fbpx

महाकवि सिद्धिदास महाजुया बुदिंया लसताय् छन्द कविता धेंधेंबल्लाकासा

येँ ञला गाः अष्टमी

मस्तय्गु निंतिं नेपालभाषाया गतिविधि न्ह्यब्वयेगु ताःतुनां निस्वंगु नेवाःक्यब संस्थापाखें महाकवि सिद्धिदास महाजुया १५२ क्वःगु बुदिंया लसताय् स्कुल स्तरीय छन्द कविता वाचन जगत सुन्दर ब्वनेकुथिइ वंगु आइतबाः क्वचाल ।

मुक्कं ११ गू माध्यामिक स्कूलया ब्वति दूगु उगु कासय् हिमालय मा.बिया शिवानी श्रेष्ठ न्हाप, जनप्रभात मा.बिया रेश्मा मगर खड्गी ल्यू व मंगल मा.बिया सुजना महर्जन लियां ल्यू लाःगु खः ।

किपा गुहाली दर्शन शाक्य

थीथी स्कुलया ब्वनामिपिन्सं लय्बद्ध यानाः महाकवि सिद्धिदास महाजु, दुर्गालाल श्रेष्ठ, भूषणप्रसाद श्रेष्ठ लगायतया च्वमिपिनिगु कविता छन्दबद्ध रुपं पाठ याःगु खः । थुगु ज्याझ्वःया छवाः न्ह्यो छन्द विषय साहित्यकार भूषण प्रसाद श्रेष्ठं स्कूलया विद्यार्थिपिंत छन्द वाचन प्रशिक्षण बियादीगु खः ।

नेवाःक्यबया नाय दर्शनवीर शाक्यया सभापतित्वय् न्ह्याःगु उगु ज्याझ्वलय् सल्लाहाकारपिं नरेशवीर शाक्य, दीपक तुलाधर व राजेन्द्र महर्जनया नं उपस्थीतिदुगु खः ।

ज्याझ्वलय् नेवाःक्यबया न्वकु सुनिता मानन्धरं लसकुस यानादीगु खःसा ल्यू छ्याँजे मय्जु सुमित्रा महर्जनं परमानन्द वज्राचार्यं च्वयादीगु सिद्धिदास महाजुया नसंचा म्ये हालाः न्यंकादीगु खः । ज्याझ्वः संस्थाया सचिव रमिता शाक्यं न्ह्याकादीगु खः ।
कासाय् ब्वतिकाःपिं सकसितं हे म्हतिं नगद सिरपा व न्हाप ल्यू व लियांल्यु लाःपिन्त मेडल लःल्हाःगु खः ।

बुखँ व किपा श्राेत दर्शन शाक्य

Leave a Reply

Your email address will not be published. Required fields are marked *