fbpx

प्यक्वःगु नःलि लक्ष्मीदेवी साहित्य सिरपाः ११३९

रेखा शाक्य । झीगु संवाददाता

दिल्लाथ्वः चाैथी । येँ

नःलि साहित्य दबूया २५ क्वःगु व ४ क्वःगु नःलि लक्ष्मीदेवी साहित्य सिरपाः ११३९ ज्याझ्वः  मुक्तक धेंधेंबल्लाकासा यानाः क्वचाःगु दु । थाै‌ं थुगु ज्याझ्वः च्वसापासा येँ जूगु खः । थौंया मुक्तक कासाय् रामेश्वर मिश्रण श्रेष्ठ, तेज कृष्ण श्रेष्ठ व ज्ञानीराजा मानन्धरयात उत्कृष्ट मुक्तककारया रुपय् ल्यःगु खःसा हःपाः कथं राजा बज्राचार्यलुमन्ति चित्रकारयात ल्यःगु खः ।

किपाः रेखा शाक्य

ल्यःज्याय् ताःलापिं उत्कृष्ट स्वम्हेसित म्हतिं २०००/- तका व हःपाः कथं ल्यंपिन्त म्हतिं ५००/- तकाया लिसें खादां क्वखाय्काः हनापौ मूपाहाँ व दातापाखें ब्यूगु खः ।
कासाय् मुक्कं धेंधेंबल्लाखय् ब्वति काःपिं १६ म्ह जितेन महर्जन, सुनिता जुनु राजभण्डारी, तेजकृष्ण श्रेष्ठ, नरेन मान, माणिक उराय, मोक्ष बहादुर अमात्य, रत्न मन, रमेश मानन्धर, राजा बज्राचार्य, रामलाल श्रेष्ठ, रामेश्वर श्रेष्ठ रा सा, रेखा शाक्य, रेणु श्रेष्ठ, लुमन्ति चित्रकार व ज्ञानीराजा मानन्धर खः । व बाहेक अन्य धेंधेंबल्लाखय् व्वति कयामदिपिंया लिसें नःलिया दुजःया लिसें अन झायादिपिं पाहाँपिन्सं नं थःथःगु मुक्तक न्यंकेगु ज्या जूगु खः ।

छुं ई न्ह्यः थुगु साहित्यिक ज्याझ्वःया नितिं धकाः साहित्यकारपिन्त मुक्तक धेंधेंबल्लाकासा जुइगु खँया जानकारी सामाजिक सञ्जालपाखें बिसें ब्वति कायेत इनाप याःगु खः ।
ज्याझ्वलय् नुगः खँ तयेगु झ्वलय् नःलि साहित्य दबूया सल्लाहकार नरेशवीर शाक्यं इलय् ब्यलय् साहित्यीक ज्याझ्वः जुया हे च्वंगु खःसां विविध कारणं हाल भचा अज्यागु ज्याझ्वः जुइगु तापानाच्वंगु धयादिल । अथेहे आपालं साहित्यकार भाजु मय्जुपिन्सं निरन्तर रुपं साहित्यया विविध ख्यलय् च्वसा न्ह्याकेगु निरन्तर याना मच्वंगु धाःसें थःथे कासाया रुपय् जक हे च्वयेगु यानाच्वंपिं नं दूगु धाःसें वय्कःपिन्त च्वसायात निरन्तरत बिइत इनाप यानादीगु खः ।

मुक्तक कासाया सन्दर्भय् गुलि नं मुक्तक दुहाँ वल न्हापा सिबें म्हो जक हे दुहाँ वःगु स्वीकार यासें थुगु धेंधेंबल्लाकासय् छगू कथं मुक्तकया दुने दयेमाःगु शास्त्रगत सिद्धान्तय् दुने लाःगु मुक्तकयात जक ल्ययागु खँ कनादिल ।

अथेहे मेम्ह सल्लाहकार भाजु शौरव शाक्यजुं मुक्तकयात कयाः नुगः खँ तयेगु झ्वलय् छपू धात्थेंगु मुक्तक जुइत मदेयक्र मगाःगु विषयनाप स्वाःगु भाव, गहनता दयाः नं अनुप्रास दयेमाःगु तर अप्वःसिया मुक्तकय् अनुप्रासया कमि खनेदुगु खँयात कुलादिल । सरलभाषां धायेगु खःसा न्हापांगु झ्वलय् विषय उत्थान वयालिपा व विषययात तिवः बिइगु व स्वंगूगु झ्वः स्वतन्त्र रुपं ब्यक्त यायेगु ज्या जुइसा प्यंगूगु झ्वलं व विषययात छर्लंग यानाः विषयया अन्त जुइगु जुइमाः धकाः छुमा नं बियादिगु खः ।

अथेहे मू पाहाँ प्राध्यापकया लिसें लोकसाहित्य दबूया नायः मय्जु प्रेमशान्ति तुलाधरजुं साहित्यया न्ह्याःगु विधाय् नं ल्हाः न्ह्याके ज्यू तर गुगु विधाय् वनेगु खः उकिया व्यवहारिककथं दुग्यंक अध्ययन यायेहे माः अले तिनी च्वसां खःगु भावया लिसें व्यंगया नितिं शब्द चयन याये अपुइ धकाः धयादिल ।

किपाः रेखा शाक्य

नःलि साहित्य दूबुया नायः एवमं सिरपाःया दाता प्रदिप रत्न शाक्यजुं मदुम्ह थः मांया लुमन्ति थःत यःगु विषय मुक्तक जूगुलिं मांयात लुमंकेत थुकथं सिरपाः नीस्वनागु खँ कंसें सकलसित सुभाय् देछाया दिल ।

किपाः रेखा शाक्य

ज्याझ्वः मदुम्ह लक्ष्मीदेवीया किपातय् मूपाहाँया लिसें अन उपस्थिति छेँजःपिन्सं स्वां व खादा देछासें मदुम्हेसित लुमंकेगु ज्या यानाः न्ह्याःगु खः । थाैं जूगु ज्याझ्वलय् साहित्यकार आपालं भाजु मय्जुपिनिगु सहभागिता दूगु खः ।

Leave a Reply

Your email address will not be published. Required fields are marked *