fbpx

च्वमिपिं व ब्वमिपिन्त छथाय् हयाः नेपालभाषा साहित्य नखः (१९ पाः किपाः)

झीगु संवाददाता
येँ, कछलागा दशमि । नेपालभाषा साहित्य ख्यःया न्हूगु व पुलांगु पुस्ताया च्वमि व ब्वमिपिन्त छथाय् तयाः जूगु स्वकःगु नेपालभाषा साहित्य नखः थौं शनिबार क्वचाल ।
निन्हुतक्क जूगु उगु ज्याझ्वलय् न्हय्गू नेवाःभाय्या सफूया विमोचन, नेपालभाषा साहित्यया रचना पाठ, च्वमिलिसेया अन्तरक्रिया, नेपालभाषा संकियाया अवस्थायात कयाः अन्तरक्रिया आदि जुल ।

येँ महानगरपालिकाया मेयर विद्यासुन्दर शाक्यं त्वाःदेवाय् मत च्याकाः उलेज्या जूग उगु ज्याझ्वलय् खुम्ह च्वमिया न्हय्गू सफूया उले ज्या जुल । अन उलेज्या जूगु सफूत खः — मथुरा सायमिया आत्मकथा ‘सायमि जि मथुरा’, गजलकार भुषणप्रसाद श्रेष्ठया गजल मुना ‘नुगःया गुनगुन’, च्वमि साहित्यकार राजेन्द्र कुमार पुताया गजल मुना व सैद्धान्तिक खँ ‘गजलया सिद्धान्त व नेपालभाषा गजल व सुथया लिसः’, राज सायमिया जासुसी उपन्यास ‘तुयुगु अजः’, कवि बासुदेव अधिकारीया नेपाली भाषापाखें भाय् हिलातःगु चिनाखँ मुना ‘युरो स्पर्श’ व च्वमि साहित्यकार उद्धव मास्केया नियात्रा ‘छगू नन्द देसय्’ उलेज्या जूगु खः ।

उगु सफूया उलेज्या मूपाहाँ येँया मेयर विद्यासुन्दर शाक्य, नेपालभाषा एकेदेमिया चान्सलर चित्तरञ्जन नेपाली, नेपालभाषा मंकाः खलःया नायः जनकवि दुर्गालाल श्रेष्ठ, किपू नगरपालिकाया मेयर रमेश महर्जन व मंकाः खलःया न्वकू मल्ल के। सुन्दरपिन्सं यानादीगु खः ।

ज्याझ्वलय् नवासें मेयर शाक्यं येँया थःगु पहिचान धइगु हे नेवाःत व नेवाःभाय् जूगुलिं थः पदय् दतले नेपालभाषा ख्यःया उत्थान यायेत माःगु फूगु तक यानावनेगु बचं बियादिल । लिसें वय्कलं नेपालभाषा मंकाः खलःया छेँया जग तयेगु ज्या तकं जुइधुंकूगुलिं माःगु प्रक्रिया पुवंकाः याकनं हे आः वइगु निदँत्या दँ दुने छेँ हे धस्वाकेत इनाप नं यानादिल ।

This slideshow requires JavaScript.

सफूया बारे नवायेगु झ्वलय् नेपालभाषा सहित्य ख्यलय् पिदंगू न्हय्गुलिं सफुतिं साहित्य ख्यःयात तःचाकः याःगु जक मखु, ब्वमिपिन्त न्हून्हूकथंया सवाः बिउगु खँ कनादिल ।

अथे हे जनकवि दुर्गालाल श्रेष्ठं नेवाःतय् दुने कविता बाचन जुइबलय् न्यनामिपिं लिसे भावनात्मक सम्बन्ध मदयाच्वंगु खँ कुलादिल ।

नेपालभाषा टाइम्स न्हिपौया सम्पादक लिसें साहित्य नखः ग्वसाः खलःया न्वकू सुरेश मानन्धरं लसकुस यानादीगु उगु ज्याझ्वलय् सभापति कथं ग्वसाः खलःया कजि साहित्यकार रमेशकाजी स्थापित च्वनादिइगु खः ।

उलेज्या व सफू विमोचन धुंकाः आः रञ्जना लिपियात गथेयानाः संरक्षण व प्रचार प्रसार यायेफइ धइगु विषयय् नेपाल लिपि गुथिया दुजःपिंलिसे अन्तरक्रिया जुल । निरञ्जन तवः, आनन्द महर्जन, सुनिता डंगोल व सुयोग्य ताम्राकारपिन्स ब्वति कयादीगु उगु ज्याझ्वलय् निर्मल बज्राचार्य सहजकर्ता कथं च्वनादिइगु खः ।
वयांलिपाया सत्रय् न्हूपिं व पुलांपिं साहित्यकारपिन्सं थःथःगु चिनाखँ, बाखँ, च्वखँ इत्यादी ब्वनेज्या यानादिल ।

ज्याझ्वःया लिपांगु ब्वय् सांगीतिक ज्याझ्व तयातःगु खःसा वयांलिपा ख्यालः नं क्यनेज्या जुल ।

आइताबारया न्हापांगु सत्रय् उपन्यासकार मथुरा सायमिलिसे च्वमि राजेन मानन्धरं वय्कःया साहित्यिक यात्रायात कयाः अन्तरक्रिया यानादिल ।

वयांलिपा भाषा साहित्यया विकासय् संकिपाया भूमिका विषयय् अन्तरक्रिया जुल । थ्व ज्याझ्वलय् विजयरत्न असंबरे, आर्यम नकःमि, ओमचरण अमात्य व आशिष्मा नकःमिं ब्वतिकयादिलसा सहजकर्ता राकेश महर्जन च्वनादीगु खः ।

अथेहे थ्वकुन्हु नं नेपालभाषाया बरिष्ठ व न्हूपिं साहित्यिक रचना ब्वनेज्या जुल ।
थुकुन्हु नं म्ये हालेगु व ख्यालः क्यनेगु ज्या जुल । म्ये हालेज्याय् यमनकृष्ण श्रेष्ठ, रानीशोभा महर्जन, रोजी डंगोल श्रेष्ठपिन्सं ब्वति कयादिइगु खः । अथे हे उगु ज्याझ्वलय् पद्मरत्न तुलाधरं च्वयादीगु व रमेशकाजी स्थापितं निर्देशन यानादीगु ख्यालः हुप्प–सयाप्प, रामकृष्ण खड्गीं च्वयादीगु व निर्देशन यानादीगु ख्यालः यमराजया ममः, अथेहे, विजय मानन्धरं च्वयादीगु व अविनाशं निर्देशन यानादीगु ख्यालः पराकम्प क्यनेज्या जूगु खः ।

येँया प्रज्ञाप्रष्ठिानया चकं दबुली जूगु उगु ज्याझ्वःया आजोजक सन्ध्याटाइम्स पिथना प्रालि खः ।

Leave a Reply

Your email address will not be published. Required fields are marked *