fbpx

 नेवाः पत्रकार राष्ट्रिय दबुया नायः -सुरज वीर बज्राचार्यं

रवि महजर्न

येँ । कछला गाः पञ्चमी ।

नेवाः पत्रकार राष्ट्रिय दबूया स्वक्वःगु तःमुँज्या टेकुइ म्हिगः तःजिक क्वचाःगु दु ।  पुचः दथुइ चुनावया लकस ब्वलनेवं अन्तिम इलय् नायः पदया प्रत्यासीपिं दथुइ सर्वसहमतिं सुरज वीर बज्राचार्य नायः ल्यःगु खः । अथेहे मेम्ह नायःया दावेदार पुलांगु कार्यकालया न्वकू नृपेन्द्र लाल श्रेष्ठ मू न्वकूलय् च्वनादीगु दु ।

किपाः फेसबूक पाखें

न्हूगु कार्यसमिति कथं रचना श्रेष्ठ व सन्दिप श्रेष्ठ न्वकु ल्यःगु दु । सुनील महर्जन मूछ्याञ्जे, केके मानन्धर छ्याञ्जे, राजु नापित व प्रेरणा शाक्य ल्यूछ्याञ्जे, सुरेन्द्रभक्त श्रेष्ठ दाभरिं, बाबुकाजी साछेँ श्रेष्ठ ल्यू दांभरिं कथं ल्यःगु दु ।

दुज कथं नविन जोशी, विजय राम कर्माचार्य, भाइ काजि महर्जन, विराज काजि राजोपाध्याय, प्रजीत शाक्य, पूर्ण भक्त दुवाल, अनुप प्रधान, तेज नारायण महर्जन, विगेन तुलाधर व श्याम तण्डुकारपिं ल्यःगु दु । मिसा दुजकथं हसना लवजु, सुनीता महर्जन, मीना वज्राचार्य, रुबि श्रेष्ठ, अनिता डंगोल व नीशा श्रेष्ठ च्वनादीगु दु ।

पुलांम्ह नायः श्रीकृष्ण महर्जन सल्लाहकार ल्यःगु दु । अथेहे प्रदेश १ या संयोजक कथं भोजराज श्रेष्ठ व प्रदेश ४ या संयोजक कथं उत्तम श्रेष्ठ ल्यःगु दु ।

न्हूम्ह नायः बज्राचार्यं थःगु कार्यकालय् जिल्ला व स्वनिगःया नेवाः पत्रकार दथुइ एक्यबद्धता याना यंकेगु खँ कनादिसें वयेकलं थःगु कार्य योजना तकं कनादिल ।

किपाः नेवाः सूचना केन्द्र

नेवाः पत्रकार राष्ट्रिय दबूया स्वक्वःगु तःमुँज्या न्ह्याये न्ह्यःया न्हापा‌ंगु ज्याझ्वलय् ज्याझ्वःया उलेज्या जूगु खः । गुगु ज्याझ्वलय्  काभ्रे निवासी वरिष्ठ पत्रकार तथा साहित्यकार मोहन दुवालयात वाङमय शताब्दी पुरुष सत्यमोहन जोशी पत्रकारिता पुरस्कार व नगद १०,०००/- लः लल्हागु खः । ज्ञानज्योती लक्ष्मीप्रभा स्मृति पत्रकारिता पुरस्कारलिसें नगद २०,०००/- झापा धुलाबारी निवासी वरिष्ठ पत्रकार तथा साहित्यकार अमृतलाल श्रेष्ठयात ब्यूगु खः । राष्ट्रिय समाचार समितिया फोटो पत्रकार रत्नकृष्ण श्रेष्ठयात बाबुराजा ज्यापु फोटो पत्रकारिता पुरस्कार तथा नगद १०,०००/- ब्यूगु दु । भिक्षु कुमार काश्यप स्मृति पत्रकारिता पुरस्कार तथा नगद ११,१००/- कान्तिपुर दैनिकया हिमेशरत्न बज्राचार्ययात ब्यूगु खः । ज्ञानदेवी मणिरत्न स्थापित स्मृति पत्रकारिता पुरस्कार तथा १२,०००/- धरान निवासी वरिष्ठ पत्रकार याम प्रधानयात ब्यूगु खः ।

किपाः नेवाः सूचना केन्द्र

ज्याझ्वःया उलेज्याय् नवासें येँ महानगरपालिकाया मेयर विद्यासुन्दर शाक्यं पत्रकारिता क्षेत्र मर्यादित जुइमाःगुलिइ बः बियादिल । महाधिवेशनय् प्रदेश नं। ३ सा सांसाद राजेशकाजी शाक्य, जीवन डंगोल, प्रेस काउन्सिल नेपालया कार्यबाहाक अध्यक्ष किशोर श्रेष्ठ, नेपाल पत्रकार महासंघया प्रतिनिधि, नेपाल आदिवासी जनजाति पत्रकार महासंघया प्रतिनिधि, दबूया सल्लाहकार, चितवन, सुनसरी, लमजुङ, गोरखा, धादिङ, तनहुँ, झापा, कञ्चनपुर, काभ्रे, सिन्धुपाल्चोक लगायतया जिल्लापाखें सिफारिस जूपिं पार्षदपिनिगिु सहभागिता दूगु खः ।

 

Leave a Reply

Your email address will not be published. Required fields are marked *