fbpx

नेवाःतय्त छधी छप्पँ यायेगु ताःतुना नेवाः देय् दबू १५ वडा कचा गठन

येँ (बछलागा ४)–  नेवाः आन्दोलन व अधिकारया नितिं नेवाःतय्त छप्पँ छधी यायेगु ताःतुना नेवाः देय् दबूया १५ वडा कचा गठन जूगु दु ।

संगठन विस्तार यायेगु झ्वलय् स्थानीय सामुदायिक भवनय् च्वंगु भेलां बुधवाः १५ वडा कचा गठन यानाः झिंन्याम्ह दुजः दुगु न्हूगु ज्यासना पुचः ल्यःगु खः ।

नेवाः देय् दबूया केन्द्रीय दुजः व येँ महानगरपालिका १८ वडाया वडाध्यक्ष न्हूछेँकाजी महर्जनया सभापतित्वय् जूगु ज्याझ्वलय् न्ववानादिसें दबूया मूछ्याञ्जे माइलाबाबु देउलां देय् दबूया न्हूगु विधान कथं १५ वडा समिति गठन यायेगु ज्या जूगु खँ कनादिल ।

थ्व झ्वलय् वय्कलं धनगढीइ जूगु केन्द्रीय कार्यसमितिया बैठकं जनजागरण अभियान न्ह्याकेगु क्वःजिउ कथं ज्या न्ह्याकेगु लिसें थाय्थासय् संगठन विस्तार यायेगु ज्या न्ह्याःगु खँ कनादीगु खः ।

सभानायः न्हूछेँकाजी महर्जनं नेवाः समस्याया समाधान यायेत, नेवाः अधिकारया आन्दोलन यायेत न्हापां न्हापां विधानं पनाच्वंगु खःसा आः वःगु न्हूगु विधानपाखें स्पष्टकथं हे नेवाः देय् दबू न्ह्यःने खने दइगु धाल ।

न्हापा खलः पुचःपाखें जक प्रतिनिधित्व दुकयाच्वंगु इलय् छु नं ज्याझ्वलय् सहभागिता जुइबलय् देय् दबूया प्रतिनिधि खःसा नं खलः पुचःया जक ब्यानर खनेदइगु तर, आः वया नेवाः देय् दबूया कमितिपाखें ब्वति काइबलय् देय् दबूया प्रतिनिधि धकाः खनेदइगु कन ।

अथे हे महर्जनं नेवाः समस्या समाधान यायेफत धाःसा जक नेवाः देय् दबूया अस्तित्व ल्यना च्वनी मखुसा तनां वनी धाल । देय्न्यंक छरेजुयाच्वपिं नेवाःतय्त एकता यायेगु हे दबूया मू आज्जु धासें थ्व वइगु जेठ ११ गते ३ नं प्रदेशया ११ जिल्ला पदाधिकारीपिंन्त नेपाः ब्यांक्वेटय् म्हसिका कालबिल यायेगु ज्या जुइत्यंगु नं कन ।

ज्याझ्वलय् केन्द्रीय दांभरी शान्त श्रेष्ठ, केन्द्रीय दुजः हेराकाजी महर्जन, प्रदेश ३ या दुजः राजाराम श्रेष्ठ व येँ महानगरपालिका वडा नं १५ या सदस्य मैयाँलक्ष्मी महर्जन पाहाँ कथं झायादीगु खः ।

नायः मन राजा रंजितया नेतृत्वय् दयेकूगु १५ वडा कचाया ज्यासना पुचलय् न्वकु रमेश खड्गी, छ्याञ्जे अर्विन्द्रमान सिं, ल्यू छ्याञ्जे उद्धव खड्गी, दांभरी गीता श्रेष्ठ, ल्यू दांभरी महेन्द्र महर्जन निर्विरोध ल्यःगु खः । अथे हे दुजलय् अमर रंजित, निर्मला डंगोल, रिता ताम्राकार, मिना महर्जन, कुमार स्थापित, सुमन शाही, सुभाष डंगोल, केशव महर्जन, राजु महर्जन व सञ्जय ध्याकोयात ल्यःगु खः ।

प्रदेश नं ३ या छ्याञ्जे व डल्लु आवास क्षेत्रया नायः राजा शाक्यया संयोजनय् जूगु भेलां गठन याःगु न्हूगु ज्यासना पुचःयात मू पाहाँ देउलां देय् दबूया विधान कथं सपथ ग्रहण याकूगु खः ।

Leave a Reply

Your email address will not be published. Required fields are marked *