fbpx

खुल्ला थाय् : आपतविपदबलय् मदय्कं मगागु थाय्

ञलाथ्व ३ । झीगु संवाददाता

स्थानीय जनसमुदाय, जेष्ठ नागरिक, मिसा, मिजं, मस्त फुक्कं लाभान्वित जुइगु अले आपतविपद्बलय् मदय्कं मगागु थाय् धैगु खुल्ला क्षेत्र हे खः धैगु वंगु तःभुखाचं पाठ बियावंगु दु ।

अले खुल्ला क्षेत्रयात संरक्षण यायेगु छगू हे तरिका खः वयात पार्क दयेकीगु ।

तीव्रकथं शहरिकरण जुयाच्वंगु झीगु थाय्यात सरलीकरण यायेत थुज्यागु पार्कं गुहाली याइ धकाः स्थानीय पूर्वाधार साझेदारी ज्याझ्वलय् १४ लाख धेवां निर्माण जूगु निपुहिति पार्कया उलेज्याय् यायेगु झ्वलय् मूपाहां संघीय सांसद माननीय जीवनराम श्रेष्ठं  कनादिल ।

ज्याझ्वलय् न्ववायेगु झ्वलय् माननीय श्रेष्ठं वंगु बजेट व थुगु बजेटय् नं खुल्ला क्षेत्रयात संरक्षण यायेत प्राथमिकता बियागु व वइगु आर्थिक वर्षया बजेटय् नं खुल्ला सार्वजनिक थाय् दुसा पार्क दयेका संरक्षण यायेगुनितिं प्रस्ताव हयादीत इनाप यानादिल ।


ज्याझ्वलय् न्वचु तयेगु झ्वलय् पाहांकथं झायादीम्ह य ेँमहानगरपालिकाया प्रवक्ता नापं येँमहानगरपालिका वडा नं १५ या वडाध्यक्ष भाजु ईश्वरमान डंगोलजुं हरियाली, उज्यालो व सफासुग्घर हे थुगु वडाया मू आज्जु खः धयादील ।

न्वचुया झ्वलय् थः न्हापा डल्लु आवास सहयोग समितिया नायः जुया ज्या यानागु खँ न्ह्यथसें उबले यानागु बांलागु ज्याया स्याबासीकथं थौंतका दिनय् तक नं वडाध्यक्ष जुइखंगु धयादील । भाजु डंगोलं स्वयम्भू पुनःनिर्माणया नितिं १८ करोडया बजेट बिनियोजन जुयाच्वंगु खँ नं कनादील ।


अथे मेम्ह पाहां स्वयम्भू प्रहरी वृत्तया प्रहरी नायव उपरीक्षक लालध्वज सुवेदीं समाजया असमाजिक तत्वयात अन्त्य यायेगु खःसा स्थानीय नाप साझेदारी ज्या याये हे माः धयादील ।


अथे पाहा कथं झायादीम्ह डल्लु आवास सहयोग समितिया नायः भाजु राजा शाक्यं थथे पार्क दयेकेगु ज्यां समाज न्हूगु आयामको दिशापाखें वंगु खँ कनादील । ज्या यायेबलय् फुक्कं छध्धि छप्पं जुयावन धाःसा सुना नं पनां पने मफइगु खँ ह्यथनादील ।


ज्याझ्वलय् वडाया दुजःपिं मैयाँलक्ष्मी मजर्हन, आनन्दराम गौतम, पार्क निर्माण समितिया त्रिरत्न मानन्धर नापं पदाधिकारीपिं, निपुहिति ग्वसाः खलःया नायः ओमकृष्ण श्रेष्ठलिसे स्थानीय जनसमुदाय बांलागु उपस्थिति दु ।

Leave a Reply

Your email address will not be published. Required fields are marked *