fbpx

पत्रकार दबूयात मेयरपाखें भिंतुना

रेखा शाक्य

येँ । कछलागा अमाइ

नेवाः पत्रकार राष्ट्रिय दबूया न्हूगु निर्वाचित केन्द्रीय कार्यसमितिया जःपिं नाप येँ महानगरपालिकाया मेयर विद्यासुन्दर शाक्यं म्हिगः छगू ज्याझ्वःया दथुइ नाप लात । उगु ज्याझ्वलय् मेयर शाक्यं सकल जःपिन्त न्हूगु कार्य समितिं बांलाक ज्या याये फयेमाः धकाः भिंतुना बिसें थः नं छम्ह पत्रकार कथं हे ज्या याये धुनाम्ह जूगुलिं पत्रकारिताया अवस्थानिसें संचार माध्यमया अवस्था तकया लँपुया अनेक व्यवधान व आराेह अवराेहयात बांलाक हे थुगु खँ विगत बुधबार साप्ताहिक व नेपालभाषाया न्हिपौ विश्वभूमिइ ज्या यानागुलिं थूगु अनुभव कनादिल ।

थःगु नुगः खँ तय्गु झ्वलय् वय्कलं नेवाः संचारमाध्यमया विकासया येँ नगरपालिकाया मेयरया नातां  फक्व ग्वाहालि याये धयादिसें  येँय् जूगु  स्थानीय संस्कृतिया संरक्षणया नितिं स्थानीय मातृभाषाया संचारया नं विकास जुइमाः लिसें स्थानीय मांभाय् नं संस्कृतिया छगू ब्व हे जूगुलिं  भायया विकास मजुइकं स्थानीय संस्कृतिया विकास नं पूवंक जुइ फइ मखु धयादिल । समग्र झी नेवाःभाय् व  स्थानीय संस्कृतिया विकासया नितिं सकल पत्रकारपिन्सं नं महत्वपूर्ण भूमिका म्हितेमाः गुलिइ शाक्यं बः बियादिल ।

दबूया न्हूम्ह निर्वाचित नायः सुरजबीर बज्राचार्यं देय्न्यंकया नेवाः पत्रकारतयगु तथ्याङ्क मुंकेगु ज्या दबूपाखें यायेमाःगु धासें नेवाः पत्रकारया दक्षता थकायेगु ज्याय् दबू सदां न्ह्यचिलिगु व संगठनयात अझ सुदृढ दयेकेगु नितिं अनुभवी पुचःया दुजःपिं नापया सहलहलं योजनावद्ध ज्या याना वनेगु  योजनाय् याकनं ज्या न्ह्याकेगु धयादिल ।

किपाः गुहालि नृपेन्द्रलाल श्रेष्ठ

अथेहे दबूया वरिष्ठ न्वकू नृपेन्द्रलाल श्रेष्ठं दबूया संगठनया स्वरुप, संगठन विस्तार, दबूपाखें जुया वयाच्वंगु आः तकया ज्याखँया बारे जानकारी मेयरयात बियादिल । न्हापाया कार्यकालय् आदिवासी जनजाति पत्रकार महासंघलिसेया सहकार्यय् दबूपाखें न्हापांगु मातृभाषा पत्रकारिता दिवसया ग्वसाः ग्वयागु धासें वरिष्ठ न्वकू श्रेष्ठं व हे दिवसं नेपालभाषाया न्हापांगु पत्रिका पिथंम्ह धर्मादित्य धर्माचार्य नेपालया हे न्हापांम्ह मातृभाषी पत्रकार प्रमाणित जूगु जानकारी नं बियादिल । नापनापं ब्वनेकुथि नं स्थानीय सरकारया अधिकार क्षेत्रय् वयेधुंकूगु अवस्थाय् धर्मादित्यया जीवनी पाठ्यक्रमय् दुथ्याकेत नं श्रेष्ठं मेयर शाक्ययात इनाप यानादिल । लिसें, धर्मादित्यया झ्वाता स्थापना यायेगु नितिं पहल यायेत नं इनाप यानादिल ।

Leave a Reply

Your email address will not be published. Required fields are marked *