fbpx

नेवाः आइडल ज्याझ्वःया घोषणा

रेखा शाक्य । झीगु सम्वाददाता

ने सं ११३९ बछला गाः द्वादशी । येँ

संगीत व सशक्त माध्यम खः गुकिं ऋतु, वर्ग, धर्म, लकस, ईब्ययात थुइकेत गुहाली याइसा हलिंया न्ह्यागु कुनय् च्वंपिं मनूतय्त दथुइ स्वापू स्वानाः हरेक थाय्या मनूतय्त थःगु भाय्प्रति आकर्षित याइ ।

थ्वहे संगीतया माध्यमं नेवाः न्हू पुस्तायात थःगु म्हसिका, भाय्प्रति जागरुक यायेगु तातुना ज्वना याकनं हे “नेवाः आइडल” ज्याझ्वः जुइत्यंगु खँया थौं घोषणा जूगु दु ।

थौं  नेवाः पत्रकार नाप खँ ब्याकुसें ज्याझ्वःया  कार्यकारी निर्देशकया लिसें ज्याझ्वःया मू नायःया भाला कयाच्वनादीम्ह भाजु मनोज नेवाः खड्गीं थ्व खँया जानकारी बियादीगु खः ।

हलिमय् संगीतया ख्यलय् मिखा ब्वाकाः स्वल धाःसां नं अमेरिकन आइडल धुंकाः इडियन आइडलं गूगु लोकप्रियता काल व थौंकन्हे नेपाल आइडलं नं कयाच्वंगु दु । थुकिं नं सीदु की संगीतया प्रभावं मनूतयेत थःगु भाय्प्रति याकनं हे जागरुक याः । थ्वहे खँयात वाः चायेकाः नेवाः न्हू पुस्तायात उत्साहित यायेगु कथं आः वइगु मोहनीया लकसय् याकनं हे अडिसन जुइगु जुइ धकाः वय्कलं जानकारी बियादीगु खः ।

नेवाः समुदायया सकल नेपाःमिया मंकाः प्रतिभा नेवाः आइडल मालेगु नितिं प्रदेश १ निसें ७ तकया झापा, जनकपुर, चितवन, पोखरा, बुटवल, सुर्खेत व धनगढिया लिसें येँय् विशेष अडिसनया ग्वसाः ग्वयाः देय् न्यंकनं प्रतिभा मालेज्या जुइ । थुकिइ ब्वति १६दँ निसेंया नेवाःपिन्सं ब्वति कायेदइ धकाः कजि खडगीजुं कनादीगु दु ।

गाडि नापं नगद पुरस्कार नेवाः आइडलयात बिइगु ग्वसाः दूगु व ल्यू व लियांल्यू यात मोटरसाइकल व नगद पुरस्कारया व्यवस्था जुइगु खँ न्ह्यथंगु दु ।

राजु स्यस्यः, देवेन्द्रमान जोशी, मनोज नेवाः खड्गी नापं अञ्जिता खड्गीया प्यम्ह दुजःया पुचलं थी थी भाला कुबिया थुगुु आइडल न्ह्यःने न्ह्याकेगु ग्वसाः दूगु व ३३ ब्वः तकया ज्याझ्वः यानाः उकियात ईमेज च्यानलय् प्रशारण यायेगु खँ न्ह्यःने तयादीगु खः । अथेहे लहना मिडिया प्रा लि पाखें मिडिया संयोजन व बेलटेक प्रा लि अनलाइनं प्राविधिक रुपं साथ बिइगु खँ क्वजिउगु धाःगु दु ।

मुक्कं ३ करोड ३२ लाखया अनुमानित खर्च नापं ज्याझ्वःया तयारी जुयाच्वंगु जानकारी ब्यूसें अन्य आपालं व्यवसायीपिंनाप सहकार्यया खँ न्ह्यानाच्वंगु धाःसें छवाःया दुने निर्णायक भूमिकाय् च्वनिपिं समेत क्वजिइगु खँ धाःगु दुु ।

लुमंके बहः जू, उबलय् एफ एमय् थथे हे थःगु भाय्प्रति सचेत यायेत न्ह्याइपुगु माध्यम संगीत नं धिसिलाक्क लिधँसा जुइ धइगु वाः चायेका नेपालभाषाया ज्याझ्वः एफ एम स्वनिगः सच्छिइ जि नं म्ये हाले सः नामं वा या छक्वः ट्राय्कया माध्यमं न्हूपिं पुस्तायात म्ये हालेगु ह्वताः बियाः संगीतया माध्यमं भाय्प्रति च्यूता ब्बलंका ब्यूगु खःसा छुं ई न्ह्यःतिनि म्येहालामिया लिसें संचारकःमि सुरजवीर बज्राचार्यजुं चेज बुदिंया भिंतुना म्ये कासा यानाः नेवाःतय् दथुइ संगीतया माध्यमं भाय् प्रति जागरुक जूगु दसू क्यनाबिउगु खः ।

किपा रेखा शाक्य

थौं जूगु पत्रकार नापलायेगु ज्याझ्वलय् लहना मिडिया प्रा लि या नाय नृपेन्द्रलाल श्रेष्ठं नं थःगु नुगः खँ तयादीगु खःसा ग्वसाः खलःया मेम्ह व्यवस्थापनया भाला कुबियादीम्ह मय्जु अंजिता खड्गीं नं ज्याझ्वःया बारे जः ह्वलादीगु खः ।

Leave a Reply

Your email address will not be published. Required fields are marked *