fbpx

“गुथि विधेयकया विरुद्ध संगठित संघर्ष यायेमाःगु दु”

झीगु संवाददाता
येँ, तछलागा नवमि । नेवाःतय्गु जीवन व संस्कृतिया आधार जुयाच्वंगु गुथि व्यवस्थायात छगू अमुक प्राधिकरणयात लःल्हायेत दयकेकूगु गुथि विेधयेयकया बारे थी थी व्यक्तिपिन्सं उकियात संगठित संघर्ष यानाः खारेज हे यायेमाः धइगु सःतल ।

थौं छगू बिचाः गोष्ठीइ नवासें समाजबादी पार्टी नेपालया सहअध्यक्ष राजेन्द्र श्रेष्ठं थुगु संविधानया मर्म विपरित जूगुलिं थ्व खारेज हे यायेमाः, मखुसा थुकिं नेवाः सभ्यतायात दूरगामी असर लाकी धयादिल ।

वयेकलं थज्याःगु संगीन इलय् नेवाःत चिचीधंगु गुटय् तमक्यँसे छधी जुयाः सशक्त ढंगं न्ह्यज्याःवनाः सरकारयात क्वथलेमाःगु आवश्यकता क्यनादिल । जनतां मयः धाल धाःसा सरकार व व्यवस्थाला क्वदली छगू विधेयक खारेज याकेमफइ धइगु खँ जुइमखु धासें वय्कलं आः सशक्त संघर्षया तयारी यायते नेवाः संघसंस्थातय्त इनाप नं यानादिल ।

किपाः रेखा शाक्य

त्रिभुवन विश्वविद्यालयया पुलांम्ह उपकुलपति प्रा केदारभक्त माथेमां थ्व विधेयक नेपाःया धर्म व संस्कृति मसिउपिन्सं जग्गा धइगु हे नाफा कमेयायेगु थाय्या रुपय् जक खंगुलिं उकथं दयेकूगु धासें थुकिं नेपाःया द्वलंद्वःदँ पुलांगु छगू सम्पदायात नाश यानाबिइ धयादिल । लिसें वय्कलं थ्व विधेयक हे यदि सुयागुं सभ्यतायात नाश यायेगु खःसा वयागु इतिहास न्हापां नाश या धइगु कुटिल रणनीतिइ च्वनाः दयेकूगु जुयाः आः गुथियात थःगु संस्कृति धाइपिं दक्वं मुनाः थुकिया प्रतिकार यायेत नं धयादिल ।

गुठी संस्थानया पुलांम्ह अध्यक्ष पञ्चलाल महर्जनं थ्व विधेयकया दफा दफाय् दूगु गलतीयात क्यनाः थुकियागु नियत धइगु हे गुथिया नामय् दयाच्वंगु दक्व जग्गयात थःगु यानाकयाः उकिया व्यापारिक फाइदा जक काइगु तर गुगु उद्देश्यं थन गुथि तयाथिकल उकिया मर्म विपरित ज्या जुइगु जुयाः थुकिया हिइके हे माः धयादिल । उकियालिसें वय्कलं दक्वजानाः सशक्त संघर्ष यात धाःसा सरकार थ्व विधेयक लितकायेत बाध्य जुइगु खँ नं कनादिल ।

नेपालभाषा मंकाः खलःया नरेशवीर शाक्यं थ्व विधयेयकयात सामान्य यानाः हिलाः पास यायेगु पाखे संसद वनाच्वंगुलिं थुकियात परिमार्जन वा पुनर्लेखन मखु खारेज हे यायेगु माग ज्वनाः न्हयाःवनेगु धयादिल । थ्व विधेयक पास जुलकि नेवाःत थःगु जीवन धयाच्वंगु गुथिइ छुं कथंया स्वामित्व मदयावनीगु जूगुलिं सकलें इलय् हे सचेत जुइमाः धयादिल ।

किपाः रेखा शाक्य

हिसिला यमिं उगु विधेयक परिमार्जनय यायेबलय् समृद्धि व सहभागिताया खँ नं दुथ्याकेमाःगु सल्लाह बियादिल ।

ज्याझ्वः नेवाः राष्ट्रिय परिषद व संघीय समाजवादी नेवाः खलकं ग्वसाः ग्वःगु खः ।

किपाः रेखा शाक्य

 

Leave a Reply

Your email address will not be published. Required fields are marked *