fbpx

बुद्ध विहारया पुनःनिर्माण क्वचायेकेत १ करोड तका

झीगु संवाददाता येँ, गुंलागाः दुतिया ।

काठमाडौं महानगरपालिकां बागबजार भृकुटीमण्डपय् दूगु थेरवादी बौद्ध भिक्षुपिनिगु आश्रय एवं धर्मअभ्यास यायेगु थाय् बुद्ध विहारया पुनःनिर्माण क्वचायेकेत १ करोड तका दां अनुदान बिउगु दु ।

विहार पुनःनिर्माण ज्या जुयाच्वंगुलिइ क्वचायेके मफइगु अवस्था वःगुलिं महानगरपालिकां व ध्यबा बिउगु धाःगु दु । शनिबार सुथय् जूगु छगू ज्याझ्वलय् महानगरपालिकाया प्रमुख विद्यासुन्दर शाक्यं विहार पुनःनिर्माण समितिया कजि भिक्षु कौण्डन्य व कोषाध्यक्ष सुरेश महर्जनयात उगु चेक लःल्हानादिइगु खः ।

ज्याझ्वलय् नवासें स्वनिगः न्हापानिसें बुद्धधर्मया केन्द्र जुयाच्वंथाय् थौंकन्हय् तःगु मछि थेरवाद विहार बनेजुयाच्वंगु धइगु लसताया खँ खः धासें अज्याःगु विहारया निर्माण जुइबलय् एकरुपता वयेमाःगु व उकिइ मौलिकता दयेमाःगु खँय् नं जोड बियादिल ।

अथे हे वय्कलं आः महानगरपालिका क्षेत्र दुने लाःगु जीर्ण, क्षतिग्रस्त सतः, बहाःबही, विहार, महाविहार, क्वापाद्यः, गुथिछेँ, आँगः छे“ आदि पुनःनिर्माण यायेत महानगरपालिका न्ह्याबलें ग्वाहालि याइगु बचं नं बियादिल । पुनःनिर्माण समितिया कजि भिक्षु कौण्डन्य महास्थविरं महानगरपालिकाया थज्याःगु पुण्यया ज्यां नेपाःया हे बौद्धममार्गीत लय्ताइगु खँ कँसें थज्याःगु ज्यां बुद्ध धर्मया विकास व विस्तार यायेत नं ग्वहालि जुइगु खँ कनाबिज्यात ।

अथे हे उगु ज्याझ्वलय् उपस्थित जुयादिइपिं काठमाडौं क्षेत्र नं ६ या सांसद् एवं पूर्वमन्त्री भिमसेनदास प्रधान, प्रदेश सभा सदस्य जीवन डंगोलं नं थम्हं विहारया पुनःनिर्माण क्वमचाःतले थम्हं माःगु ज्याय् ग्वाहालि यायेगु खँ धयादिल । वंगु तःभुखाचं स्यंगु उगु विहार पुनः निर्माण यायेत करिब ४ करोड तका ध्यबा तुइगु अनुमान यानातःगु धकाः समितिया उपाध्यक्ष मोतिलाल शिल्पकारं कनादिल । वय्कलं आः पुनःनिर्माण जूगु भवनय् ३००म्ह मनूत नापं च्वनाः ध्यान, प्रार्थना यायेजिइगु व पिने जिल्लां वःपिं बौद्ध अभियन्तातय्त च्वनेगु थाय् तकं दइगु खँ नं वय्कलं धयादिइगु दु ।

ज्याझ्वलय् संघीय सांसद्, प्रदेश सांसद्या लिसें महानगरपालिकाया उपप्रमुख हरिप्रभा खड्गी र थी थी वडाया वडाअध्यक्षपिं नं उपस्थिति जुयादिइगु खः ।

किपा ग्वाहालि विजय रत्न तुलाधर

Leave a Reply

Your email address will not be published. Required fields are marked *