fbpx

धरानय् यःमह्री दयेकेगु तालिम क्वचाल

रेखा शाक्य । झीगु सम्वाददाता

धरान । थिंला गाः अष्टमी ११४०

धरानय् यःमह्री दयेकेगु तालिम क्वचाःगु दु । नेवाः देय् दबू, धरानया ग्वसालय् व सिद्धि नेवाः परिषद् धरानया व्यवस्थापनय् सम्पन्न यःमह्री दयेकेगु तालिमय् १० म्ह मिजं व ४० म्ह मिस्त याना जम्मा ५० म्हसिन ब्वति काःगु खः ।

किपाः गुहाली मनाेहर शाक्य

थ्व हे पौष ९ गतेनिसें धरानया छाता चौकय् ४ न्हू तक न्ह्याइगु च्याक्वःगु यःमह्री सांस्कृतिक तथा पर्यटन उत्सवया नितिं यक्वः यःमह्री दयेके माःगु हुनिं यानाः थुकथं यःमरी दयेकेगु प्रशिक्षणया ग्वसाः ग्वयागु खँ थुम्ह पंक्तिकारयात नेवाः देय् दबू धरानया अध्यक्ष मनोहर शाक्यं जानकारी बियादीगु खः ।

किपाः गुहाली मनाेहर शाक्य

थौं बिहीबाः सिद्धि नेवाः परिषद् धरान ७ या सभाहलय् स्यनेज्या क्वचाःगु दु । नेवाः देय् दबूया केन्दिय दुजः लक्ष्मी शाक्यं प्रशिक्षण ब्यूगु खःसा प्रशिक्षणय् गुहाली कथं नेवाः देय् दबूया प्रदेश १ या कोषाध्यक्ष चन्द्र हलुवाई च्वनादीगु खः ।

नेवाःतय्गु मौलिक नखःया नसात मध्ये थी थी परिकारय् नं यःमह्रीया थःगु हे बिशेष महत्व दु । थुगु यःमह्री दयेकेगु धइगु नं छगू कथंया नेवाः कला खः गुकियात दयेकेत धैर्यता व ल्हाःया कौशलता माःगु खँ सिद्धि नेवाः परिषद् धरानया नायः गोकुल प्रसाद श्रेष्ठं धाःगु दु ।

न्हापा लिपा नं थुकथं हे यःमह्री महोत्सवय् यःमह्रीया माग कथं मनूतय्त तयार याना बिइमफुगुया कारणं थुगसि थुकथं आपालं धरानया स्थानीय नेवाःतय्त प्रशिक्षण बिउगु खः । थुगसि यःमह्री दयेकेगु जक मखसें गुणस्तरय् नं ध्यान बिइगु धाःगु दु ।

नायः शाक्यं थुम्ह पंक्तिकारनाप खँ ल्हायेगु झ्वलय् धरानय् नेवाः तजिलजि व संस्कार व संस्कृतिया बिकास यायेत सांस्कृतिक धिमे, बाँसुरी, चर्या नृत्य, लाखे नाच लगायतया स्यनेज्या यानाः धरानया नेवाः स्थानीयबासीपिन्त भावनात्मक रुपं नं नेवाः एकताया म्हसिका ल्यंका तयेमाः धकाः इलय्ब्यलय् थी थी स्यनेज्याया ज्याझ्वःत नं यानावयाच्वंगु दु ।

धरानय् नेवाःतय्गु अवस्थायात कयाः न्यनागु न्ह्यसलय् वय्कलं धयादी – “धरानय् नेवाः समुदाय् आपालं दु । अय्नं नेवाः समुदाय थःगु हे म्हसिकाय् लिकुना च्वंगु दनि । उकिं वइगु दिनय् नेवाः समुदायस संस्कार व संस्कृतिइ जक झी तक्यना मगाः राजनैतिक जागरण य् नं उलि हे सक्षम जुइमाःगु थौंया आवश्यकता खः । यःमह्री उत्सवया ग्वसाः ग्वयागुया लिउने सुलाच्वंगु भावना धयागु नेवाः संस्कार व संस्कृति भावि पुस्तायात हस्ताण्तरण यायेगुलि छगू पहल जक खः । बिशेष याना नेवाः त स्वनिगलं पिने च्वंपिन्सं थःगु नेवाः म्हसिका, भाय् व मौलिक नखःचखःयात ल्यंका तयेमाःगु खनेदु । थथे जुल धाःसा जक नेवाः न्ह्याथाय् वंसां च्वंसा नेवाः हे जुइ । ”

नेवाःतय् बिशेष यानाः न्हूगु बाली दुकाये धुंकाः हनेगु नखः कथं यःमह्री नखः हनेगु चलन दु । यःमह्रीइ बिशेष याना चाकु व हाम्वः तया दयेकीगु खःसां स्वाद अनुसार खुवा, माय् तया नं दयेकेगु याइ अले उत्सवय् उकथं हे थी थी सवाःया यःमह्री दयेकेगु खँ नेवाः देय् दबूया केन्द्रिय सल्लाहकार सरला कायस्थं धाःगु दु ।

नेवाःतय्गु मौलिक परिकार यःमह्री केवल नसाया रुपय् जक मखसें झीगु नेवाः संस्कृतिइ नं महत्वपूण रुपं कयातःगु दु । बिशेषयाना तःतधंगु पूजाआजा, मचा जंकु, निदँबुदिं, प्यदँ बुदिंबलय् यःमह्री दयेकेमाःगु परम्परा दु ।

किपाः गुहाली मनाेहर शाक्य

Leave a Reply

Your email address will not be published. Required fields are marked *