fbpx

नवदुर्गा भवानी म्हिगः येँया ग्वलय्

ने सं ११३९ थिंलाथ्व नवमी येँ

ख्वपया ऐतिहासिक महत्वं जाःगु अले जीवित द्यःया रुपय् पुज्याइगु नवदुर्गा भवानी म्हिगः येँया ग्वलय् थ्यंक बिज्यात । दच्छिया ८ ला तक न्ह्याइगु ख्वाःपाःया थुगु जात्रा दँय्दसं थें थुगुसिइ नं थिलाथ्व नवमीया दिं कुन्हु येँया ग्वलय् (जयवागेश्वरी) थ्यंकाः दशमी कुन्हु तक प्याखं हुइकेगु पुलांगु परम्परा खः ।

किपाः रेखा शाक्य
किपाः रेखा शाक्य

थुकथं थन बिज्यायेगु धइगु हे पशुपतिनाथनाप ख्वपया नवदुर्गा भवानीया नापलायेगु कथं कयातःगु खः । पशुपतिया मू पुजारीपाखें नवदुर्गा भवानीयात पूजायाना प्रसाद बियाः पशुपतिया जल बिइगु चलन दु । अथेहे पशुपति दुनेया सकलें द्यःपिन्त नापलायेगुया नापनापं गुहेश्वरी द्यःयात प्याखं देछाय् कथं दक्षिणपाखेया शिवालय् चुकय् बां लिकेगु जात्रा यानाः पुजा ग्रहण यायेगु चलन दु ।

किपाः रेखा शाक्य

म्हिगः सनिलय् सिफलय् थ्यंपिं देवगणपिन्सं म्हिगः हे ग्वलया दबलिइ थ्यनेवं गणेशया लिसें मेपिं प्यम्ह देवगणपिन्स द्यः ल्हाग खः । द्यः ल्हायेगु ज्या क्वचाय् धुंकाः श्री सूवर्ण बैद्यया संयोजकत्वय ख्वपया मू द्यः ससफो द्यः (महालक्ष्मीद्यः) यात पुजा याःगु खः ।

किपाः रेखा शाक्य

अनलि सकल देवगणपिंन्त विधिवत रुपं पुजायाना खा बां बिउगु खः । अथेहे वसपोलपोलपिं सकसितं समय्ब्वः न्ह्यःच्याकूगु खः । उगु हे झ्वलय् स्थानीयवासीपिन्सं नं द्यबाः, वसः, गा, नसात्वंसा, किसली आदि इत्यादि देछागु खः ।

थौं न्हिच्छि ग्वलया दुवातय् प्याखं हुलेगु परम्पराकथं सुथय् बाराहीया प्याखं, सिम दुमया न्या लायेगु प्याखं, महाकालीया प्याखं लिसें श्वेतभैरवया न्यालाकेगु, श्वेतभैरव व महाकालीया गा लाकाकायेगु प्याखं क्यंगु खः । थौं हे सकतां ज्या सिधय्का सकल देवगणपिं ख्वपय् हे लिहाँ बिज्यात ।

किपाः रेखा शाक्य

म्हिगः ख्वपंनिसें खमुलिइ वसः, तिसाया लिसें ख्वाःपाः व अन्य बाद्यवादन ज्वना न्यासि बिज्यापिं सकल देवगणयात पुजाया लिसें ८४ व्यञ्जनया भ्वय् देछाय्गु ज्या पूर्व वडा अध्यक्ष श्री सूवर्ण वैद्यया संयोजकत्वय् जूगु खः ।

किपाः रेखा शाक्य

थौं सिबें ३५ दँ न्ह्यःनिसें वय्कलं थुगु जिम्मेवारी पूवंकाच्वनागु धयादिल । वय्कःया धापू कथं देशय् ल्वय् भय् छुं मदयेमाः देशय् सुख शान्ति दयेमाः धकाः थुकथं प्याखं हुइकेगु व देशं दुने व पिने सकल देवगणपिं बिज्याना प्याखं हुइकेगु परम्परा न्ह्यानाच्वंगु धयादि ।

म्हिगः हे देवगणया दुजलं बियादिगु जानकारी कथं थ्व हे यःमह्री पुन्हिया सनिलय् सकलें देवगणपिं थिमिइ बिज्यायेत्यंगु दु । वंगु २०६६ सालय् छपुचः अबुझ स्थानीय त व देवगणया दुजःपिनि दथुइ कचमच जूगु हुनिं परम्पराकथं यंकेमाःगु द्यः प्याखनं दिपा काःगु खः । तर थुगसि थिमिया नगरप्रमुख मदनसुन्दर श्रेष्ठ व वडा नं ४ या वडा अध्यक्ष कुमार श्रेष्ठया विशेष पहलय् शान्तिपूर्ण ढंगं प्याखंयात व्यवस्थित रुपं क्यनेत, उचित तरिकां च्वनेत व नयेत्वनेया व्यवस्था जुइगु कथंया सहलह क्वजिकाः थुगु ९ दँ तक दिपा काःगु परम्परायात हाकनं कथं हंकेत्यंगु दु ।

One thought on “नवदुर्गा भवानी म्हिगः येँया ग्वलय्

  • April 18, 2019 at 4:24 am
    Permalink

    I do not like to see any picture of yours as it is dirty with letters printed across the portrait.

    Reply

Leave a Reply

Your email address will not be published. Required fields are marked *