fbpx

गंगा महर्जनया “बुद्ध लुइके” भजन संग्रह सार्वजनिक

म्ये हालामि गंगा महर्जनया नेपालभाषाया भजन संग्रह “बुद्ध लुइके” पितब्वज्या जूगु दु । २५६३ क्वःगु बुद्ध जयन्तीया लसताय् नेपालभाषा एकेडमी हल, किपुलिइ जनकवि दुर्गालाल श्रेष्ठया मू पाहांसुइ उगु भजन संग्रह म्येचाया पितब्वज्या याःगु खः ।

म्ये हालामि गंगा महर्जन नेवाः एफ.एम.या ज्याझ्वः न्ह्याकामि नं खः । थुगु म्येचा बुद्ध जयन्तीया पावन अवसरय् पिथने दुगुलिं थःत आपालं नुगः लुधंगु खँ कनादिल ।   नेवाः ख्यलय् म्येय् हाला जूसां थःम्ह यानागु छगू कुतःयात सकसिनं आत्मसात यानादी धइगु भलसा कयागु धाःसें ज्याझ्वलय् झायादिपिन्त सुभाय नं बियादिगु खः

 

मयजु महर्जनं म्येचालय् दुथ्याःगु भजन म्ये न्यंकुसें न्ह्याःगु ज्याझ्वलय् लोकगायक रत्न बेहोशी बज्राचार्य, रचनाकार वि.नन्द वैद्य, लोककवि राजभाई जकःमि, अनक मिडियाया संरक्षक श्रीराम महर्जन पाहां कथं झायादीगु खः ।

 

थुगु भजन संग्रहस रत्न बेहोेसी बज्राचार्य, अनागारिका श्रद्धाचारी, वि.नन्द वैद्य, पवन जोशी, क्रान्ति शाहीया च्वसां पिज्वःगु म्ये दुथ्याना च्वंगु दुसा संगीत अनिल तुलाधर, रत्न बहोशी बज्राचार्य, सुरेन्द्र श्रेष्ठं बियादिगु दु । संगीत संयोजन जूगल डंगोल, सुरेन्द्र श्रेष्ठ व सुरेन्द्र श्रेष्ठं यानादीगु दु । भजन म्येत आर्टोम्यूज रेकर्डिङ स्टुडियो, सूर मेलोडी, अन्नपूर्ण स्टुडियोस रिर्कड जूगु खः ।

नेवाः एफ.एम. १०६.६ मेगाहर्जया ग्वसालय् जूगु ज्याझ्वलय् एफ.एम.या प्रवन्ध निर्देशक श्रीकृष्ण महर्जनया नायःसुइ जूगु खःसा ज्याझ्वः सुरजवीर बज्राचार्यं न्ह्याकादीगु खः ।

 

बुखँ व किपाः सुरज बीर बज्राचार्य

Leave a Reply

Your email address will not be published. Required fields are marked *