fbpx

नेवाः एकता दिवस हन

सुगत रत्न सिन्दुराकार 

झिंक्वःगु नेवाः एकता दिवस पुष १९ गते ¥याली व आमसभा याना हंगु दु । थनया भूगोलपार्कं न्हू सतकं नेवाः ध्वाँय् ज्वनाः ¥याली पिथना मरु, न्यत छेत्रपाति, थँहिति, थाय्मरु चाहिला असनय् वना आमसभाय् हिलेगु याःगु खः । थुगु नेवाः एकता दिवसय् नेवाः न्ह्यलुवाःपिं राजेन्द्र श्रेष्ठ, डा. विजय सैजु, दिलिप महर्जन, दास प्रधान लगायतपिन्सं नेवाःतय्गु सरोकारया पक्षयात कःघाना थःथःगु नुगः खँ तयादीगु खः ।

किपा डा. विजय सैंजु

थुकथं नुगः खँ तय्गु झ्वलय् थौंया सरकारं नेवाः व जनजातितय्गु सवालयात हुतांचा नकाः वयाच्वंगृुलिं आः नेवाः लगायत देय्या सकलें जाना वर्तमान सरकारया विरुद्ध दनेमाःगु खँय् विशेष बः बियादीगु खः । देय् दबूया संयोजनय् नेवाः स्वायत्त राज्य मंका संघर्ष समितिइ दुथ्यानाच्वंगु १३ घटक व मेगु थीथी खलः पुचः दुथ्याकाः ग्वसाः खलः निस्वना थुगु ज्या न्ह्याका वयाच्वंगु खः ।

नेवाः एकता दिवसया अवधारणायात स्वया वनेबलय् संघीय लोकतान्त्रिक गणतन्त्र नेपाःया दुने नेवाः स्वायत्त राज्य सुनिश्चित याय्गु हे नेवाः स्वायत्त राज्य मंकाः संघर्ष समितिया मू आज्जु जुया वयाच्वंगु दु । थुकथंया नेवाःतय्गु सरोकारया पक्ष जुया नेवाः समाजय् दं वयाच्वंगु वा आवश्यक जुयाच्वंगु आज्जु पुवंकेया निंतिं नेवाः स्वायत्त राज्य संघर्ष समितिं नवमि प्वहेलाथ्व, ११३० कुन्हु दशरथ रंगशालाय् लखंलख नेवाःत मुनाः नेवाः स्वायत्त राज्य घोषणा सभा यानाः नेवाःतय्गु माग व अवधारणा सार्वजनिक याःगु खः । थुकथंया घोषणा लिपा संविधान सभा, राजनैतिक दलया नापनापं सकल सरोकारवालातय्गु ध्यानाकर्षण याःगु खः ।

उगु हे दँय् थिमिया बोडेय् नेवाः राष्ट्रिय राजनीतिक सम्मेलन नं तःजिक याय्गु ज्या जूगु खः नाप नापं उगु सम्मेलनं नेवाः दुने परम्परानिसें दयावयाच्वंगु जातीय् क्षेत्रीय साँस्कृतिक धार्मिक अनेकता व असमानताया विरुद्ध पोहेलाथ्व नवमिया न्हि लाकाः नेवाः एकता घोषणा याय्गु क्वःछ्यूगु जुलसा थ्वहे संघर्षया ऐतिहासिक न्हियात लुमंकाः दँय्दसं नवमि प्वहेलाथ्व कुन्हु नेवाः एकता दिवस हनावयाच्वंगु जुल । थुगु नेवाः एकता दिवसं नेवाःत नं राजनीतिक रुपं न्ह्योचिला न्ह्याःवनेमाःगु खँय् जागरण यान वयाच्वंगु दु । नाप नापं आपालं नेवाःत जागरण नं जुया वयाच्वंगु दु ।

नेवाः दुनेया अनेकताय् एकता हय्गु तातुनाः सकल नेवाः छवाः खः धइगु घोषणा न्हापांगु नेवाः एकता दिवसय् जूगु खँयात नं लुमंकुसें झिक्वःगु नेवाः एकता दिवस हनेगु ज्या याःगु खः । नेवाःत राजनीतिक रुपं सचेत जुया नेवाः सरोकारया खँयात सफलतापूर्वक पूर्णता विइया नितिं नेवाः स्वायत्त राज्य प्राप्ति याय् माःगु खः । उकिं थुकथंया आज्जु पुवंकेया नितिं झी नेवाः सकल छधिइ छप्पं जुयाः न्ह्याःवनेगु व नेवाः सरोकारया खँ थ्वय्केगु हे थौं तक झीसं न्हयाका वयाच्वनागु नेवाः एकता दिवसया मू तातुना खः । नेवाः एकता दिवस हनावयाच्वंनागु झ्वलय् राज्य सत्तां निरन्तर रुपं नेवाःतय्त भूमिपाखें विस्थापित याय्त जुयाच्वंगु षडयन्त्र, व्यापार लजगापाखें नेवाःतय्त विस्थापित याय्त जुयाच्वंगु षडयन्त्र, भाषा सँस्कृति सम्पदा न्हंकेत जुयाच्वंगु षडयन्त्र आदिया विरुद्ध एकताबद्ध जुइमाःगु थौंया तःधंगु विषय जुया झीगु न्ह्योने दं गयाच्वंगु दु नाप नापं आवश्यकता नं जुयाच्वंगु दु ।

थौंकन्हय् झीसं राज्य सत्ताया षडयन्त्र सिकार सडक विस्तार, फास्ट ट्रायक, बाह्य चक्रपथ, स्मार्ट सिटी, गुथि विधयेक, सम्पदाया व्यापारिकरणया रुपय् खनावयाच्वनागु दु । थुकिया विरुद्ध सचेत, एकताबद्ध संघर्ष मयाय्गु खःसा नेवाः जातिया अस्तित्व समाप्त जुइगु स्थिति पक्का नं वयेफुगु खने दया वयाच्वंगु दु । उकिं थौंया इलय् नेवाः एकता दिवस नेवाः जागरण दिवस कथं हनेमाःगु आवश्यकता झीगु न्ह्योने दया च्वंगुलिं हे थ्व दिवस हनेगु ज्या याना वयाच्वंगु खः । नाप नापं हनावयाच्वंगु दिवसयात थःथःगु थासं नं क्वातुक साथ विया थः नेवाः खः थःगु नं योगदान नेवाः सरोकारया सवालय् दयाच्वनेमाः धकाः न्ह्योचले माःगु दु । थ्व धैगु हे थःत थम्हं वचे याना तय्गुया नितिं संघर्ष याना च्वनेगु खः ।

सम्यक वाःपौ
किपा ः डा. विजय संैजु

Leave a Reply

Your email address will not be published. Required fields are marked *