fbpx

नेवाः देय् दबूया औचित्यया बारे सहलह

झीगु संवाददाता
येँ, दिल्लाथ्व पञ्चमि । सम्पूर्ण नेवाःतय्गु दकलय् तःधंगु संस्था धयातःगु नेवाः देय् दबूया औचित्ययात कयाः थौं आइतबार थन छगू सहलह ज्याझ्वः जुल ।

ज्याझ्वलय् नवासें दबूया कोषाध्यक्ष अन्जिता खड्गीं आः नेवाः देय् दबू सुयागुं बदनियतपूर्ण एकाधिकारं मूक्त जूगु व आः विधान सम्मत ज्या यानायंकेत उकिया नेतृत्वया न्ह्यःने बाध्यकारी अवस्था दंवःगु कनादिल ।

नेवाः देय् दबूया औचित्ययात कयाः थौं आइतबार येँय् जूगु छगू ज्याझ्वलय् नवासें वय्कलं थथे धयादिइगु खः ।

किपाः रेखा शाक्य

आः नेवाः देय् दबूयात धाथें वयागु स्थपानाकथंया उद्देश्य पुरा यायेगु खःसा दक्व नेवाःतय्सं थःगु सरोकार क्यनाः उकियात खबरदारी यानाः हानं गलत ज्या मजुइके पाखे यंकेमाःगु नं वय्कलं कनादिल ।

“अनया हालत खँखं जितः ला अन आः ज्या यायेगु रुची नं मन्त हिम्मत नं मन्त । तर आः न्यायया जीत जूगु दु । जिगु जिम्मेवारी पुवंकेत जि लिचिलेमखु । नेवाः देय् दबूयात मतिना याइपिं अले दबूया औचित्य दनि धाइपिं दक्व छपँ जुयाः न्ह्यःने वयेमाःगु दु,” वय्कलं धयादिल ।

अथे हे वय्कलं थः पुनर्बहाली जूगु मखुसें उकुन्हु अमसझदारीबस ज्या यायेमखंगुलिइ आः नियमित ज्या यायेगु वातावरण तयार जूगु खः धकाः नं स्पष्ट यानादिल ।

दबूया आर्थिक अनियमितता, विधान सम्मत प्रक्रिया पुरा मयासें उगु संस्थया कोषाध्यक्ष अन्जिता खड्गीयात जिम्मेवारी्रं हटेयाःगु, विधानया छुं छुं दफात संस्था दर्ता ऐन २०३४ व प्रचलित कानुनलिसे ल्वाःगु विषयय् २०७६ असार १९ गते छलफल जुयाः जिल्ला प्रशासन ज्याकू येँनं उगु निर्णय कार्यान्वयन मयायेत, दबूया लेखा परिक्षण याकाः लछिया दुने प्रतिवेदन बिइत अले विधानयात संशोधन यानाः तीन महले फारम भरेयानाः स्वीकृतिया लागि पेश यायेत धकाः निर्देशन बियाहःगु दु ।

किपाः रेखा शाक्य

अथे हे ज्याझ्वलय् डा. चुन्दा वज्राचार्यं नेवाः देय् दबुलिइ यक्व न्ह्यःनिसें निम्ह प्यम्ह मनूतय्सं थःगु निहित स्वार्थया लागि दबूयात गलत ज्या यायेत प्रेरित यानाच्वंगुलिं अथे मजुइकेत दक्व सजग जुइमाःगु खँ कनादिल ।

नेपाल खड्गी सेवा समितिया संरक्षक मनोज नेवाः खड्गीं नेवाः देय् दबूयात सबल अले नेवाःतय्गु मुद्दाप्रति गंभीर संस्था जुइकेत दक्व नेवाःत जानाः सरोकार क्यनेमाःगु खँ धयादिल ।

अथे हे मेमेपिं वक्तापिन्सं नं नेवाः देय् दबूया औचित्य मदूगु मखुकि उकियात आः झन् गथे यानाः औचित्यपूर्ण दयेकेगु अले उकियात अथे दयेकेत गथेयानाः नेवाःत थः हे संगठित जुइमाःगु धइगु धारणा नं तयादिल ।

वय्कःपिन्सं आः नेवाः देय् दबूलिइ नेवाः भावना मदुपिं नेवाः भाय् ल्हायेम्हाःपिं व खाली राजनीतिक फाइदाया लोभं वा भत्ता इत्यादि चिचीधंगु लाभया लागि जक अन प्यपुना च्वनीपिं दूग कारणं उकिं गुगु उद्देश्य तयाः दबूया नीस्वंगु खः उगु उद्देश्य पूमवनाच्वंगु खँ नं कनादिल ।

ज्याझ्वः नेपाल खड्गी सेवा समितिया ग्वसालय् जूगु खः ।

One thought on “नेवाः देय् दबूया औचित्यया बारे सहलह

  • July 8, 2019 at 8:08 am
    Permalink

    Ji Heramba B. Rajbhandary. Suprabhatam ! Ji chhma Newa jugu nata tho Newa: De Dabuya ya nhi nhi Vikash juya wonema dhayagu subha Kamana dechana chona. Chhikapin fukan miliejuya vikasha yagu abasthaya Newatafukasita abasyana banlana wonigu kha: . Jigu pakhen yekwo yekwo subhakamana du chhikipinta.
    Subhaye !
    Dr. Heramba B. Rajbhandary,
    Nepal Dairy Pvt Ltd. (nd’s).

    Reply

Leave a Reply

Your email address will not be published. Required fields are marked *