fbpx

ख्वपया नवदुर्गा देवगण थिमिइ,  कन्हे २६ गः मेया छ्यंकपा ब्व छाइगु – गबले गन प्याखं हुइकी धलः सहित

रेखा शाक्य । झीगु सम्वाददाता

थिमि । थिंला गाः पारु

वंगु यःमह्री पुन्हिया दिनय् ख्वपया नवदुर्गा देवगण सकलें थिमिइ थ्यंक बिज्यागु दु । वंगु दँय् १३ दँ लिपा वि सं २०६३ सालय् छुं छुं हुनिं यानाः दिपा कयाच्वंगु नवदुर्गा प्याखंयात थिमिया  नगरपालिकाया प्रमुख मदनसुन्दर श्रेष्ठ व वडा नं ४  बालकुमारीया  नायः कुमार श्रेष्ठयालिसें अनया स्थानीयवासीया कुतलं हाकनं देवगण थिमिइ प्याखं हुइकिगु न्हापायागु परम्परायात कथहं हंकेत ता लाःगु खः ।

व हे कथं परम्परायात नियमित यायेकथं थुगिसइ नं  सकल देवगण थिमिया बालकुमारीइ दिगु छेँय् बास च्वना बिज्याना च्वंगु दु । वय्कःपिं थिमिइ आः वइगु पौष २ गते तक अन हे बासं च्वना थिमिया थी थी त्वालय् प्याखं हुया बिज्याइ । प्याखं हुइगु धलः कथं मंसीर २६ गते बिहिबाः नाच शुभारम्भ याये कथं मध्यपुर थिमिया दिगुत्वालय् न्हिसिया ३ बजे व थौं २७ गते शुक्रबार  सुथ ८ बजे लाछी कुतिचिवां जात्रा शुरुयानाः कुम्हाननी, तुलननी, नासननी, बसिपुखू, चपाचो, वाचुननी व जलाननी लगायतया थासय् प्याखं हुयाः हाकनं लाछी कुचिचिवालय् थ्यंकाः करिब  न्हिनसिया ३ बजे प्याखं हइके क्वचायेके धुंकूगु दु ।

अथेहे कन्हे २८ गते शनिबाः सुथय् कुतिचिवा पाखें हे प्याखं न्ह्याकालि चपाचो, गार्चा, स्वंगापुखू, थाने, दुवाफल्चा, छ्वाँसो, कंसातुथी, बागतुथी, भुलाँख्यः, हात्तिममहाँकाल व ब्रम्हननी लगायतया थासय् प्याखं हुलाः हाकनं कुतिचिवालय् न्हिनय् ३ बजे चपाचो थ्यंकाः निन्हुया प्याखं हुइकेगु क्वचायेकी । प्याखं हुइकेगु झ्वलय् ब्रम्हननी कुमारी तुइकिगु प्याखं नं हुइकीगु खः ।

कन्हे हे बालकुमारी प्रांगणय् द्यः ब्वयेकेगुया लिसें द्यः प्याखं हुइकीगु जूगु दु । द्यः ब्वयेकेगु झ्वलय् कन्हे ३ बाइ ३ फीटया लप्तेय् सकल १९ म्ह देवगणया लिसें बाजंखलः व प्याखंखलःयानाः जम्मा २६ गु ब्वः छायेगु ज्याझ्वः दूगु व प्रत्येक देवगणयात मेया छ्यंकपा ब्व छाइगु  धकाः मे छ्ंय, बजि, स्याबजि व अन्य समयब्वय् तयेगु घाःसा सहितया ब्वः छायेगु ज्याझ्वः दूगु खँ  स्थानीय रंजन प्रजापतिजुं थुम्ह पंक्तिकारयात जानकारी ब्यूगु दु ।

This slideshow requires JavaScript.

अथेहे हे मंसीर २९ गते आइतबाः दथुत्वाःलय् सनिलय् ४ बजेनिसें ८ बजेतक, ३० गते सोमबाः नगदेशय् सुथ ९ बजेनिसें ३ बजेतक, बहनी बोडेय् ४ बजेनिसें ८ बजेतक, पौष १ गते मंगलबाः सूर्यविनायकया गाम्चा चित्रपुरलागाय् सुथय् ९ बजेनिसें न्हिनसिया २ बजेतक, पौष २ गते बुधबाः बायँ लाकेगु बप्पा महादेव लागय् सुथय् ८ बजे, १० बजे बाराही प्याखं, सिम्बादुम्बा न्या लाकेगु, महाकाली प्याखं, न्या लाकेगुया लिसें बहनी ७ बजे बालकुमारी द्यःया प्रांगणय् आरती व जात्रा सम्पन्न यायेगु कथंया धलः दु ।

“नवदुर्गा भवानी हे थिमिइ बिज्याइगु खँय् तसकं लय्ता वः । ३३ कोटी देवदेवताया दर्शन छथासं याये दइगु सम्पूर्ण थिमिबासीया निति‌ं लसताया खँ खः । नेवाः बस्तीया नेवाःत संस्कृतप्रेमी खः । थःगु तःजिलजियात सकस्यां उलि हे हनाबना दूगु हुनिंयाना झीगु परम्परायात बचेयायेमाः अले परम्परायात कथहं हंकेमाः धइगु भावनां बिलिबिलि जायाच्वंपि मनूत खः । उकिं ता ई न्ह्यःनिसें दिपा कयाच्वंगु थुगु प्याखंयात हाकनं स्थानीयवासी, झी मेयर व सकल थिमिया अध्यक्षपिनिगु मंकाः सहलह कथं थगुने द्यःयात थिमिइ बिज्याके खन । अथेहे हे थुगसी नं वय्कःपिन्त निमन्त्रणा बियागु जुल । वय्कःपिं थन थिमिइ बास च्वंतले नयेत्वनेगु व च्वनेगुया ब्यवस्थाय् छुं कमी कमजाेरी मवयेकेत स्थानीय संस्थाया नापं स्थानीय ल्याय्म्हत नं उलि हे सक्रिय जुया लगे जुयाच्वंगु दु”  – कुमार श्रेष्ठजु, वडा नं ४ या नायः तथा नवदुर्गा भवानी जात्रा व्यवस्थापन समितिया संयोजकं थुम्ह पंक्तिकारलिसे नुगः खँ ब्याकादीगु दु ।

वय्कःया धापू कथ‌ं न्हापा छुं छुं कारणं यानाः ता ई तक देवगण थिमिइ बिमज्यागु खःसां वंगु दँय् देवगण बिज्याकेत निगू पक्षया दथुइ मदयेकं मगाःगु ज्याखँय् सम्झाैता पत्र हे क्वजिउगु खः । उकिं आः वइगु दिनय् छुं कथंया पंगः मवइगु खँय् सकल थिमिबासी विश्वस्त जूगु खँ धाःगु दु ।

 

 

Leave a Reply

Your email address will not be published. Required fields are marked *