fbpx

“ध्वः छध्वः रेखां क्यूगु”- निर्देशक याैवन शाक्यनाप खँल्हाबल्हा

याैवन शाक्य । नां यक्वसिया नितिं न्हूगु जुइफू । तर उकुन्हु तिनी जूगु  चीहाः संकिपाः धेंधेंबल्लाकासाय छक्वलं स्वंगू चीहाः संकिपाः ज्वनाः थःगु पलाः चीहाः संकिपातय् न्हापांगु खुसिइ धिसिलाकेगु कुतलं दुहाँ वःम्ह युवा खः ।  अथे ला वय्कलं नेवाः युट्युबय् आबद्ध जुयाः प्यंगू चीहाः संकिपाः दय्के धुंकूगु दु । नेपालमण्डल टेलिभिजनया “बाखंचा” टिभि सिरियलय् झण्डै सात वर्ष आबद्ध जुयाः ज्या याना दी धुंकूगु अनुवभ नं दु । थुगसिइया चीहाः संकिपाः धेंधेंबल्लाकासाय् स्वंगू संकिपाः दुथ्यागु मध्यय् छगू चीहाः संकिपाः “ध्वः छध्वः रेखां क्यूगु” न्हाप लाय्त ताः लाःगु खः । व हे सन्दर्भय् वय्कःनाप यानागु खँल्हाबल्हा थन न्ह्यःब्वयाच्वना ।

-रेखा शाक्य

शर्ट मूभि धइगु गज्याःगु जुइ ? उकिइ दुने छु छु दयेमाः ?

छम्ह पात्रं थःगु उद्देश्य पूवंकेत याइगु संघर्ष हे बाखं कथं जितः ताः । प्याखं दयेकेत बाखं माः । चीहाः संकिपाया नितिं नं बाखं माः । चीहाः संकिपा लम्बाइया हिसाबं चिहाक जुइ । एकडेमि अफ मोसन पिक्चर्स आर्टस एण्ड साइन्सया ब्याख्याय् ४० मिनेट सिबें चिहाकःगु संकिपायात चीहाः सकिपा धाइ । चीहाः संकिपाया नितिं स्क्रिप्ट चिहाकलं च्वइ । मू पात्रपिनिगु संख्या कम जुइ । पात्रया चरित्र चित्रण वा म्हसिका कम इलय् हे विइमालिगु जुयाः पात्रया लं, थाय्, छ्यलाच्वंगु हलंज्वलं, भावभंगिमाया बाँलाक प्रस्तुत यायेमाःगु आवश्यकता दइ ।

मूपात्रं थःगु उद्देश्य पूर्ति यायेत याइगु संघर्ष व द्वन्द्वया श्रृँखला ताहाक वा यक्व दयाच्वनि मखु । चीहाः संकिपातय् धाये त्यनागु खँ वा क्यने त्यनागु खँ सिधा व स्पष्ट धायेगु याइ, अप्व यानाः उपकथातय्गु सहारा कयाच्वनी मखु । कम इलय् विषयबस्तु न्ह्यब्वये माःगु कारणं सिर्जनसिलता व मेहनत नं उगु कथं हे आवश्यक जुइ । चीहाः संकिपाया उद्देश्य व सन्देश स्पष्ट जुइमाः ।

न्हापांगु खुसिइ शर्ट मूभिइ धें धें बल्लाखय् ब्वति कयागु ई या अनुभव व ज्या यानागुया तयारीया बारे ?

धें धें बल्लाखय् जिं ब्वतिकयागु थ्व न्हापांगु पटक खः ।  जि नेवाः युट्युबय् आबद्ध जुयाः प्यंगू चीहाः संकिपा दय्के धुनागु खः । अले नेपालमण्डल टेलिभिजनया “बाखंचा” टिभि सिरियलय् झण्डै सात वर्ष आबद्ध जुयाः ज्या यानागु खः । नेपालभाषा चिहा सकिपा कासाया खँ वःबले ब्वति कायेगु मतिइ वल । निर्देशन क्यामेरा व सम्पादन नं थःम्हेस्या यायेगु जूगुलिं यायेफइ धइगु आँट वःगु खः । नेवाः युट्युबया दाजुपिं सुजिब बज्राचार्य व उमेश स्थापितपिं नाप सुझाब कयाबले ब्वति कायेत हपाः वियादिल ।

थुगुसिइ नेपालभाषाया प्रकाशित साहित्यया आधारय् चीहाः संकिपा दयेकेमाःगु थिम जूगुलिं बाखं मालाबलय् सन्देशमूलक जुइमाः धइगु खँय् ध्यान तया । जितः विश्वास यानाः शशिकला मानन्धर ततां व राज महर्जनं वय्कःपिनिगु बाखँनय् चिहा संकिपा दय्केगु स्वीकृति बियादिल । थुगुसिइ जिं स्वंगु चिहा संकिपा दयेकाः ब्वति कयागु खः ।

शशिकला मानन्धर तताया “ध्वः छध्वः रेखां क्यूगु” अले राज महर्जनया “ह्याउँगु हि”“आस्था” । “आस्था” राज महर्जनजुया प्रकाशित चिनाखँ “च्यानाच्वंगु पाल्चाय्” आधारित खः । बाखँया स्क्रिप्ट नं च्वमिपिसं हे च्वयाब्यु बलय् जितः गाक्क हे अपुल । च्वमिपिं नाप सहलह यानाः पात्रयात ल्वःम्ह कलाकार चयन याना। अले कलाकार, च्वमि व मेंपिं ग्वाहालिमिपिं नापं च्वनाः सहलह व वर्कशप यानागुलिं कलाकारपिन्त पात्रया चरित्र जीवन्त यायेत अपुल ।

जितः विश्वास यानाः सिनियर कलाकारपिं सुरज ब्यञ्जनकार दाजु, सरस्वति मानन्धर तता, प्रबोध कसाः दाजु, सुरेन्द्र तापाख्यमि दाजु, महेन्द्र प्रजापति दाजुपिसं संकिपाखय् अभिनय यायेत तयार जुयादिइगुलिं वय्कः हनेबहपिन्त जिं सुभाय् मब्युसें मगाः । मेपिं कलाकारपिं प्रेमा शाक्य, रोजिना सुवाल, सरीता बज्राचार्य, पुजा महर्जन, रनेन्द्र महर्जन, विनेस श्रेष्ठ, धर्मदेव महर्जनपिं थ्व सिबें न्ह्यःया जिं दयेकागु चीहाः संकिपातय् अभिनय यानादी धुंकुपिं हे जुल ।  जिगु ज्याय् हाकनं छक्व विश्वास यानादिइगुलिं वय्कःपिन्त सुभाय् । पूर्णकाजि महर्जनजु ला कलाकार नाप व्यवस्थापनया मू भाला कयादिइम्ह हे जुल । अले “ध्वः छध्वः रेखां क्यूगु”या नितिं थःगु म्ये छ्यलेगु स्वीकृति बियादिइगुलिं रेखा शाक्य ततायात नं यक्व यक्व सुभाय् बियाच्वना ।

स्वंगुू संकिपा छक्वलं दयेका च्वनागुलिं बाखँ च्वमिया भावनायात आत्मसात याये फइ कि मफइ धइगु खँय् जिके ग्या चिकु दूगु खः । संकिपाया प्रिभ्यु वय्कःपिन्त क्यनाबले वय्कःपिं सन्तुष्ट जूगु खनाबलय् जिके छगू कथं थःम्ह यानागु ज्याय् न्याये याये फत ला धइगु भावना ब्वलन । तर बाखं च्वमिया जक मन लय्ताय्वं स्वकुमिया नुगः त्याके फइ मफइ व ला ल्यं दनिगु खँ हे जुल ।

This slideshow requires JavaScript.

शर्ट मूभिया बिकास गुकथं झीगु नेवाः ख्यलय् दुहां वल ?

नेपालभाषाय् चिहा संकिपाया विकासया नितिं जस विइगु खःसा पबित्र कसाः दाजुयात बिइमाः । वय्कःया टिमय् मेपिं नं दु, तर नेतृत्व वय्कःया हे खः । मच्छिन्द्र क्लबं पबित्र कसाः दाजुया नेतृत्वय् येँया जात्राया इलय् नेवाः सकिपा नखः ग्वसाः ग्वयावयाच्वंगुलिं, चिहा संकिपा क्याटेगोरी नं दुथ्याकल । न्हापांगु चिहा संकिपा कासा हे आयोजना यानादिल ।

वंगु दँय् चीहाः संकिपा कासाय् १० गू चीहाः संकिपाः दुथ्यात धइगु न्यना । प्यला ति न्ह्यः नेवाः चीहाः सकिपा नखः धकाः निन्हु यंक यानाः ३२ गु चीहाः संकिपा क्यने, स्वये ज्या जुल । थुगुसिइया कासाय् १६ गू चीहाः संकिपा दुथ्याःगु जुल । नेवाः चीहाः संकिपा मेमेगु कासाय् नं ब्वति कयाः प्रशंसित जुइगु जुयावयाच्वंगु झीसँ खनाच्वना । नेवाः चीहाः संकिपा अन्तराष्ट्रिय मञ्चय् नं प्रदर्शन यायेफइगु अवस्था ब्वलना वइ धइगु खँय् जितः विश्वास दु । थुकिया नितिं बिधागत प्रशिक्षण व सेमिनारया आयोजना जुइमाःगु आवश्यकता जिं खना ।

थम्ह दयेकागु शर्टमूभिया बाखँया छुं छुं खँ व उद्देश्य ?

जिं दयेकागु स्वंगू चीहाः संकिपा मध्यय् शशिकला तताया बाखं व स्क्रिप्टया “ध्वः छध्वः रेखां क्यूगु” छगू नं खः । बिधवा मिस्तय्सं तुयुगु सारी सिनिगु, तर कला मदुपिं मिजंतय्सं छुं हे यायेम्वाःगु बिभेदया अवस्थाया चित्रण जुयाच्वंगुलिं जि थुगु बाखं प्रति आकर्षित जुयागु खः । थुकिइ छम्ह विधवा मिसां समाजया मिसाप्रतिया विभेदकारी परम्परायात समाजया नामय् व मतिनाया नामय् निर्वाह यायेत स्वइगु मिसा मनोबिज्ञान दु , तर समाजया पहचह खनाः परम्परायात हाकुतिना हाकनं सामान्य जीवन म्वायेगु निर्णय याःगु खँ दुथ्यानाच्वंगु दु । छगू कथं धायेगु खःसा मिसा विद्रोहया बाखं खः थ्व । थ्व प्याखनं मिसा मिजं समानताया आवश्यकता दु धइगु सन्देश विइत स्वःगु दु ।

मेगु चीहाः सकिपा राज महर्जनज्युया बाखं व स्क्रिप्टय् “ह्याउँगु हि” खः । थुगु प्याखनं थीत्यः मत्यःया क्वपुलाःगु परम्परायात भण्डाफोर याःगु दु । हि दक्वसियागु ह्याउँगु हे जुइगुलिं न्ह्यागु जाति सम्प्रदायया जूसां मनूत समान खः धइगु सन्देश बिइत स्वयागु दु ।

मेगु चीहाः संकिपा राज महर्जनजुया चिनाखँ “च्यानाच्वंगु पाल्चाय्” आधारित खः । येँया जात्राय् उपाकु वनेगु इलय् पाल्चा च्याकाः लँय् त्वःता थकुगु खनाः राज महर्जनजुं कन्सेप्ट दयेकाः जि नाप सहलह यानादिल । अले “आस्था” या स्क्रिप्ट तयार जुल । मनय् आस्था दत धाःसा ल्वहँतय् नं मनूतय्सं द्यः खनिगु धइगु बाखं खः थ्व, नापं गन जः दइ अन द्यः दइ धइगु सन्देश नं दु ।

ब्वति काःगु दक्व शर्ट मूभि गथे ताल ?

ब्वति कयादिइपिं सकलस्यां मेहनत बांलाक हे याःगु खनेदु । विषयबस्तुया हिसाबं नं विविधता खना । तर छुं छुं चिहा संकिपातय् स्क्रिप्टय् भचा मेहनत यायेफुगु जूसा बांलाइ थें ताल । छुं छुं संकिपाया स्क्रिप्ट दबु प्याखं नाटकया स्क्रिप्ट थें ताल, गुकिं यानाः स्याच्चूगु विषयबस्तुया प्रस्तुति उलि सशक्त जुइ मफूगु थें जुयावन ।

छुं छुं सकिपातं वियाच्वंगु नकारात्मक सन्देश जिं बांला ताय्के मफुत । छुं छुं सकिपातय् प्राविधिक पक्ष भचा सुधार जूसा अझ बांलाइगु खःला थें ताल । प्राविधिक पक्षया हिसाबं म्युजियम स्वयाः जि प्रभावित जुया । अभिनयया ल्याखं यक्व हे बांलागु प्रतिभा स्वयेखन । सय्के सिइकेगु हिसाबं जिगु नितिं थुगु संकिपा कासा यक्व हे उपलब्धिमूलक जूगु तायेका च्वना ।

आः वइगु दिनय् मेपिन्सं नं ब्वति कायेगु बिचाः यात धाःसा छु छु तयारी यानाः वयेगु सुझाब बियादी ?

मेगु दँय् अझ बांलागु सशक्त चीहाः संकिपा स्वये खनिगु आशा यानाच्वना । न्ह्यागु हे कथंया संकिपा जूसां स्क्रिप्टय् मेहनत याये हे माः । अन लिपा पात्रयात ल्वःपिं कलाकार चयन याये माल । लोकेशनया छनोट वहे कथं यायेमाल । प्राविधिक पक्षया तयारी नं उकथं हे याये माल । चीहाः संकिपा दय्केगु टिम वर्क जूगुलिं दक्व नापं च्वनाः दक्व पक्षय् दुग्यंक सहलह याये माल । विषयबस्तु ल्यय्बले समाज दुनेया समस्या कःघानाच्वंगु समसामयिक सन्देशमूलक जूसा अझ बांलाइ, नकारात्मक सन्देश विइगु ज्या यानामदिइसा ज्यू थें ताः ।

शर्ट मूभिइ म्ये दुथ्याकेगु प्रथा ठीक वा छु दु उकिया बारे थःगु बिचाः ?

म्ये दये हे माः धैगु अनिवार्यता संकिपाया नितिं नं मदु , चिहा सकिपाया नितिं नं मदु । म्ये दये हे मज्यु धइगु निषेधाज्ञा संकिपाया नितिं नं लागु जुइ मखु, चिहा संकिपाया नितिं नं लागु जुइ मखु । म्ये या बारे अनिवार्यताया वकालत यायेगु वा निषेधाज्ञा जारी यायेमाःगु फरमान बिइगु धइगु पाय्छि मखु, पुर्वाग्रह तयाः धायेबलय् ला न्ह्याग्गु धाःसां जिल । गबलें गबलें तःगु अवस्थाय् संगीत वा म्ये पाखें पात्रया मनोभावना न्ह्यब्वयेगु ज्याय् गुहालि कायेफइ । म्ये तयेगु मतयेगु निर्णय उकिं निर्देशकया खः । थुगुसिइ “ध्वः छध्वः रेखां क्यूगु” चिहा संकिपातय् “ध्वः छध्वः रेखा”या धइगु म्येया छगू टुक्रा तया । उकिइ विद्रोह याये न्ह्यःया पात्रया मनोभावना प्रस्तुत यायेत म्ये पाखें गुहालि जुइगु महसुस जूगुलिं जिं छ्यलागु खः ।

Leave a Reply

Your email address will not be published. Required fields are marked *