fbpx

“कृषा गौतमी” जेष्ठया २४ गते क्यनीगु

येँ, बछलागा एकादशी ।

आदिवासी जनजाति चलचित्र महासंघया ग्वसालय् थुगुसी स्वक्वःगु आदिवासी जनजाति फिल्म फेस्टिभल २०७६ जुइगु जूगु दु ।

थ्वहे वइगु जेठ २४ निसे २६ गते तक स्वन्हुयंकं जुइगु उगु फेस्टिभलय् नेपाः दुने न्वःवाइगु थीथी आदिवासी जनजाति भाषाया मुक्कं नीगु फिल्म क्यनीगु ग्वसाः दूगु खँ थौं बुधवाः जूगु छगू पत्रकार सम्मेलनय् जानकारी ब्यूगु दु ।

संघया नायः अमृत सुनुवारं ब्वनाः न्यंकूगु प्रेस विज्ञप्तिइ च्वयातः कथं थ्व फेस्टिभलय् निर्देशक रामकृष्ण खडगीया नेपालभाषाया फिचर फिल्म ‘कृषा गौतमी’ क्यनीगु जूगु दु । थ्व संकिपा जेठ २४गते सनिलया ६.३० ता इलय् क्यने कथं क्वछिना तःगु दु ।

अथेहे, निर्देशक रामकृष्ण श्रेष्ठया ‘नौलिन भद्रकाली जात्रा’ नांयागु नेवाः डकुमेन्ट्री नं उगु फेस्टिभलय् क्यनीगु ग्वसाः ग्वयातःगु दु ।

थ्वहे झ्वलय् संघया नायः सुनुवारं निर्देशन यानादीगु ‘आङा थेवा’ धाःसा धेँधेँबल्लाखय् दुमथ्याइगु खँया नं थौंया पत्रकार सम्मेलनय् जानकारी ब्यूगु दु ।

थुगुसी स्वक्वःगु आदिवासी जनजाति फिल्म फेस्टिभलय् पब्लिक च्वइस अवार्डया नापनापं जुरीया निर्णयपाखें बेस्ट फिल्म, बेस्ट डाइरेक्टर, बेष्ट क्यामेरा पर्सन व बेस्ट एक्टर, बेस्ट एक्ट्रेसयात सिरपाः बीगु जूगु दुसा थुकिया नितिं निर्णायक मण्डलं फिल्म स्वयेगु न्ह्याकेधुंकूगु खँ नं पत्रकार सम्मेलनय् जानकारी बिउगु दु ।

पत्रकार सम्मेलन महासंघया पुलांम्ह नायः प्रतिमाया पुन मगर, संस्थापक उपाध्यक्ष विजयरत्न तुलाधर असंबरे, नांजाःम्ह कलाकार लुनिभा तुलाधर, मगर चलचित्रकःमि संघया नायः युवराज मास्की मगर लगायत विशेष पाहाँ कथं झायादीगु खः ।

बुखँ  विजय रत्न असंबरे

Leave a Reply

Your email address will not be published. Required fields are marked *