“Forgotten Melodies”  व ” Rita at her Best ” या उलेज्या

११३८ सिल्लागा तृतीया/येँ

झीगु संवाददाता ।  सम्मान व स्रष्टाया कृति स्रष्टायात हे स–सम्मान लःल्हायेगु ज्याझ्वःया ग्वसाःकथं सीता मां संगीत किपूया ग्वसालय् किपूया म्येहालामि मय्जु रिता महर्जनया निचाः म्येचाया म्हिगः उलेज्या जुल । उगु ज्याझ्वलय् भाषा, साहित्य व संगीत अनुरागीपिनिगु न्हयाइपुगु उपस्थितिइ नेपाःया नांजाःपिं कवि, गीतकार संगीतकारपिनिगु सहभागिता दूगु खः । जनप्रिय जनकवि दुर्गालाल श्रेष्ठजुया करकमलय् वय्कःया न्हयगू दशक निसेंया उत्कृष्ट म्ये रचनाया सांगीतिक देछा लः ल्हायेगु ज्या जूगु खः ।

सम्मानित यायेगु झ्वलय् याेगेश बैद्य जनकवि दुर्गालाल प्रेमध्वज प्रधान व अन्य । किपा रेखा शाक्य

उगु म्येचालय् खुगू दशकंनिसें कवि दुर्गालाल श्रेष्ठया रचनायात त्वाः त्वालय् जुइगु सम्मेलनय् थःगु हे लसय् हालादिम्ह वरिष्ठ गायक तथा संगीतकार योगेश वैद्यजुं परिमार्जन सहित तयार यानादीगु खः । “Forgotten Melodies”  व ” Rita at her Best ”  लुमन्ति निचाः सि.डि. एल्बम योगेश वैद्यया ल्हातं  पाहाँपिन्त देछायेगु ज्या जूगु खः । अथेहे ज्याझ्वःया मू पाहाँ हनेबहःम्ह जेष्ठ व वरिष्ठ गायक एवं संगीतकार गाेल्डेन भ्वाइस अफ नेपाल प्रेमध्वज प्रधानजुं आयोजक संस्थापाखें स्रष्टाप्रति सम्मानकथं सम्मानीत व्यक्तित्वपिन्त दोसल्लां न्ययेकाः सम्मान याना दिल । नापनापं नेपाल संगीत तथा नाट्य प्रज्ञा प्रतिष्ठानया उपकुलपति नांजाःम्ह वरिष्ठ संगीतकार शम्भूजीत बास्कोटाजुपाखें हना–पौ लःल्हायेगु ज्या जूगु खः ।

याेगेश बैद्ययात सम्भुजित बाँस्काेटाजुं सम्मान पत्र लःल्हाये धुंकाःया लिपा । किपा रेखा शाक्य

सम्मान ज्याझ्वलय् सम्मानीत मू पात्र जनकवि दुर्गालाल श्रेष्ठजुं थः सम्मानीत जुयादीगुलिं लय्ता खँ प्वंकादीगु झ्वलय् म्ये च्वमियात म्ये लसय् हनादीम्ह संगीत सर्जक पाखें थुजोकथं स–सम्मान सांगीतिक देछा लःल्हायेगु विशिष्ट ज्याझ्वः गबलें जूगु मखंनि धयादिसें आयोजक संस्थाया सांस्कृतिक कुतः च्वछाये बहःजू धकाः लसता प्वंकादिल । देछा लः ल्हानादीम्ह संगीत सर्जक योगेश वैद्यजुं थुकथं कलाकारत कृतित्वया विकासय् छथासय् एकाकार जूगु प्रतिकात्मकता यात जोड बियादिसें संगीत, कला व साहित्य छुं नं भेद विभेदपाखें मुक्त जुयाः हार्मोनाइज्ड क्रियटिभ समाजया निर्माणय् अग्रसर जुइमाःगु अवस्था खः धकाः थःगु भावना प्वंकादिल ।

ज्याझ्वलय् झायादिपिं पाहाँपि‌ सकलें । किपा रेखा शाक्य

थ्व हे झ्वलय् नेपाल संगीत तथा नाट्य प्रज्ञा प्रतिष्ठानपाखें उपकुलपति संगीतकार शम्भूजीत बास्कोटाजुं नेवाः भाय् संगीत व संस्कृतिया प्रशंसा यानादिसें थ्व हे नेपाःया धरोहर खः धकाः जोड बिया दिल । स्रष्टा सम्मानया लागिं  उपस्थिति बियादीपिं नेपाःया अतिकं  हनेबहःपिं नां जाःपिं गीतकार कवि संगीतकार रत्न शमशेर थापा, किरण खरेल, यादव खरेल, काली प्रसाद रिजाल, गणेश रसिक, डा. कृष्ण हरि बराल, शक्ति बल्लभ, उन्नति बोहरा शिला (अध्यक्ष महिला गीतकार संघ), चूडामणी देवकोटा (अध्यक्ष नेपाल गीतकार संघ) पिंसं थःथःगु भिन्तुना न्वचु बिया दीगु खः ।

सभाया नायः हनेबहःम्ह शिक्षाविद् सुवर्ण शाक्यजुं म्येचाया समिक्षकया हैसियतं समिक्षा यानादिगु खः  ।

मदुम्ह थः जहानया लुमन्तिइ संस्थाया संरक्षक कृष्ण हरि महर्जनजुं थः मदुम्ह तिरि मय्जुया नामय् स्थापित उगु संस्थाया नियमित संचालनया लागि आर्थिक गुहाली कथं झिगु लखया अक्षयकोष घोषना यानादिल ।
ज्याझ्वलय् एल्बमय् दुथ्याःगु छपू म्येया म्युजिक भिडियो नं क्यनादीगु खःसा म्ये हालामि मय्जु रीतां पाहाँपिनि न्ह्यःने छपू म्ये नं हालादिगु खः ।

म्ये हालामि मयजु रीता महर्जनजु म्ये हालेगु झ्वलय् । किपा रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.