fbpx

बुंगद्यः रथय् बिज्यागु ३३ न्हु कुन्हु जाह्वलाख्यः थ्यन

रेखा शाक्य । झीगु सम्वाददाता

यल, तछला थ्व तृतीया ।

करुणामय व रक्तावलोकितेश्वर धकाः म्हसिउम्ह बुंगद्यःया खः थौं बिहीबार थति त्वालंनिसें सालाः जाह्वलाख्यलय् थ्यंकेहल । उकियालिसें लछि न्ह्यः पूच्वं निसें सालाः न्ह्याःगु स्वनिगःया हे दकलय् तःहाकःगु जात्रा धकाः धयातःगु थ्व खःयाया द्यःसालेगु ज्या क्वचाःगु दु ।

 

किपाः रेखा शाक्य

बुंगःद्यः व चाकुबहाः द्यःयात वंगु बछलाथ्व त्रयोदशी कुन्हु याकः मिसा भुयाः धकाः मिसापिन्सं थति त्वांलं निगुलिं रथयात साला दुवातय् तक थ्यंकल । अन लिपा बछलागाः पंचमी कुन्हु मंगः भिंद्यःया न्ह्यःने च्वंगु पाटी साइत स्वयाः थौं अर्थात तछला थ्व तृतीया कुन्हु निगुलिं रथयात जाह्वलाख्यः सालेगु साइत पिकाःगु खः । व हे साइत कथं थौं सनिलय् निगुलिं रथयात जाह्वलाख्यः थ्यंकाः याः न्यायेकुगु खः ।

थुकथं थौंया रथजात्राया साक्षी कथं यल रत्नाकर महाविहारया जीवित कुमारी स्वयम कुमारीपाटीया पाटी बिज्याये माःगु परम्परा कथं अन बिज्यागु खः ।

किपाः रेखा शाक्य

परम्परा कथं रथ सालीगु प्यन्हु न्ह्यः बछला गाः आमै कुन्हु बुंगः द्यःया प्रसाद किपूया प्यंगः थामय् पांजुपिं लाकां मन्ह्यासे न्यासि हे वनाः अनया याकःमिसा अर्थात इहिपाः मजुनिम्ह मिसायात स्वां बिइत वनेमाःगु चलन कथं व विधि दु ।

जाह्वलाख्यलय् थ्यंकेगु छन्हु न्ह्यः नं थति त्वाःया दुवातय् हाकनं निक्वःगु खुसिइ नैंक्याः लुइमाःगु चलन दु । व हे कथं म्हिगः नैक्याः लुइगु ज्या नं जुल ।

थौं निगुलिं रथ अन थ्यनेवं हे थासंथाय्या धर्मावलम्बी भक्तजनपिन्सं १०८ प्वाः देवाः च्याकेगु ज्या यात । निगुलिं रथ जाह्वलाख्यः थ्यंगुया कन्हे कुन्हु पुच्वमितय् छ्वयाला बु याना थःथिति सःता भ्वय् नयेगु चलन दु ।

अथेहे प्वाकलं क्यनीगु छन्हु न्ह्यः बहनी जाह्वलेगु गुथिपाखें निगुलिं घःचालय् जा छायेगुया लिसें जा ह्वलेगु नं परम्परा दु । थज्यागु परम्परां यानाः हे थुगु ख्यलय् थ्यनकि जा ह्वलेगु जुया थ्व ख्यःया नां हे जाह्वलाख्यः जूगु धाइ । नापनापं पान्जुया तिरिपिन्स झः झः धायेकाः वसतं पुनाः नकिं खायेगु धकाः खाकिगु चलन नं दु ।

अन लिपा नियम कथं निगुलिं द्यःया रथ जाह्वलाख्यलय् थ्यंगु प्यन्हु लिपा प्वाकलं क्यनेगु परम्परा दु ।  उकिं आः वइगु तछला थ्व सप्तमी कुन्हु प्वाकलं क्यनीगु ज्या जुइ । धायेत ला थ्व चलन  लिपा जक हे वःगु धाइ तर अथे धइगु गुलि लिपा धइगु एेतिहासिक दस्तावेज मदु । अथेसां थ्वकुन्हु राषट्रप्रमुख हे वयाः स्वयेमाःगु न्हापांनिसेंया चलन खः ।

 

प्वाकल‌ं क्यनेसिधयेवं चाकुबहाः द्यः रथय् हे च्वनाः थःगु थासय् लिहाँ बिज्याइसा बुंगःद्यःयात रथं क्वकया बिज्याकाः चिधंगु खतय् तयाः बुंगय् हे बिज्याकी । थथे द्यः बिज्याकी बलय् लँपु दुच्छि हे छ्वालि च्याकाः लँ स्वः वनेगु परम्परा दु ।

किपाः रेखा शाक्य

 

किपाः रेखा शाक्य

 

किपाः रेखा शाक्य

 

किपाः रेखा शाक्य

Leave a Reply

Your email address will not be published. Required fields are marked *