fbpx

मंगल मोहनया “मेरो जीवन – चित्र” सार्वजनिक

रेखा शाक्य । झीगु संवाददाता
येँ, बछलागा त्रयाेदशी

“छपू सूपःया ला बाखं दइ धाःसा मनूया बाखं मदइगु जुइ हे मखु । मनू जन्म जूसां निसें वर्तमान अवस्था तकया खँयात जब च्वयेगु ज्या जुइ व छगू कथं जीवन्त बाखं जुयाः सफूया रुपय् झीगु न्ह्यःने वइ । अज्यागु हे छगू जीवन्त सफूया रुप खः ” मेरो जीवन – चित्र” ।”

किपा रेखा शाक्य

थौंया ज्याझ्वःया मू पाहाँ शताब्दी पुरुष संस्कृतविद् सत्यमोहन जोशीजुं थ्व धापू थौं वरिष्ठ फोटोग्राफर मंगल मोहन श्रेष्ठया “मेरो जीवन – चित्र” नांया सफू उलेज्या याये धुंकाः नुगः खँ तयेगु झ्वलय् धयादीगु खः ।

किपा रेखा शाक्य

२०१८ सालय् सरकारी ज्याये पलाः तयेधुंकाः थः बाज्यां न्ह्याकावयाच्वंगु पुर्ख्याेली ज्यायात हे बाज्याया इच्छा कथं न्ह्याकाः यंकागु धकाः च्वमि श्रेष्ठं कनादिल ।    लिसें थः न्हापांनिसें साहित्य लेखनय् नुगः क्वसाःगु खःसां माक्व ई बिइ मफया साहित्ययात निरन्तरता बिइमफुगु खँ लुमंकादिल ।

साहित्यया धारय् थःत चुइके मफुसां जीवनय् थःम्ह म्वायेगु झ्वलय् व जागिरया सिलसिलाय् गुलि नं ज्याखँ त वा घटनात जुइ उकियात धाःसा टिपोटया रुपं डायरीया पानाय् जायेका च्वनागु व उकिया हे मूर्त रुप कथं थ्व सफूया जन्म जूगु सत्य खँ कनादिल ।

नुगः खँ तयेगु झ्वलय् वय्कलं नेपाली संकिपाया न्हापांम्ह नकिं भुवन चन्दयात नकिंया अवस्थाय् तक थ्यंकेत तःधंगु भुमिका म्हितागुया लिसें शिव शंकर श्रेष्ठयात नायः जुइत ल्वम्ह खः धकाः हःपाः बिया संकिपा क्षेत्रय् हयेत उत्साहित यानागु खँ थःत अझं नं न्हाय् धस्वाकेत त्वहः चूलागु खँ लुमंकादील ।

सफूया प्रकाशकया रुपय् च्वमिया तिरी मैंया श्रेष्ठ खः । मुक्कं ६४ अध्यायया रुपय् थः पुर्खानिसें थःम्ह यानागु संघर्षया व दिं अले आः तकया सम्मान ग्रहणया सकतां खँ सफुतिइ दुथ्याका तःगु दु ।  सफूया अंक १ निसें १७८ पेज तक हरेक अध्याययात छगू छगू नां बिया उकिया बारे कनेगु ज्या जुयाच्वंगु थुगु सफुतिइ गथेयाना थः दरबारया फोटोग्राफरया रुपं ज्या याना धकाः कनातःगु दु ।

अथेहे नेपाःया जुजुपिं लिसे जक मखु विदेशी तःधंपिं पाहांपिं नापया अनुभव व अनुभुतियात थुगु सफुतिइ नुगः चकंकाः वर्णन यानादीगु दु । अनलिपा १७८ पेज निसें २१८ पेज तक च्वमिं फोटोग्राफी यानादीगु ऐतिहासिक पलयात फोटोया माध्यमं लुमंकेगु ज्या जूगु दु । गुगु थ्व सफूया मू आकर्षणया रुपय् खंकेफइ ।

किपा रेखा शाक्य

सकसियां नुगः खँ तयेसिबें न्ह्यः विधिवत रुपं मू पाहां शताब्दी पुरुष जोशी पाखें त्वा देवाय् सुकुण्डाय् मत च्याकेगु ज्या जूगु खःसा मगंल मोहनजुं वंगु प्यन्हु न्ह्यः नवमी कुन्हु सच्छिदँ बुन्हि हना दीगु लसताय् खादा व ढाका तपुतिं पुइकाः जोशीयात सम्मान नं यानादीगुु खः ।

किपा रेखा शाक्य

थौंया ज्याझ्वलय् सभानाय लिसें एकेडेमीया उपकुलपति, नकिं भुवन चन्द व फोटोग्राफर कविन्द्रमान शाक्यजुया लिसें अन्य पाहाँपिन्सं सफूया   व च्वमिया व्यक्तित्वया  बारे कनेगुया नापनापं  भिंतुना देछाय्गु ज्या जूगु खः ।

किपा रेखा शाक्य
किपा रेखा शाक्य

Leave a Reply

Your email address will not be published. Required fields are marked *