fbpx

थिमिइ १३ दँ लिपा ख्वपया नवदुर्गा देवगण

ने सं ११३९ थिंलाथ्व सप्तमि

रेखा शाक्य

थिमिइ ख्वपया नवदर्गा देवगणया प्याखं ल्हुइकिगु जूगु दु । थुकथं थिमिइ ख्वपया नवदुर्गा देवगण १३ दँ लिपा बिज्याके त्यंगु खः । थिमिइ वि सं २०६३ सालंनिसें छुं छुं हुनिंयाना नवदुर्गा प्याखं हुइके महःगु खः । तर थुगुसी थिमि नगरपालिकाया प्रमुख मदनसुन्दर श्रेष्ठ व वडा नं ४ या अध्यक्ष कुमार श्रेष्ठया कुतलं हाकनं छक्वः थ्व परम्परा कथंह हनेत्यंगु दु ।

वइगु यःमह्रि पुन्हिया सनिलय् सकलें देवगण थिमिया दिगु त्वालय् बिज्याइ । थथे थिमिइ वयेगु परम्परा न्हापांनिसें दुगु खः । देवगण सकलें छवाःया नितिं थिमिया बालकुमारी पुखूलिक्कया फल्चाय् च्वनेगु याइ । छवाः तक च्वंसां प्यन्हु जक द्यः वसतं पुनाः द्यः ब्वाकेगु प्याखं हुलिगु चलन दु । थिमिइ वःगु लिपांगु दिं कुन्हु ईकुडोलय् सुथय् हे मुकुट मपूसें दकलय् यःम्ह बां फायात लिइगु याइ । अथेहे सनिलय् लोकेश्वर करुणामय् विराजमान दुगु थासय् महाकाली व सिथि भैलया प्याखं क्यनीगु याइसा सिथि भैलपाखें न्या लाकेगु प्याखं नं हुइकी ।

दकलय् लिपा बालकुमारी द्यगः लिउने नासः द्यःयाथाय् प्याखं हुया ख्वपय् हे लिहाँ बिज्याइ । न्हापान्हापा दँय्दसं थथे ख्वपया नवदुर्गा प्याखं देशं पिने यंकेगु चलन खःसां आपालं थासय् विभिन्न कारणं याना मयंकेगु याना हःगु खः ।

Leave a Reply

Your email address will not be published. Required fields are marked *