fbpx

न्ह्याइपुगु लकसया दथुइ म्ये हालामि रोजी श्रेष्ठया सुर-साधना

रेखा शाक्य । झीगु संवाददाता
येँ, दिल्लाथ्वः एकादशी ।

“२१ औं शताब्दी समाजय् हिउपाः वल तर मिसातय्त स्वइगुलिइ हिउपाः अझं गुलि जुइमाःगु खः उलि मजुनि । उकिं थज्यागु क्षेत्रय् न्ह्याः वनेत छचाखेरं मिखा तयाः न्ह्याःवनेगु कुतः जुइमाः जिगु थ्व हे सुवाः दु रोजी मय्जुयात । छम्ह मिसा मचां थःगु लुखाखरु हाचां गायाः सांगितीक क्षेत्रय् पलाः तयाः न्ह्यावनेगु अपुगु लँपु मखु ।”  मू पाहाँ कथं झायादीम्ह जनकवि दुर्गालाल श्रेष्ठजुं म्हिगः सांगितिक ज्याझ्वः सुर- साधानाया दबुलिं थ्वयेकुगु नुगः खँ खः ।

किपाः रेखा शाक्य

दच्छि न्ह्यःनिसें महिनाया लिपांगु विहिबाः छुं नं छुं विधायात कःघाना नाचघरया दबूयात सकसिगु मंकाः दबू खः धकाः वाः चायेके बियाः न्हूपिं कलाकारपिन्त थाय् बिइगु झ्वलय् मय्जु रोजी श्रेष्ठ डंगोलया सांगितिक ज्याझ्वःयात राष्ट्रिय नाचघर जम येँया सांस्कृतिक संस्थानया हे ग्वसालय् उगु दबुलिइ थाय् बिउगु खः । थ्व म्हिगः तकया बाह्रौें श्रृंखला खः । म्हिगः लाइभ म्यूजिकया दथुइ म्ये हालामि मय्जुं नेवाः भाय् व खस भाषाया यानाः झिंछपू म्ये हालादिगु खः । वय्कःयात ज्वः म्येय् सानुबाबु महर्जन, दिपेन्द्र बज्राचार्य व सुमित खड्कां साथ बियादीगु खः । म्ये हालेगु हे झ्वलय् ख्यालि जुजु मदनकृष्ण श्रेष्ठं नं छत्वाचा म्ये रोजी श्रेष्ठ नापं हालाः वय्कःयात हौसला बियादीगु खः ।

किपाः रेखा शाक्य

म्ये हालामि मय्जुं नुगः खँ तय्गु झ्वलय् मचांनिसें म्ये हालेगु चाहनायात पूवंकेत उलि क्वातुक्क पलाः छिइ मखंगु खँ कनादिल । न्हापां वि सं २०४८ सालय् रामेश श्रेष्ठपिं नापं जनवादी म्ये हालेगुलि साथ बियागु व लिपा इहिपा धुंकाः छेँजःपिनिगु धिसिलाःगु तिवलं सांगितिक क्षेत्रय् खस म्ये हालाः पलाः तयेगु बिचालं वयागु खःसां वरिष्ठ फोटोग्राफर राजभाइ सुवालजुं नेवाः मचा जुयाः न्हापां नेवाः भाय्या म्ये हाला सांगितिक क्षेत्रय् पलाः न्ह्याकुसां बांलाइगु बिचाःयात पूर्णकाजी ज्यापूया च्वसां पिज्वःगु जुगल डंगोलया संगीतय् म्ये हालेगु ह्वतालय् नेपालभाषाया म्ये वि सं २०७३ सालय् रिकर्ड जूगु ” मस्यू जितः छु जु छु जु”  म्ये हालागु खँ कनादिल । उगुु हे छपू म्येय्ं वय्कःयात सांगितिक क्षेत्रय् म्हसिका बिउगुलिं न्ह्यःने वनेत अझ धिसिलाःगु आत्मविश्वास ब्वंलंगु खँ कंसें थुगु सांगितिक यात्रायात न्ह्याकेफूगु दुनुगःया खँ कनादीगु खः ।

किपाः रेखा शाक्य

म्हिगःया ज्याझ्वलय् मेम्ह पाहाँ कथं झायादीम्ह गोल्डेन भ्वाइस अफ नेपाल वरिष्ठ म्ये हालामि प्रेम ध्वज प्रधानजुं नं नुगः खँ तयादिसें थज्यागु न्हूपिं प्रतिभायात न्ह्यःने ब्वयेगु ज्या यानाच्वंगु संस्था व म्येहालामिया लिसें सकल सांगितिक पुचःयात सुभाय् देछाया दीगु खः ।

किपाः रेखा शाक्य

म्येहालामि मय्जुया जीवनपासा बालचन्द्र श्रेष्ठं कलाः (राेजी श्रेष्ठ डंगाेल) या नुगः खँ थुइकाः वयात बांलाःगु ज्याय् गुहालीया नापं तिवः भलसा व हःपा बिया यंके फत धाःसा लिच्वः बिचाःयाना स्वयां नं चमत्कार कथं न्ह्यःने वइगु खँ कनादिल । जीवनय् नापं ह्वनेगु जक नं सकतां मखु छम्ह मेम्हसिया इच्छा चाहनायात थुइकाः पलाः न्ह्याका यंकेफत धाःसा छचाखेर लसतां बाय् काइगु खँ कंसें थःम्ह तिरियात बियागु साथं थः थुगु दबुलि थःगु म्हसिकां मखु रोजी श्रेष्ठया भातया नामं दंवयेखःगु खँ लसतां प्वंकादिल ।

किपाः रेखा शाक्य

म्ये हालामि मय्जुया नेपालभाषाया व खसभाषाया म्येया धुकू जाय्केगु कुतः न्ह्याना हे च्वंगु दु । वय्कलं थःगु पलाः सांगितिक क्षेत्रय् धिसिलाकागुया दुसू कथं आपालं अवार्ड नं ल्हाति लाकाच्वंगु दु ।

म्हिगःया सांगितिक ज्याझ्वलं सकसिगु नुगःयात थःम्ह फक्वः छझाया इलय् जूसां सांगितिक माहौलय् तयाः न्ह्याइपुकागु दु धइगु खँ  वय्कःपिं ज्याझ्वः ज्वछिं हे उगु लकसय् च्वनाः  साथ बिउगु  भलसां थःगु सांगितिक यात्रायात थुकथं हे निरन्तरता बिइगु खँ मय्जु श्रेष्ठं थुम्ह पंक्तिकारयात नुगः खँ कनेगु झ्वलय् प्वंकादीगु दु ।

किपाः रेखा शाक्य

Leave a Reply

Your email address will not be published. Required fields are marked *