fbpx

नामकरण विधिया अभिप्राय -नेवाः संस्कार व उकिया विधि ब्वः ३

मदुम्ह बलदेव जुजु

नामकरण यायेबलय् गुलि नं विधित पूवंकेगु यानातःगु दु, उकिइ छगू छगूया अर्थ नं दु । खालि अन्धविश्वासया रुपय् जक अथे यानातःगु मखु । छाय्धाःसा संस्कृति धायेवं उकिया अभिप्राय दये हे माः । उकिं नेवाः संस्कृतिइ नं जीवनयात गथे यानाः न्ह्यःघ्वाना यंकेमाः धयागु दार्शनिक सिद्धान्त दु, गुगुलिं झीत बांलाःगु च्वछायेबहगु जीवनया लं क्यनाच्वंगु दु । झीसं थुइके जक मालाच्वंगु दु ।

नामकरण संस्कार यायेत स्वनेगु याना तःपिं द्यःतय् बारय् नेवाः संस्कृतिया दर्शन कथं स्वयेबलय् छु सिइ दु धाःसां नेवाःतय्सं द्यःधयापिन्त थः हे सरह थःगु परिवारया दुजः कथं भाःपीगु सिद्धान्त कयातःगु दु । उकिं थःगु परिवारया सकले दुजःतलिसे न्ह्याग्गु खँय् नं गथे दुविस्ता ब्याकाः सकतां खं सिइके बिइमाःगु खः अथे हे थम्हं हनातयापिं आगंद्यः, गनेद्यः, छेँय्त व छेँया लागाय् सकसितं सदां रक्षा याना च्वंनीपिं क्षेत्रपाल द्यःतय्त नं छेँया न्ह्याग्गु ज्याय् नं ब्वति कायेकाः दुथ्याकातयेगु थिति जुयाच्वंगु दु ।

उकिं न्हापां लः जाःगु कलशय् दाफ्वः स्वां कचा तयाः उकियात किसलिनं त्वपुया तयेगुया अर्थ छु धाःसा कलश धयागु न्ह्याग्गु द्यःया रुपय् नं तये जिउगु परम्परा दु । कलश दुगु थासय् माःमाःपिं न्ह्याम्ह द्यःनं आह्वान यायेवं वयाच्वनीगु धारणा कयातःगु दु । अथे जुगुलिं नेवाःतय् न्ह्याग्गु ज्या याःसां कलश स्वने हे माः ।

गुगुं धलं दने मालिबलय्, ततःधंगु पुजात जुइबलय् अथे हे संस्कारया ज्यात नामकरण, जंक्व, कय्तापुजा, इहि, इहिपाः, न्ह्याग्गुलिसं कलश मस्वंसे मजिउ । यलय् दँय् दसं जात्रा याइम्ह बुंगद्यः हे कलशय् साधन याना हयातःम्ह धयागु दु । रथय् तयाः जात्रा याना हइम्ह बुंगद्यःया मूर्ति ला व हे साधन यानाः हयातःगु कलशयात दुने तया पिने पाखें चा, कापतं भुनाः मूर्ति दयेकाः रंग पानाः दयेका तःगु धाइ । उकिं इलय् ब्यलय् बुंगद्यःया मूर्तियात भिंकेमाः नापं रंग नं पायेमाः । थथे भिंकेया लागि हे बुंगद्यःया न्हवं याना च्वंगु दु ।

कलशयात न्ह्याम्ह द्यःया रुपय् नं छ्यले जिउ धयागु खँ थुकिं नं सिइ दु कि सुं मनूया तःधंगु ज्याया लागी छेँय् नं पिहाँ वनेमाल धायेव छेँया मू लुखाया जःखः लःजाःगु घःत कलशया रुपय् तयाः उकियात हे थःम्ह इष्ट देवता भाःपियाः धेवा छायाः निर्विघ्न पूर्वक ज्या पूवनेमाः धकाः आसिका फ्वनाः पिहाँ वनी ।

अथे हे तुं न्हूम्ह भौमचा दुकायेबलय् नं लुखाय् जःखः कलशत तयाः उकिइ पुजा याके बिया लसकुश यानाः दुकाइ । थथे यायेगुया अर्थ खः छेँय् हनातयापिं सकलें द्यःतय्सं न्हूम्ह भौमचायात परिवारया दुजः कथं नाला कायेकेत इनाप यानाः दुकायेगु खः ।

अनंलि नेवाःतय् मोहनि, स्वन्तिबलय् व मेमेगु आगं पुजात यायेबलय् नं थापिं स्वनेगु धकाः कलशया रुपय् हे थ्वँ, अय्लाः दुगु, धाल्चा स्वनाः उकिइ द्यःने द्यछापाः तयाः उकियात हे द्यः भाःपिया पुजा यायेमाः । थुगु खं नं कलशयात न्ह्याम्ह द्यःया रुपय् नं स्वये जिउगु सिइ दु ।

थुगु कथं नामकरणय् नं कलश स्वनाः अन आगंद्यः व थंम्ह हनातयापिं मेमेपिं द्यःत नं दुगु भावं पुजा यायेगु संस्कृति दुगु खः । परिवारय् छम्ह मचा दुजः कथं अप्वः दुगु लसताया खँ थःगु परिवार हे भाःपिया तयापिं द्यःतय्त नं ब्याकेमाः नापं परिवारया दुजः कथं नाला कायेकेनं माः धकाः न्ह्यःने तयेगु नामकरण द्यःतय्त स्वनाः पुजाः यायेगुया अभिप्राय खः ।

कथहं ‍

न्ह्यब्वम्ह रेखा शाक्य

Leave a Reply

Your email address will not be published. Required fields are marked *