fbpx

“उदाय् जातिया संस्कार ज्याःजंक्व” सफू पितब्वज्या

नरेन्द्र श्रेष्ठ

येँ । कछला गाः पञ्चमी ।

ज्याथः ज्याथिपिन्त हनाबना तयाः द्यः भाःपिया आशिका कायेगु नेवाः तय्गु संस्कार कथं शारीरिक परिश्रम यायेगु उमेर पार यायेधुंकाः याइगु हनाबना स्वरूप ज्याःजंक्व बारे च्वमि रत्न तारा ताम्राकारं च्वयादीगु “उदाय् जातिया संस्कार ज्याःजंक्व” सफू कमलादी, येँ चिखिफ्यनेज्या जूगु दु ।

मूपाहाँ उदाय् समाजया ज्याथःम्ह १०६ दुम्ह हनेबहम्ह शताब्दी पुरूष मोती कृष्ण तुलाधर व त्रैलोक्य मान ताम्राकारं मंकाः कथं पितब्वज्या यानादीगु खः । उगु हे ज्याझ्वलय् समाजसेवी नेवाः न्ह्यलुवाः हितकर वीर सिह कंसाकारं च्वमि ताम्राकारयात हनापौ लःल्हानादीगु खः ।

किपा–नेवाः सूचना केन्द्र

नेपाल प्रज्ञाप्रतिष्ठानया कुलपति गंगाधर उप्रेती मूपाहाँ कथं झायादीगु विश्व ब्यापी शान्ति अभियान ग्वसालय् संस्थाया नायः प्रेम नाथ जोशीया नायःसुइ सुशील वीर कंसाकारं ज्याझ्वः न्ह्याकादीगु खः । ज्याझ्वलय् समालोचक प्रा. पूर्ण काजि ताम्राकारं च्वमिया संक्षिप्त म्हसीका न्ह्यब्वयादीगु खःसा समाजसेवी कंसाकारं पिदंगु सफूया बःचा हाकःगु समिक्षा यानादीगु खः ।

समिक्षाया झ्वलय् कंसाकारं थुगु पिदंगु सफुतिइ छुंछुं मगाःमचाः दःसानं ज्याःजंक्वया मू मू खँ दक्वं दुथ्याकातःगुलिं थौंकन्ह्यया बेसाःभावय् तःजिक संस्कार याये मफइपिनिगु नितिं थःगु गक्ष कथं म्ह्व जक खर्च याना नं कर्म खंके फइगु खँय् बःबियादिल । नापं उदाय् समाजया पुलांम्ह नायः पञ्चवीर सिं तुलाधर, तवःसमाज येँया नायः तेज रत्न कंसाकार, ताम्राकार समाज यलया नायः रविन्द्र राम ताम्राकार, प्रा. प्रेम शान्ति तुलाधर नुगःखँ तयादीगु खः ।

च्वमि ताम्राकारं सफू पिथनेगु व च्वयेगु नितिं यानागु अनुभव न्ह्यब्वसे सुभाय् न्वचू तयादीगु खः ।

 

Leave a Reply

Your email address will not be published. Required fields are marked *