fbpx

 महानगरपालिका दुनेया ९१ सामूदायिक ब्वनेकुथिइ छगू हे कथंया रंगरोगन याइगु – मेयर शाक्य

झीगु सम्वाददाता

येँ । गुँलाथ्वः चतुर्दशी

‘येँ महानगरपालिका लागा दुने ब्वनेकुथिया शैक्षिक गुणस्तर जक मखु भौतिक संरचनाय् नं फयांफत्तले एक रुपता हयेगु नितिं थःगु क्षेत्र दुनेया दक्वं सामूदायिक ब्वनेकुथिइ एक रुपता हयेत छगू हे कथंया रंगरोगन यायेगु योजना हयागु धाःगु दु । थुकिया दक्वं खर्च महानगरपालिकां हे याइगु जुइ । ‘ सामूदायिक ब्वनेकुथिया रंगरोगन यायेगु, म्हितेगुथाय दयेकेगु, ब्वनेकुथिइ वृक्षारोपन यायेगु, पायखाना व त्वनेगु लःया व्यवस्था यायेगुया नापं झिगू शिर्षकया नितिं १० करोड बजेट तयागु दु ।

येँ महानगरपालिका दुने पदस्थापन जूगु माध्यामिक विद्यालय स्थायी शिक्षकया सपथ ग्रहण ज्याझ्वलय् नवायेगु झ्वलय् मेयर विद्यासुन्दर शाक्यं थुगु खँ धयादीगु खः । मेयर शाक्यं धयादिल , ‘उकिया नितिं महानगरपालिका लागा दुनेया ९१ गू सामूदायिक ब्वनेकुथिइ छगू हे रंग तयेगु तयारी यानागु दु ।’

अथेहे निजी ब्वनेकुथियात ब्वविइगु मखसें सामूदायिक ब्वनेकुथिया गुणस्तर सुधार यानाः ब्वनामिपिन्त सामूदायिक पाखें आकर्षित यायेमाः । थथे यात धाःसा जक निजी ब्वनेकुथिइ ब्वं वनिपिं स्वतः म्हो जुइ । आःया पुस्ता सूचना, प्रविधि, योजना व न्हू न्हूगु ज्ञानय् दखल दुपिं धाःसें पुलांपिनिगु अनुवभयात इना कयाः सहकार्य यानाः न्ह्याः वनेफत धाःसा सामूदायिक ब्वनेकुथिया गुणस्तर स्वतः अप्वःया वनिगु दावी नं वय्कलं यानादिल ।

३० म्ह शिक्षकयात सपथ ग्रहणया झ्वलय् मेयरं धयादिल – ‘छिकपिं प्रति जिमिगु तःधंगु विश्वास दु,’ । ‘सामूदायिक विद्यालयलस राज्यया लगानी यक्व दु । तर, लिच्वः बांलाःगु वयाच्वंगु मदु । उकिं छिकपिन्के दूगु व्यवस्थापकीय क्षमता यात न्ह्यब्वयादिसँ । वइगु दँय् एसइइया लिच्वः बांलागु वलधाःसा व हे छिकपिनिगु व्यवस्थापकीयया मूल्याङ्कन जुइ ।’

अझं नं झी निजी ब्वनेकुथियात ब्वबिया च्वनेगु तर सामूदायिक ब्वनेकुथिया शैक्षिक गुणस्तरय् सुधार यायेगु पाखे पलाः मन्ह्याकेगु धइगु हे मु समस्या खः । उकिं सुधार गथे याना यायेज्यू उकिइ विशेष ध्यान बिइमाल । छम्ह ब्वंकिम्ह गुरु बांलाःसा वं अनेक भविष्यया कर्णधारपिं राष्ट्रया नितिं दयेके फइगु व गुरु हे कमोजर जुल धाःसा राष्ट्रया भविष्य नं ख्यूँसे च्वनिगु लिसें ‘शिक्षण पेशा धइगु दक्वं समाजयात प्रभाव याइगु लागा खः,’ धयादिल ।

उगु हे ज्याझ्वलय् नुगः खँ तसें येँ महानगरपालिकाया निमित्त शिक्षा अधिकारी तारापती खरेलं सपथ ग्रहण याकेगु झ्वलय् शिक्षाया गुणस्तर सुधार यायेगुलिइ सकसितं ध्यान बिइत इनाप यानादिल ।

अथेहे शिक्षा विभागया अधिकृत मोती भट्टराईं पदस्थापन जूपिं स्यनामिपिन्त महानगरपालिका दुनेया समग्र शैक्षिक गुणस्तरयात बांलाकेत व बांलागु लिच्वः पितहयेत बांलागु भूमिका म्हिता थःगु कर्तब्य पूवंकेत बः बियादिल । नापनापं ‘सरकारी ब्वनेकुथिइ आः नं स्यनामिपिं न्हियान्हिथं मवनेगु, ब्वंकेगुलिइ जाँगर मक्यनेगु, शैक्षिक सामग्री मज्वंसे वनेगु परम्परा दु’, आः अज्यागु बेवास्तापन मयाःसे सामुदायिक ब्वनेकुथिया गुणस्तर थकायेत बिशेष पहल यायेगुलिइ ध्यान बिइमाल धयादिल ।

Leave a Reply

Your email address will not be published. Required fields are marked *