fbpx

नेवाः सभ्यता न्हंकीगु गुथि विधेयक च्याकाः विरोध

रेखा शाक्य । झीग संवाददाता

येँ, तछलाथ्वः चौथि । नेवाःतय्गु अस्तीत्व व सभ्यतालिसे स्वाःगु द्वलंद्वःदँ पुलांगु गुथि परम्परायात हाथ्या बिइत आःया नेकपा सरकारं संघीय संसदय् दर्ता याःगु गुथि सम्बन्धी कानुनयात एकीकरण व संशोधन यायेत दयेकूगु विधेयकयात थौं नेवाः अभियन्तातय्सं च्याकाः विरोध क्यंगु दु । थ्व विधेयकयात कयाः थौं आयोजना याःगु छगू अन्तरक्रिया ज्याझ्वः सिधयेवं उमिसं पिने वयाः विधेयकया प्रतिलिपि च्याकूगु खः ।

उगु ज्याझ्वलय् उपस्थित नेवाः देय् दबूया नायः नरेश कुमार ताम्राकार, नेवाः राजनीतिक अभियानया नायः डा। महेशमान श्रेष्ठ, नेवाः राष्ट्रिय पत्रकार दबूका नायः श्रीकृष्ण महर्जन व मेमेपिं अन उपस्थित जुयाः धल्काे निकालयँय् उगु विधेयक च्याकूगु खः ।
थ्व हे विधेयकया विरोध यायेत उमिसं आइतबार न्हिनय् येँ माइतीघर मण्डलाय् विरोध प्रदर्शन याइगु नं खँ क्वःजिउगु दु ।

व स्वयाः न्ह्यः अन्तरक्रिया ज्याझ्वलय् गुठी संस्थानया अध्यक्ष मीनराज चौधरीं उगु विधेयकया मस्यौदा गुठी संस्थानं हे दयेका छ्वःगु जूसां व यक्व पाकाः जक राष्ट्रियसभाय् दर्ता याःगु खँ कँसें थ्व पास जुल धाःसा नेपाःया धर्म व संस्कृतियात तसकं प्रभाव लाकीगु खँ धयादिल ।

प्रस्तावित गुठी विधेयकया दफा २३ य् हाल कायम जुयाच्वंगु छुट गुठी व सार्वजनिक गुठीत स्वतः राजगुठीइ हिलीगु अले व धुंकाः अज्याःगु गुठीया चल अचल सम्पत्ति, जायजेथा जक मखु द्यःया मूर्तिं तक नं अज्याःगु द्यःगः व उकिया सम्पतिया अधिपतिकायेत दयेकातःगु अज्याःगु प्राधिकरणया पदाधिकारपिनिगु जुइगु खँ धयातःगु दु । अथे हे दफा २४ य् गुठीयारया छुं हे हक मदइगु कथं या व्यवस्था यानातःगु दु ।

नेवाः राजनीतिक अभियानया नायः डां महेशमान श्रेष्ठं नेवाःत थज्याःगु समस्याया इलय् नं दनामवःगु धासें आः दनामवल धाःसा नेवाःतय्गु थःगु गुथि, द्यःगः जात्रा पर्व धइगु हे मल्यनीगु चेतावनी बियादिल ।

अन हे नवासें नेवाः देय् दबूया अध्यक्ष ताम्राकारं गुथि धइगु नेवाःतय्गु मंकाः सम्पति जूगुलिं सरकारं उकिइ मिखा तये मजिउगु अले थुकिं अन्तय् वयाः इसाईकरणयात हे ग्वहालि याइग खँ धयादिल ।

नेपालभाषा टाइम्सया सम्पदक सुरेश किरण मानन्धरं थ्व विधेयक पास जुलकि नेवाःत थःगु हे आदिभूमिइ भूमिहिन जुइगु खँ कनादिल । लिसें थ्व विधेयक पास यातकि नेवाःतय्सं हानं आन्दोलन याइगु खँ नं वय्कलं लुमंकादिल ।

Leave a Reply

Your email address will not be published. Required fields are marked *