fbpx

जेष्ठया २६ गते प्वाकलं क्यनीगु (१६ किपा सहित)

रेखा शाक्य । झीगु संवाददाता

यल ११३९ बछला गाः पंचमि । नेपाःया हे दकलय् तःहाकःगु जात्रा धयातःगु बु‌ंगद्यःया जात्राया अन्तिम दिं कथं काइगु भ्वत क्यनेगु जात्रा अथवा जावला जात्रा वइगु जेष्ठ २६ गते जुइगु जूगु दु ।

श्री करुणामय बुँग द्यःया साइत स्वयेगु ज्या थौं मगंलबजाःया फल्चाय् ज्योतिष व सम्बन्धित व्यक्तिया लिसें सर्वसाधारणया दथुइ जुयाः उगु दिं क्वःछिउगु खः । साइत कथं निगुलिं रथ आः वइगु तछलाथ्व तृतीया अर्थात जेष्ठया २३ गते विहिबाः क्वःजिउगु दु । उगुकथं  जाह्वलाख्यलय् थ्यंगुया प्यन्हुलिपा अर्थात जेष्ठया २६ गते प्वाकलं क्यनीगु जुइ ।

दकलय् ताःहाःगु जात्रा कथं नालातःगु बुंगद्यःया जात्रा वंगु बछला थ्वः पारु कुन्हु चोभाःया कटुवाल दहलं पांजुया लिसें आचाजु व गुरुजुपिन्सं वहःया कलशय् पूजाआजायाना भम्बया रुपय् बिज्याकालि मलिनीनं प्वाथय् जनिया लिधंसाय् घानाः यलया तःबहालय् विधिवत रुपं बुंगः द्यःयात बिज्याकूगु खः ।

व हे दिनय् दशकर्म पूजा क्वचायेकाः सनिलय् गरुजुया पल्टन व काहाबाजंया लिसें स्थानीय बाजागाजा थानाः बुंग द्यःयात चिधंगु खतय् तयाः पुच्वःय् तयार याना तःगु ३२ लक्षणयुक्त १३ गू तल्लाया ताःहाकगु रथय् विराजमान याकूगु खः ।

किपा रेखा शाक्य

वयां प्यन्हु लिपा चौथी कुन्हु बुंग द्यःयात पुच्वं विधिवत रुपं रथ सालेगु ज्या जूगु खः । थ्व न्हापांगु दिं कुन्हु हे चाकुबहाः द्यः पुच्वःय् बुंगः द्यःयात लँस्वः बिज्यागु खः । वयां लिपा बुंगः द्यःया रथ लिउने लाकालि निगुलि रथयात गाः बहाः थ्यंकाः याः न्यायेकूगु खः ।

किपा रेखा शाक्य

थ्व हे दिं कुन्हु यलया रत्नाकर महाबिहारस द्यःछेँ विराजित यल कुमारी नं लुखा पिनसं बिज्यानाः बुंगः व चाकुबहाः द्यःया रथयाना नजर यायेमाःगु परम्पराकथं स्वः बिज्याःगु खः ।

किपा रेखा शाक्य

अथेहे पंचमी कुन्हु गाः बहालं मंगलबजाः तक रथ सालेगु ज्या जूगु खःसा षष्ठी कुन्हु मंगलं लुँहिटी तक रथ साला याः न्यायेकुगु खः । अष्टमी कुन्हु लुँहिटी चक्रबही तक द्यः सालेगु ज्या जूगु खःसा नवमी कुन्हु लगंख्यः थ्यंकाः मांसिमा छचाः चाःहुइके क्वचायेकुगु खः ।

किपा रेखा शाक्य
किपा रेखा शाक्य

एकादशी कुन्हु सुथय् बौ बिइगु ज्या जुल सा  लगंख्यलं मांसिमा निचाः चाहुकेगु ज्या सम्पन्न यानाः निगुलिं रथयात थति त्वाः तक सालाः याः न्यायेकुगु खः ।

किपा रेखा शाक्य

रथ सालेगु परम्परा व विधिविधान कथं द्वादशी कुन्हु सनिलय् नैंक्यालं लुइगु ज्या जूगु खःसा त्रयोदशी कुन्हु सुथ न्हापालं याकः मिसायाः भुयाः धकाः मिसापिन्सं रथयात साला प्यकालँपुइ तक थ्यंकूगु खः ।

किपा रेखा शाक्य

श्री करुणामय, सहकालया द्यः, अन्नदाता व चाकुबहाः द्यः वा मीननाथयात रथजात्रा जुइगु इलय् यलया जीवित कुमारीया नं उपस्थिति महत्वपूर्ण कथं हे दयाच्वनी । गुकिं यानाः मां सिमा चाःहिकेगु दिनय् लगंख्यःया कुमारी फल्चाय् अथेहे इति त्वालं जाह्वलाख्यः साला यंकेगु इलय् कुमारीपाटी अले जाह्वलापिसा अर्थात प्वाकलं क्यनेगु दिं कुन्हु उगु हे ख्यलय् दुगु कुमारी फल्चाय् बिज्याये माःगु परम्परा दु ।

 

 

 

 

 

 

 

 

बौद्धमार्गी, हिन्दू, बैष्णवी व शैव (नाथ सम्प्रादय) यापिन्सं  तकं थःथःगु कथं हनाः वयाच्वंम्ह बुंगद्यःया प्वाकलं जात्रा क्वचायेवं तःधंगु खतं क्वकयालि हाकनं चिधंगु खतय् विराजमान याकीसा उखे चाकुबहाः द्यः थःगु हे रथय् च्वना टंगलय् बिज्याइ । व हे सनिलय् पांजुपिन्सं श्री करुणाध्यान बुंग द्यः क्वबिया बुंगय् बिज्याकी ।

 

थथे बिज्याःगु इलय् भक्तजनया लिसें लँपुइ जवंखवं दनाच्वनिपिं धर्मावलम्बी अले बुंगया स्थानीयवासीपिन्सं तकं छ्वालीप्वाः च्याकालि लँ स्व वनिगु खः । (थथे लँस्वः वनेगु इलय् लाक्वः पाक्वः म्हुतु वायेगु न्हापा दूगु खःसा आः धाःसा अथे मयाये धुंकल)  बुंग थ्यंकाः वसपोल करुणामययात लसकुस यानाः दुत बिज्याकाः थःगु हे आसनय् विराजमान याइ । अले प्यन्हु दयेकाः सकल भक्तजनपिं प्यन्हु बिचाः पुजा धकाः बुंगय् हे वनाः द्यःया पुजाआजा याये सिधयेवं थुगु दँया बुंग द्यः जात्रा विधिवत रुपं क्वचाइ ।

 

किपा रेखा शाक्य । पुच्वःय् रथ दयेका च्वंगु ।
किपा रेखा शाक्य । बुंग द्यःया रथ मंगलं लुँहिति सालेगु झ्वलय् ।
किपा मनिष शाक्य । याकः मिसा भुयाः कुन्हु इतित्वालय् मय्जपिं रथ सालाच्वंगु ।

 

किपा रेखा शाक्य । इतिं जाह्वलाख्यः रथ सालेगु झ्वलय् चाकुबहाः द्यः

 

किपा रेखा शाक्य । प्वाकलं क्यना च्वंगु ।

 

किपा रेखा शाक्य । प्वाकंल क्यने ज्या क्वचायेकाः बुंग विज्याकेगु झ्वलय्

 

किपा रेअञ्जु शाक्य । प्यन्हु बिचाः पुजाया झ्वलय्

Leave a Reply

Your email address will not be published. Required fields are marked *