fbpx

एतिहासिक नेवाः बस्ती सक्वय् देवी प्याखं क्वचाल

सक्व । ञँलाथ्व नवमी

दँय्दसं थें थुगुसिनं एतिहासिक नेवाः बस्ती सक्वय् देबी प्याखं झः झः धायेक हुइकाः क्वचायेकूगु दु । दच्छिइ छक्वः कायाअष्टमि कुन्हु चच्छि यंक थुगु प्याखं हुइकिगु चलन दु । थुगु प्याखंया लिसें हालिगु माल श्री धुन व मेमेगु म्ये हालेवं मोहनि नखः शुरु जुइगु भाःपियातःगु दु ।

सक्वय् हुइकिगु थुगु देवी प्याखनय् देवी, चण्डि व भैरब स्वम्ह पात्र दु । ह्याँउगु वसः ह्याँउगु हे ख्याःपाःया देवी व चण्डी खःसा हाकुगु वसः व हाकुगु ख्वाः पाः भैरव पात्र खः ।  अथेहे ख्याः कवं व बेताल नं दथुइ दथुइ न्ह्याइपुकेगु ल्याखं प्याखं हुइकेगु याइ ।

थुगु देवी प्याखं सक्वः या ८ च्यागुु त्वालय्  हुइकिगु खः । गन ४ गु  दबुलि व ४ गु माथं वंगु च‌कंगु थासय् प्याखं हुइकिगु खः । थुगु प्याखं हुइका हइबलय् दुवाः व दुवाः द्यः न्ह्यःने द्यः ल्हाका हयेमाःगु चलन दु ।

देवी प्याखंया पात्रपिं मालश्री धुन व म्येया तालय् खिं, ताः, पँय्ता, नायखिं, छुस्या व मायलिं धुनय् प्याखं हुइगु खः सा म्येया प्रत्येक बोल कथं देवीं दैत्य दानवयात संहार याःगु भाव व मुद्राय् गाथा न्ह्यब्वगुखः।

अथे हलिमय दकले चिधंगु दबुलि कथं मान्यता बियातःगु लसकुस फल्चा दबुलि क्वय् नं बज्रयोगिनी उग्रतारायाःगु मालश्री म्ये हायकाः देवी प्याखं हुइकी । गुगु दबू ३्/४स्क्वायर फिट जक दुगु दु ।

देवी प्याखं पिथने न्ह्यः सुथ गुँ बिहारय् वनाः ह्याँउख्वाः माजु पुजा यानाः ह्याँउख्वाः माजुया किकिंपाः स्वपाः हयाः देवी द्यः जुइपिंन्त छुना बिइ ।  थथे ह्याउँख्वाः माजुया स्वपाः किकिंपाः छुकेवं हे द्यः पात्रत द्यः दुविनाः खाना वइगु खः । देबी प्याखं पिथने न्ह्यः सक्वःया नासःचुकःया नासः द्यः पुजा यानाः समेभ्वय् व सिकाः भ्वय् धुंकाः दकले न्हापा चलाखु त्वाःया गणेद्यःन्ह्यने देवी प्याखं हुइकूगु खः। अनं लिपा चलाखु त्वाः या देवी दबुलिइ १२ गु ताल प्याखं हुइकूगु खः। प्याखं हुइकेगुलि नं ६ ब्वः देबी प्याखं व ६ ब्वः ख्या ,कवं व बेताल प्याखं हुइकिगु खः।

सक्वय् येँ या किलाघःया दी प्याखनय् थें दैत्य पात्र धाःसा दैमखु। दैत्य जुइम्हसित धात्थे कः वनिगु भय जुगुलिं दैत्य प्याखं म्वः मतःगु धइगु खँ न्यनेदु । दैत्यया प्रतिक कथं दबुलिया षटकाेण  ल्वँहतय् मि प्वालक्क वयका खड्गं पालिगु याइ ।  खिं थाइबलय् ताल मिले मजुसा खिं थाइम्हेसित ल्हातय् खड्गं घाः जुइक पालिगु  व बाजनय्  हे ह्वगंक खड्गं सुयाबिगु लु खने दइगु जुगुलिं दैवीय शक्तिया थ्व चिं खः धायेगु यानावया च्वंगु दु ।

बुखँ व किपाः श्राेत किचः सिं ज्यापू

Leave a Reply

Your email address will not be published. Required fields are marked *