fbpx

नेवाः गुथि तोखां थी थी ज्याझ्वः यासें ११४० न्हूदँयात लसकुस याइगु

सुविन्द्र श्रेष्ठ
येँ । कौलागाः अमाइ ।

नेपाल सम्वत् ११४० न्हूदँयात लसकुस यायेभनं नेवाः गुथि तोखां थी थी ज्याझ्वः यासें तःजिक हनेत्यंगु दु । वंगु दँय् थें भिंतुना साँस्कृति र्‍याली, नगरस्तरीय नृत्य प्रतियोगिता, साँस्कृतिक दाफा भजन बाजा गुरुपिन्त सम्मान याना वयाच्वंगु ज्या यात थुगसि नं निरन्तरता बिइगु खँ नेवाः गुथि तोखां धाःगु दु।

लक्ष्मिपुजाया न्हि कुन्हु (कार्तिक ११ गते) बहनि तोखाया थनेलाछीइ मण्द दयेकाः दीपप्रज्वोलनया लिसें आतिसबाजी यानाः नेपाल सम्वत् ११४० यात लसकुस यायेगु खँ गुथिया महासचिव रमेश नापितं धाःगु दु।

किपाः श्राेत सुविन्द्र श्रेष्ठ

नेपाल सम्वत् ११४० न्हूदँया न्हापांगु ला या न्हापांगु दिं थनेलाछीं भिंतुना र्‍याली न्ह्याइगु जूगु दु । न्हापांगु चरणया ज्याझ्वः अन्तर्गत थनेलाछीइ सकलें मुनाः सुथसिया ८ बजे साँस्कृतिक झाँकी सहित भिंतुना र्‍याली नगरपरिक्रमा यासें हाकनं थनेलाछीइ तक थ्यंकाः समापन जुइ । भिंतुना र्‍याली नगरपरिक्रमाय् तोखाया थी थी संघसंस्था तथा स्थानीयपिनिगु ब्वति दइगु जूगु दु ।

निगूगु चरणया ज्याझ्वः अन्तर्गत न्हिनसिया ३ बजेनिसें थनेलाछीया दबुलिइ साँस्कृतिक कार्यक्रम जुइ । गुकिइ भजन दाफा खलया गुरु तथा नव प्रशिक्षित वाध्यबादकपिन्त सम्मानपत्र व सुभायपौ लःल्हायेगु जुइ । नापनापं नृत्य प्रतियोगिता लगायत थी थी साँस्कृतिक ज्याझ्वः समेत जुइगु नेवाः गुथि तोखाका नायः देवराज डंगोल जानकारी बियादिगु दु ।

भाय् हिउम्ह रेखा शाक्य

Leave a Reply

Your email address will not be published. Required fields are marked *