fbpx

प्राचीन टिष्टुंग बज्रबाराहीया १२ दँया देवी प्याखं येँया हनुमानध्वाखाय्

रेखा शाक्य

येँ । थिंलाथ्वः पञ्चमी

मकवानपुर जिल्ला थाहा नगरपालिकाया प्राचीन टिष्टुंग बज्रबाराहीया १२ दँया देवी प्याखं  म्हिगः येँया हनुमानध्वाखाय् कालभैरवया लिउने दबली क्यने ज्या जुल । जीवन्त संस्कृति समाज येँया ग्वसालय् टिष्टुंग बज्रवाराही १२ नाचया संयोजनय् थाहा नगरपालिकाया गुहाली म्हिगः देवगणया प्याखं क्यने ज्या जूगु खः ।

टिष्टुंगं म्हिगः थुगु प्याखं क्यनेत थ्यंमथ्यं ७० म्ह देवगण व बाजंखलः अले उगु प्याखंया सहायकपिं येँ थ्यंकवःगु खः । टिष्टुंगय् बज्रवाराही द्यःयात अनया ग्राम देवी कथं स्थानीवासीं तसकं हनातःम्ह द्यः खः । गुम्ह द्यःव‌ं टिष्टुंग, पालुंग व चितलांगया जनतापिन्त रक्षा यानाच्वंगु खः । व द्यःयात प्याखं हुइकल धाःसा प्राकृतिक प्रकोप, ल्वय्, भय्पाखें मुक्त व अन्नबालीया समस्याया लिसें राज्यया सुरक्षा जुुइ धइगु अवधारणा दु व हे अवधारणा कथं ता ई न्ह्यःनिसें थ्व प्याखं शुरु जूगु खः । येँ चापागाउँया नापनापं अनेक थासय् बज्रवाराही द्यःया थापना यानातःगु दु तर टिष्टुंगया बज्रवाराही वया नं मां खः धकाः धायेगु यानाच्वंगु दु धइगु धापू संस्कृतिविद् एकाराम सिं जुं कनादीगु खः ।

लिच्छवीकालंनिसें न्ह्यानाच्वंगु पुलांगु तन्त्रविद्या युक्त थुगु प्याखनय् श्री गणेश, श्री कुमारी, श्री वाराही, श्री इण्द्रायणी, श्री भैरव व बेतालया मूख्य देवगण खःसा महाद्यः पार्वती, गंगा, कवं, ख्याः निम्ह नं थुकिया पात्र खः ।

This slideshow requires JavaScript.

थी थी सूर तालयात खिं बाजाया नापं म्ये हाला क्यनीगु थुगु प्याखनय् तत्कालिन जुजु समरसेनया काय् सत्तलसेनया बाखं नं दुथ्याः । १२ दँया प्याखं क्यनेगु झ्वलय् येँ चन्द्रशमशेरं खर्च व व्यवस्थापनया जिम्मां मकागुलिं दथुुइ दिपा कयाच्वंगु थुगु प्याखं टिष्टुंगया लिसें पालुंग व मकवानपुर जिल्लाया नेवाः बस्ती अझं क्यने बाकी दनीगु खँ धाःगुु दु ।

१२ दँया बज्रवाराही प्याखंया रुपय् कयातःगु थ्व प्याखं निन्हू तक हुुइकिगु चलन दु । थी थी थासय् न्हयथाय् हुइकेमाःगु थ्व प्याखं वंगु बैशाख २६ गते निसें शुरु जूगुु खः । मू द्यःपिं बाहेक ९९ कलाकारपिन्सं चच्छि हे विभिन्न भागय् प्याखं हुइगुु व क्यनेगु याइ ।

स्थानीय सामाजिक कार्यकता प्रमोद जोशीं छुं दँ तक दिपा काःगु थुगु प्याखं स्थानीयया गुहाली व उत्सुकतां हाकनं क्यने ज्या जूगु दु गुगु सुखद अनुभुति जुल । थुकथं हे लिपा नं गुहाली दयाच्वन धाःसा थ्व प्याखनं निरन्तरता काइगु खँय् पूर्ण विश्वास दु धयादिल ।

अथेहे नेपाल भ्रमण वर्ष २०२० यात लक्षित यानाः कला व संस्कृतिया प्रवद्र्धन व प्रचार प्रसार यायेगु तातुनां एकारामसिं नाप सहलह ब्याकालि येँया अप्वः विदेशी वइगु थासय् क्यनेगु व येँया स्थानीयवासीयात नं थुगु प्याखं क्यनेगु लक्ष्य तयाः येँ वयागुु जानकारी थाहा ६ या वडा नायः शशिधर सुवेदीं धयादिल ।

म्हिगः प्याखं क्यने ज्या क्वचाय्काः सहभागी धामी, बाजागुरु, कलाकार व देवगणपिन्त सांसद राजेश शाक्यं पुजाया लिसें बेतालीं चिका सम्मान यानादिल सा वय्कलं संस्कृतिया उत्थान व जर्गेनाया नितिं थःपिं सदां नापं दइगु भलसा बियादिल । अथेहे वडा नं २४ या वडा नायः बालकृष्ण श्रेष्ठया लिसें वडाया सदस्यपिंन्सं नं दक्षिणा सहित देवगणयात पुजा यानादीगु खः ।  अथेहे २३ वडाया नायः मचाराजा महर्जनजुं अनं झाःपिं सकसितं लसकुस याःसें भाइचाराया स्वापू क्वातुकेत सदां थःपिन्सं यायेमाःगु ज्याय् सहभागीता बियाच्वनेगु प्रतिबद्धता प्वंकादिगु खः ।

Leave a Reply

Your email address will not be published. Required fields are marked *