fbpx

च्वसापासाया न्हूगु ज्यासना पुचलं “श्रेष्ठ सिरपा” यात निरन्तरता बिइगु

न्हापांगु भाषिक संस्था च्वसापासाया न्हूगु ज्यासना पुचलं न्हूम्ह नायः कथं नांजाम्ह साहित्य अन्वेषक भुषण प्रसाद श्रेष्ठयात ल्यःगु दु ।

 

किपाः विजय रत्न असंबरे

वय्कःया नायःसुइ पुनर्गठन जूगु न्हूगु कार्य समितियात भिंतुना देछा ज्याझ्वः म्हीगः कालीमाटी येँ जूगु दु । ईलोहं प्रकाशनया ग्वसालय् जूगु भिन्तुना देछा ज्याझ्लय् च्वसापासाया न्हूम्ह नायः श्रेष्ठं च्वसापासाया ग्वसालय् न्हापा बिया वया च्वंगु नेपालभाषा साहित्य ख्यःया प्रतिष्ठित सिरपा छुं ई न्ह्यःनिसें दिना च्वंगु खःसां आः थःगु नेतृत्वया कार्य समितिं निरन्तरता बिया यंकेगु प्रतिबद्धता प्वंकादिगु दु ।

च्वसापासाया न्हूगु कार्यसमितिं छ्याञ्जे भरत साय्मिया नापनापं दुजलय् प्रा.नरमदेश्वर प्रधान,डा.  केशवमान शाक्य, रमेशकाजी स्थापित, डा. सर्वोत्तम श्रेष्ठ, डा.तेजरत्न कंसाकार, कवि पूर्ण वैद्य, सत्यभामा माथेमा व सुम्निमा तुलाधर प्रधानयात ल्यःगु दु ।

किपाः विजय रत्न असंबरे

थुकथं न्हूधाः जूगु च्वसापासाया न्हूगु कार्य समितियात भिन्तुना देछागु ज्याझ्वलय् पाहाँ कथं झायादीपिं प्रा. डा. चन्द्र मान बज्राचार्य, शिक्षाविद् व साहित्यकार लक्ष्मण राजबंशी, नेपालभाषा केन्द्रिय विभागया लुमन्ति दबुया नायः किरण केन रञ्जितपिसं न्हूगु ज्यासना पुचःयात
कार्यकाल सुथांलाक्क न्ह्यायेमा धकाः भिंतुना बिसें नुगःखँ तयादीगु खः ।

स्थापना कालंनिसे थौं तक्क च्वसापासां याना वयाच्वंगु गतिविधि नापं संस्थां फयावयाच्वंगु थथ्याःक्वथ्याःया विषयलय् च्वसापासाया न्हूगु ज्यासनापुचःया नायः भुषण प्रसाद श्रेष्ठं ब्याकादिल । च्वसापासायात थःगु कार्यकालय् फयांफछि सुथांलाक्क च्वन्ह्याकेगु नायः श्रेष्ठं बचं बियादिगु दु ।

बुखँ विजय रत्न असंबरे

Leave a Reply

Your email address will not be published. Required fields are marked *