fbpx

जनबहाःद्यःयात आसनय् बिज्याकल

रेखा शाक्य

येँ पोहेला गाः दुतिया ११४०

वंगु पोहेलाथ्व पुन्हिकुन्हु जनबहाःद्यःयात आसनय् बिज्याकल । वंगु पोहेलाथ्व अष्टमी कुन्हु जनबहाःस्थिति न्हवंमण्डलय् लाय्कू कुमारीया समक्ष धलिं लुइगु ज्या क्वचायेधुंकाः कन्हे कुन्हुनिसें जनबहाःद्यःया लिसें आर्यातारा व सप्तलाेचनयात नं लँपुलिं छायेगु ज्या न्ह्याःगु खः । जनबहाःया पाला गुरुजुपिं धर्मराज शाक्य व अरविन्द्र शाक्यं नरेन्द्र चित्रकारया निर्देशनय् पुन्हिया न्हिनय् तक सम्पूर्ण लँपु छायेगु ज्या क्वचायेकूगु खः ।

अन लिपा द्यःयात आसनं पिनेया प्रांगणय् तयाः मू गुरुजुपाखें दशकर्म विधिं पूजा याःगु खः । दशकर्म विधिं पुजायायेगु झ्वलय् लँपुं छायाः न्हूगु ख्वाःपा च्वयातःम्ह जनबहाः द्यःयात म्हः छम्ह क्वय्चिंया कापतं भुंका तःगु खः । पुजाया विधि न्ह्याकेया लिसें द्यःया ख्वाःपाःया उलेज्या पालापिं गुरुजुपिं पाखें यानाबिज्यागु खः ।

This slideshow requires JavaScript.

पुजा विधिया कथं जनबहाःद्यःया धलिं लुइ धुंकाः पुनरजन्म कथं मचाबू ब्यंकेगु, इहि यायेगु, बाह्रा तयेगु व बरे छुइगु सम्पूर्ण कर्मकाण्डया पुजा याःगु खः ।  जनबहाःद्यःयात याःगु उगु पुजा विधि स्वयेत भक्तजनपिं जनबहाःलय् उपस्थिति जूगु खःसा जनबहाःयापिन्सं पयेँता पुइगुया लिसें नाय्खिं बाजा नं सहभागी जूगु खः । जनबहाःद्यःया सिसापालु क्यंगु लसताय् सकलसित सिसापालु प्रसाद कथं इंगु खःसा बाह्राया संस्कारय् कःनि बरां चना छुस्यामुस्या नकूगु खः ।

दशकर्मया सकतां विधि क्वचायेकाः जनबहाःद्यःयात सदांया दुनेया आसनय् विराजमान याकूगु खःसा द्यःछेँय् हाकनं गोप्यकथं पूजाया विधि क्वचायेकूगु खः ।

आः पुन्हिनिसें प्यन्हु तक बारां छुइगु मन क्वसापिं भक्तजनपिन्सं याइसा प्यन्हु लिपा भक्तजनपिन्सं छाय्हःगु वसतं जनबहाःद्यः आर्यतारा व सप्तलोचनयात नं न्हूगु वसतं पुंकीगु गुरुजुं जानकारी ब्यूगु दु ।

थुकथं धलं दनिगु प्रक्रिया मनूतय् थें द्यःपिं नं जन्मया लिसें निर्वाण जुइगु प्रकियाये वनेमाः धइगु व्यवहारिक ज्ञान थुइकेत यानातःगु परम्परा धकाः धायेगु या ।

Leave a Reply

Your email address will not be published. Required fields are marked *