fbpx

बागमती प्रदेश स्वीकार्य मजू – शुक्रवाः सिठ्ठी जुलुस पिदन

रेखा शाक्य । झीगु सम्वाददाता

येँ । पाेहेलाथ्व नवमी ११४०

बागमती प्रदेश नामांकन यायेत्यंगु विरुद्ध नेवाः एकता दिवसया झ्वलय् नेवाः शक्ति क्यनेत इनाप यासें म्हिगः शुक्रवाः सिठ्ठी जुलुस पिदंगु दु ।

किपाः रेखा शाक्य

नेपाः युथ अर्गनाइजेशन, सेभ नेपाः भ्याली, नेवाः राजनीतिक अभियान, उपत्यका सतक विस्तार पीडित संघर्ष समितिलिसें १० गू संघसंस्थाया ग्वसालय् सिठ्ठी जुलुस पिदंगु खः ।

ग्वसाः खलकं बहुपहिचानया लिधँसाय् प्रदेशया नामाकरण यायेमाःगु, बागमति प्रदेश म्वाः, प्रदेशया एेतिहासिक व साँस्कृतिक सभ्यताया सम्मान याये, नेवाः स्वायत्त राज्य जिन्दावाद, नेवाः ताम्सलिंग प्रदेश घाेषणा या, जनताया मतया कदर या, निर्वाचन कन्हे नं वइतिनी हाेस या, दलगत ह्वीप तयेदइ मखु, प्रदेशसभा अधिकारय् हस्तक्षेप मयाये व अल्पसंख्यक समुदायया स्वायत्त क्षेत्रया घाेषणा या धइगु नारा न्ह्यःने
तःगु खः ।

किपाः रेखा शाक्य

म्हिगः येँया थायमदुइ न्हिनय् ५ ता इलय् बागमती प्रदेश स्वीकार्य मजू व नेवाः शक्ति क्यनेत पुस १९ गते शनिवाः ११ ता इलय् न्हूसतकया भूगोल पार्कय् मुनाः असनय् जुइगु नेवाः एकता दिवसया सभाय् ब्वति कायेत इनाप यासें थथे सिठ्ठी जुलुस पिकागु खः ।

म्हिगः जूगु सिठ्ठी जुलुस थाय्मदुं असं जनबहाः वंघ आेमबहाः चिकंमुगः मरु जुया हाकनं महाद्यः पार्वती दबली थ्यंका क्वचायेकूगु खः ।

किपाः रेखा शाक्य

 

किपाः रेखा शाक्य

 

Leave a Reply

Your email address will not be published. Required fields are marked *