fbpx

थिमिया श्री पद्मपाणी लोकेश्वरया जात्रा क्वचाल (१३ पा किपाः सहित)

रेखा शाक्य । झीगु सम्वाददाता

थिमि ।  तछलाथ्व अष्टमी ।

थिमिया श्री पद्मपाणी लोकेश्वरया जात्रा वंगु सिथिनखः कुन्हु बहनी बाजागाजा सहित झः झः धायेक जात्रा याना क्वचाय्कुगु दु ।

किपाः रेखा शाक्य

वंगु तछला थ्व पारु कुन्हु थिमिया मरुत्वाःया देगलय् विराजमान जुया च्वनाबिज्याम्ह करुणामययात जीव न्यास लिकासें न्हवं याःगु खः ।
न्हवं याये न्ह्यः विधिविधान कथं सम्पूर्ण पुजाविधि यानाः थिमिया बज्राचार्यपिन्सं जीव न्यास लिकयाः सिजःया तःग्वःगु वरुणकलशय् करुणामयया जीव न्यास तःगु खः । उगु हे इलय् पःमाय्या आज्ञा काःसें मू पुजारी छम्ह व पालाया प्यम्ह पुजारीपिन्सं देगः न्ह्यःने च्वंगु मण्डपय् करुणामययात विज्याकाः सिजःया कलशं पन्चामृत सहितं धलिं लुगु खः ।

किपाः रेखा शाक्य
किपाः रेखा शाक्य

धलिं लुइगु ज्या क्वचाय्काः द्यःयात तुयुगु कापतं भुंकाः चिधंगु खतय् तयाः जिस्वां बहालय् बिज्याकुगु खः । अन नं पाला नं लसकुसयानाः बिज्याकालि द्यःया मेगु आसनय् विराजमान याकुगु खः ।

किपाः रेखा शाक्य

अन लिपा तृतीया कुन्हु लँपु छाय्गु ज्या क्वचायेकुगु खःसा कन्हे कुन्हु दशकर्म पुजाया दक्वं विधि कथं मचा बु ब्यंकेगु, जंकु यायेगु, इहि यायेगु, बह्रे छुइगु आदि इत्यादिया पुजा होम यानाः पूवंकुगु खः । पुजाया विधि कथं हे वरुणकलशय् च्वंगु जीवयात लिकया हाकनं श्री करुणामययात जीव न्यास तयेगु ज्या क्वचायेकुगु खः ।

किपाः रेखा शाक्य

थुकथं सम्पूर्ण पुजा विधि क्वचाय्के धुंकाः हाकनं द्यःयात मेगु खतय् तयाः कन्हे कुन्हु सुथ न्हापां जीस्वां बहाःया पिनेसं च्वंगु पाटीइ तये हःगु खः । थ्व दिं कुन्हु सिथि नखः जुगुलिं सम्पूर्ण थिमिया स्थानीयवासीपिन्सं नैवद्य तयाः पुजा याःगु खः ।  नापनापं सकल थिमिया स्थानीय थासय् दुगु हिति मंगाः तुँ व लःया मुहानयात नं सफायाना पुजा आजा याःसें सिथि नखः हंगु खः ।   थथे सिथिनखः कुन्हु सर्वसाधरणयात दर्शन बिइगुया लिसें बहनी जात्रा समेत याइगु जुगुलिं थिमिया स्थानीयवासीपिन्सं थुम्ह करुणामययात सिथि द्यः वा लोकना द्यः नं धायेगु याः ।

किपाः राजा राम

जात्राया दिं कुन्हु न्हिनेनिसें उगु लागाय् भजन कृतनया लिसें स्थानीय धिमे बाजंत नं जात्राय् सरिक जुइगु खः । बहनी द्यःयात हाकनं खः समेत जात्रा यानाः थःगु हे देगलय् लसकुस यासें बिज्याकुगु खः ।

किपाः राजा राम

जुजु बलदेवं थापना याःगु अनुमानित दँ ११५२ पुलांगु धइगु खँ अमोघवज्र बज्राचार्यया अष्टोत्तर लोकेश्वरया परिचय पिथना तःगु उगु ईया सफुतिइ थुम्ह करुणामयया बारे च्वया तःगु दु । अथेहे थिमि करुणामययात लोकनाथ धकाः महारानी गंगादेवी ठाकुरनीया वंशावलीया ताडपत्रय् ने सं ६८५ दँ कार्तिक चौथि दिन कुन्हु करुणामय् थापना यानागु जुल धकाः च्वयातःगु खनेदु ।

किपाः रेखा शाक्य
किपाः रेखा शाक्य
किपाः रेखा शाक्य
किपाः रेखा शाक्य
किपाः राजा राम

Leave a Reply

Your email address will not be published. Required fields are marked *