स डिजाइनर या रुपं ज्याःयाना वयाच्वंगु दु । अथे हे वंगु ८ दँ न्ह्यःनिसें लाजिम्पाटय् च्वंगु मिटिङ्ग प्वाइन्ट संस्था नापं आबद्ध जुया बिज्ञापन, टेलिभिजन कार्यक्रम, डकुमेन्टरी, पि.एस.ए, शर्ट एनिमेसन भिडियोत दयेकाः थःगु क्षमता न्ह्यब्वया च्वनादिम्ह खः । लिसें AP1 Television पाखें प्रशारण जुयावयाच्वंगु CMC Career Quiz कार्यक्रमया निर्माता व निर्देशक नं वय्कः हे खः ।

वय्कलं यानादिगु ज्याया बेलिबिस्तार सिइकेगु खःसा आःतक्क ५०० स्वयां अप्वः तःधंगु व चिधंगु बिज्ञापनय् एडिटिङ्ग व ग्राफिक्स, २०० स्वयां अप्वः एपिसोड CMC Career Quiz कार्यक्रमया निर्देशन, ५० गूलिं मल्याक डकुमेन्टरी व प्रोफाइल, १७गू बिज्ञापन व पि.एस.ए. या निर्देशन, २ गू रिकोगनाइज्ड चीहाः संकिपाय् निर्देशक कथं ज्या यानादी धुंकूगु दु । वय्कःया ज्यां हे नं वय्कः छम्ह व्यावसायिक ख्यलय् प्रविधियात छ्यलाः थःगु शीप कौशलता न्ह्यब्वयेत सफलम्ह युवा कथं झीसँ थुइके फु ।

वय्कलं न्हापांगु खुसिइ नेपालभाषाया ख्यलय् थःगु कलाकारिता क्यनेगुया ह्वता चूलाकादीगु दु । अथे जुया वय्कःनाप संकिपाः व चीहाः संकिपाया बारे व “म्युजियम” चीहाः संकिपाःयात कयाः यानागु खँल्हाबल्हा थन न्यनागु न्ह्यसःया लिसः वःगु कथं हे ब्वयाच्वना ।
    -रेखा शाक्य

संकिपा व चीहाः संकिपा धइगु छु ?

छुं नं बाखं दुने दइगु बाखं, फिलिंग्स, चरित्र, विचार व ब्यूटियात मोसन पिक्चर्स वा संकिपाया रुपयात संकिपा धाइ, हलिमय् न्हापांगु Existing Motion Picture  कथं सन् १८८८, फ्रेन्च खोजकर्ता लुइस ले प्रिन्सं मोसन पिक्चर्स क्यामरा छ्यला राउण्डहे गार्डेन सिन नां या संकिपा दय्कूगु खः ।

अननिसें थौं तक थ्यंबलय् ह्यूमन साइकोलोजि नापनापं थी थी प्रविधित छ्यला यक्व हे संकिपा दयेधुंकल । लिपा सन् १९२० दशकनिसें १९७० दशक तक संयुक्त राज्य अमेरिकाय् चीहाः बाखंया लिधंसाय् निगू वा निगू सिबें म्हो जुइक ३५ एम एमया रिलय् दुथ्याका दय्केगु संकिपायात चीहाः संकिपा धायेगु यात । व इलय् फिचर फिल्म दयेकेबलय् स्वंगू निसें प्यंगू तक ३५ एम एमया रिल मालिगु जुगुलिं मेगुयात शर्ट अथवा चीहाः धाइगु जुल ।

चीहाः संकिपाया दयेके अपु ला ?

नेपालय् नं चीहाः संकिपात देय्केगु यानाहःगु दु । थुकिइ फिल्म मेकर्स नापनापं स्वकुमिपिं पाखें नं उलिहे चासो क्यना हःगु आःया अवस्था खः । थौं वयाः गुलिं फिल्म मेकर्सतय् फिचर फिल्म दय्के सिबें अपुइगु जुगुलिं चीहाः संकिपाः दय्केगु धइगु याना हयाच्वंगु दु । गुगु गलत बिचार खः ।

वास्तवय् खँ अपू व थाकू वा ध्यबा अप्वः मालिगु वा म्होया खँ मखु । चाहे ताहाकःगु संकिपाः च्वये बलय् जुइमाः वा चीहाः नितां ज्या उलि हे संयमता धैर्यता व कलाकौशलताया लिसें कल्पनाशक्ति नं दयेमाः । अझ धात्थें धायेगु खःसा चीहाः संकिपातय् बाखनय् दइगु फुक्क खँ ध्वाथुइक छुं मिनेटया दुने हे दुथ्याकेमाः ।

दुथ्याकेगु जक मखु उलि खँ संकिपातं धायेत्यंगु खँ वा सन्देश न्हाय्कं थें यच्चुक स्वकुमियात क्यने फय्केमाः । उकिं चीहाः संकिपाः दय्केत यक्व हे क्षमता माः । संकिपातय् छगू फ्रेमय् दुथ्याकातःगु रंग, अथेहे कलाकारया वसः, क्यामराया एंगल, मूभमेन्ट, लाइटिंग व साउण्डया नं फरक फरक विशेषता व अर्थ त दयाच्वनी ।

संकिपाः धायेवं माःगु सिबें अप्वः डाइलग वा खँल्हाबल्हा नं दुथ्याके मज्यू । संकिपाः दय्के बलय् थें थ्व चीहाः संकिपाः देय्केबलय् नं उकिया छुं छुं नियमत दु । एकेडेमी अफ मोसन पिक्चर आर्टस् एण्ड साइन्सेस्या धापू कथं चीहाः संकिपाः फुक्कं क्रेडिट्स नापं दुथ्याकाः मात्र ४० मिनेट वा व सिबें चीहाः जुइमाः ।

चीहाः संकिपाः दय्केबलय् गुलि फु उलि हे स्क्रिप्ट चीहाकः जुइमाः । फिल्म गुलि ताः हाकः जुइ उलि हे खर्च नं अप्वःया वनि । तर खर्च म्हचाय्के धकाः हानं लुक्स म्ह जुइके नं मज्यू । फिल्म फेस्टिभलय् ब्वति कायेत चीहाः संकिपा दय्केबलय् झिगु मिनेट सिबें अप्वः मजूसा बांलाइ छाय्धाःसां फिल्म फेस्टिभलय् संकिपाः क्यनेबलय् यक्वः ताः हाकः जुल धाःसा स्वकुमिया ध्यान मेथाय् वनिगु भय जुइफु । दिक्क चाय्फु ।

चीहाः संकिपाःया स्क्रिप्ट च्वयेबलय् लिपा शुट यायेबलय् गुलि प्राय्क्टिकल जुइ धइगु खँ नं बिचाः यायेमाः । बाखनय् दूगु हिसाबं हे स्क्रिप्ट च्वयाः लिपा व हे कथं शुट याये मफत कि फिल्म गतिमलायेफू वा धाये दिशाहीन जुइफु । संकिपातय् बाखं न्यनेगु कथं मखु मिखां खनिगु कथं भिजुयल हे क्यनेमाः । छाय्कि संकिपाः धइगु हे भिजुयल मेडियम खः । थ्व गोल्डेन रुल अफ फिल्म धकाः यक्व हे स्यनामिपिन्सं धायेगु यानावयाच्वंगु दु । संकिपातय् बाखनं छु धायेत्यंगु खः व हे क्यनेमाः ।

म्वाः मदुगु आइडिया त छ्यल धाःसा उकें बाखंयात अर्थहीन व दिशाहीन यानाबिइफु । गुकिया लिच्वः लिपा लिपा हानं स्वकुमिपिं हलय् तक मथ्यनेफु ।  भावनात्मक स्वापू धयागु हे संकिपाया मु विषय व सन्देश खः । दय्किपिन्सं स्वइपिनिगु भावनायात थुइकाः इमित emotionally engage याये फूसा वः संकिपा चाहे ताःहाकः जुइब्यू चाहे चिहाकः उकिं स्वकुमिया नुगः त्याका हे काइ ।

This slideshow requires JavaScript.

चीहाः संकिपाः दयेकिपिन्सं छु खँय् ध्यान तयेमाः ?

मूख्य ला थःम्ह दय्के त्यनागु विषयबस्तु छु खः व ध्वाथुइमाल । अले उकियात माःगु हरेक ज्याखँया होमवर्क यायेमाः । कलाकार, स्पट, भेषभुषा, लाइटिंगया लिसें माःगु सकतां । तर दकलय् मू खं धइगु यक्व फिल्म मेकर्सपिन्सं संकिपाः दय्केबलय् छगू हे कथंया बाखं व छगू हे कथंया प्रस्तुतियात लिसा कायेयः । थथे याये मज्यू । हरेक चीहाः संकिपातं ब्यागलं सन्देशया लिसें फरक प्रस्तुति क्यनेगु स्वयेमाः । उकिं बाखं ल्ययेबलय् व उकिया स्क्रिप्ट च्वयेबलय् stereotype शैली मजुइकेत यक्व हे बिचाः यायेमाः । अथे जुल धाःसा जक चिहाः संकिपा पृथक व रोचक जुइ फइ ।

म्यूजियम चीहाः संकिपाः दयेकाबलय्या अनुभव

स्वक्वःगु चीहाः संकिपाः धेंधेंबल्लाकासाय् जिगु न्हापांगु ब्वति खः । अथेला जि थी थी मिडियाय् व्यावसायिक रुपं एड मेकिंग लागाय् ज्या याना च्वनाम्ह हे जुल । उकिं जिके भचा अनुभव ला दूगु हे जुल । व हे अनुभव व चीहाः संकिपाया नियमयात छथासं तयाः थःगु हे निर्देशनय् चिहाः संकिपाः म्युजियम दयेका । थ्व संकिपाया बाखं किपूया नांजाम्ह कलाकार नापं कथाकार लक्ष्मी कुमार महर्जनजु खः ।

वय्कःया हे बाखंया लिधंसायात कयाः बाखंयात चीहाः संकिपाःया रुप बिइगु ज्या जिं याना । थः छम्ह ब्यावसायिक मिडिया ब्यक्तित्व जूगुलिं जिगु ख्यःया पासापिनिगु गुहालि कयाः म्यूजियम चिहाः संकिपाः दय्का । संकिपाःया ई मुक्कं ६ मिनेट १६ सेकेण्ड दु । जिं थःगु अनुभव व बाखंया सारयात न्ह्यब्वयेगु कुतलय् थःके दूगु ज्ञान, शीप व कौशलता ब्वयेगु कुतः यानाः न्हूगु कथं बाखं न्ह्यब्वयेगु कुतः यानागु दु ।

संकिपाःया नां हे म्युजियम जूगु हुनिं थुकिया शुटिंग हे म्युजियम दुने यायेमाःगु सत्यता खत । तर म्युजियमय् हे शुटिंग याके बिइ वा मबिइ थ्व खँय् नं जिपिं अलमल । उकिं पासापिं नापं सहलह ब्याकाः छगू स्टुडियोस म्युजियम पहः वःगु हे सेट डिजाइन यायेगु अले अन हे शुटिंग यायेगु । तर धाये जकं अपू तर ज्यायात रुप बिइगु ला अपूगु खँ मखुत । प्रोडक्सनया पासापिन्सं थथे यायेबलय् म्युजियमयात माःगु सकतां हलंज्वलंयात न्ह्यब्वयेगु अपु मजू धइगु सल्लाह बिल । अनलिपा स्वयम्भुया नेशनल हिस्ट्री म्युजियमय् यायेगु क्वःछिना । अन खँ ल्हाना । लिच्वः सकरात्मक वयेवं जिमिगु पुचःयात छगू उर्जा व उत्साहया लकस दत ।

पासापिनिगु गुहाली गुकथं दत ?

बाखनय् मूर्ति दूगु नं क्यने माःगु जुयाः उकियात Vfx Animation प्रविधि छ्यला क्यना । थः नं छम्ह प्रविधिक ख्यलय् हे ज्या यानाच्वनाम्ह जुया थ्व ज्या यायेत पासापिन्सं नं गुहाली यात । सिनेमाटोग्राफरया भाला रोशन श्रेष्ठ, मेकअपय् सोफिला कार्की, प्रोडक्सन म्यानेजमेन्ट पवन प्याकुरेल, एडी विक्रम महर्जन, 3d modeling रमेश मान श्रेष्ठ कलर करेक्शन सजिव रत्न शाक्यं यानादिल ।

थुगसिइ धेंधें बल्लाकासाय् ब्वति काःगु १६ संकिपाः स्वयेधुंकाःया छिगु अनुभव व मगामचागु छुं

वंगु नेपालभाषा टाइम्स चीहाः संकिपाः धेंधेंबल्ला कासाय् म्युजियम नापं १६ गू संकिपातं ब्वति काःगु खः । उकिइ मध्ये स्वंगू प्यंगु संकिपात बांलाक्क हे दयेका तःगु थें जितः ताल । अथेहे मेमेगु संकिपाः धाःसा पुलांगु हे शैलीं दयेका तःगु थें जिं खना । गुगुं संकिपातय् डाइलग त नं यक्वः हे जूगु अनुभव याना । स्क्रिनिंगया झ्वलय् यक्वः हे स्वकुमिपिन्सं अन क्यंगु संकिपात माःगु सिबें ताःहाकः जुल धकाः छ्याता ब्यूगु नं दु ।

समग्ररुपं धायेबलय् झीसँ नेपालभाषाया चीहाः संकिपाः दयेकीपिं फिल्म मेकर्स पासापिन्सं अझ हे थुकिइ यक्व हे मेहेनत याये मानिगु जिं तायेका । चीहाः संकिपाः धइगु फयांफत्तले चीहाकः जुइमाःगुलिइ अझ म्ये नं दुथ्याकेगु प्रथा वःगु दु । गुगु यात जिं उलि अपुक कायेमफयाच्वन । खय्तला म्ये यागु नं थःगु हे महत्व दु मदुगु मखु तर चीहाः संकिपाया नर्म्स स्वयेगु खःसा म्ये मतः सां जिउला धैथें ता ।

अन्तय् थुलि हे धाये मास्ति वः न्ह्यागु हे जुसां नेपालभाषा ख्यलय् नं चीहाः संकिपाःया धेंधेंबल्ला कासा जुयाच्वन थ्व सकरात्मक पक्ष खः । उकिं ग्वसाः खलःयात नं सुभाय् बी हे माः । लिसें लिपा हाकनं थज्यागु हे धेंधेंबल्लाकासां पुलांपिन्त नं लँपु क्यनीगु ला द हे दु नापं न्हूपिं फिल्म मेकर्सपिन्त नं यक्वः थुइका वयेगुलिइ लँपु क्यना बिइगु भलसा कया । लिसें चीहाः संकिपाः दय्केबलय् विषयबस्तु, उद्देश्य व संन्देशला माःगु हे जुल व नाप नापं बाखनं क्यनेत माःगु स्क्रिप्टया लिसें सकतां ज्याया अभ्यास बांलक याना वःसा चीहाः संकिपाया भविष्य नं उज्जवल हे जुइ ।

 

Leave a Reply

Your email address will not be published. Required fields are marked *