fbpx

जैशीदेवल युथ क्लबया १७ क्वःगु साधारण सभा क्वचाल

रेखा शाक्य । झीगु संवाददाता

बछला गाः चह्रे। येँ

म्हिगः येँया जैशीदेवल युथ क्लबया १७ क्वःगु साधारण सभा क्वचाःगु दु । नेपाल तेक्वान्दो संघ प्रदेश नं ३ या महासचिव तकं जुयादीम्ह राजेश प्रजापति थुगु क्लबया नायः पदय् निर्विरोध निर्वाचित जूगुया लिसें क्लबया सकलें पदाधिकारीपिं तकं निर्विरोध निर्वाचित जूगु दु ।

जैशीदेवल युथ क्लबया सल्लाहकार तथा नेपाल चलचित्र संघया उपाध्यक्ष मधुसुदन प्रधानया संयोजकत्वय् राजेश शर्मा व हरिश्वरमान रंजितया छगू निर्वाचन समिति गठन याःगु खः । उगु हे समितिं नायः पदय् प्रजापतिया लिसें महासचिव चन्द्रगोपाल प्रधान, सचिव हितेश कारंजित, कोषाध्यक्ष गिरीधर मान श्रेष्ठ, कार्यकारणी दुजःपिं प्रमेश बहादुर श्रेष्ठ, प्रविन कर्माचाय, राजेन्द्र मानन्धर, भरत कारंजित, ज्ञानिक मान दिपंकर व तिर्थ राईयात निर्विरोध रुपं ल्यःगु खः ।

किपा रत्न मन

समाजय् थुगु क्लबं माःगु इलय् माः कथंया सामाजिक ज्या, धर्मकर्म व परम्परा, सांस्कृतिक जात्रा पर्व, सम्पदा संरक्षण यायेगुुलिइ पलाः न्ह्याकावयाच्वंगु खःसा नापनापं स्वास्थ्य शिविर, बाल प्रतिभायात प्रोत्साहन यायेत थी थी ज्याझ्वःत याना वयाच्वंगु खः ।

किपा रत्न मन

म्हिगः हे उगु समारोहस नव गठित भाउजु बुहारी पुचःया विशेष सहभागिताय् क्लबया सकल दुजःपिन्त सम्मान नं याःगु खः ।
दकलय् लिपा न्हूम्ह नायःया हैसियतं राजेश प्रजापतिं निर्वाचन कमिटीयात थःत थुगु ख्यलय् ज्या यायेगु ह्वताः बियादीगु धाःसें सम्पूर्ण जिम्मेवारीयात सकल दुजःपिनिगु सहलह कथं न्ह्याका वनेगु खँय् प्रतिबद्धता प्वंकुसें ज्याझ्वलय् उपस्थिति सकसितं सुभाय् बियादिल ।

Leave a Reply

Your email address will not be published. Required fields are marked *