fbpx

कल्पना महर्जनं सगरमाथाया निक्वःगु खुसिइ सफल आरोहण यात

रेखा शाक्य । झीगु सम्वाददाता

ने सं ११३९ बछला गाः,  षष्ठी

सरगमाथा आरोही तथा मिसा पत्रकार कल्पना महर्जनं हलिंया सर्वोच्च शिखर सगरमाथाया निगुलिं मोहडां सफल आरोहण यायेत सफल जूगु दु । उत्तरी मोहडां २०७६ जेष्ठ ९ गते बिहीबाः सुथसिया १० बजे जुया २० मिनेटय् सफल आरोहण पू वंकुगु खः ।

किपाः दिलभक्त महर्जनया फेसबुकपाखें

वय्कलं  दक्षिण मोहोडां २० मे २०१८ अर्थात २०७५ जेठ ९ गते न्हापांगु खुसिइ सगरमाथाया सफल आरोहण याःगु खःसा उत्तर मोहडां २३ मे २०१९ स सफल आरोहण यानाः सगरमाथाया शिखरय् पलाः तयेगु ह्वताः चूलाका हलिंया हे न्हापाम्ह मिसा पत्रकारया किर्तीमानी तकं तयेत सफल जूगु  दु । थुकथं छगू हे लाय् छगू हे तारिखय् सगरमाथाय् पलाः तःगुया नं रिकर्ड तःगु दु धकाः पर्वतारोहण व्यवस्थापन कम्पनी एक्स्पेरियन्स आउटडोर्स नेपाल प्रा लि या निर्देशक रविन्द्र महर्जनं छगू प्रेस विज्ञप्ती पिथना थुगु खँया जानकारी ब्यूगु दु ।

शिक्षाया माध्यमं बालविवाह रोकथाम अभियान- २०१९ या नारा ज्वना पत्रकार तथा मिसा सगरमाथा आरोही कल्पना महर्जनं विश्वया सर्वोच्च शिखर सगरमाथा चीनया ल्हासापाखें २०७५ चैत्र २८ गते प्रस्थान याःम्ह मय्जुं ४३ न्हूया दिनय् निक्वःगु खुसिइ पलाः तयेत ताः लाःगु खः ।

यल महानगरपालिका स्थापनाया १०० दँया जन्मजयन्ती व वांमय् शताब्दी पुरुष संस्कृतिविद् सत्यमोहन जोशीया १०० दँया बुन्हिया अवसरय् आरोही महर्जनं यल महानगरपालिकाया नां, लोगो व जोशीया किपाः दूगु ध्वाँय् सगरमाथाया च्वकाय् ब्वयेकेगु ग्वसाःयात नं सफल याःगु दु ।

शिखर आरोहणया नितिं यल महानगरपालिका, यल उद्योग वाणिज्य संघ, युनाईटेड सिमेन्ट्स, मैजान आयल, श्री दक्षिण बाराही ईटा उद्योग, बुद्ध एयर, एभेरष्ट फेसन, महालक्ष्मी लाइफ इन्स्योरेन्स कम्पनी, आई आई एम एस कलेज, इमाडोल स्वीमिंग पुल, डिस होम, एभरेष्ट हार्डवयर, ग्रेस ईन्टरनेशनल कन्सल्टेन्सी, एटिटिएसएचया लिसें संघ, संस्थातय्सं आर्थिक गुहालि याःगु खः ।

Leave a Reply

Your email address will not be published. Required fields are marked *