जित: जिगु मांभाय् यः

अनिक शाक्य

नेवा: (नेपालभाषाया कवि) – जित: जिगु मांभाय् यः । उकिं जिं न्ह्याब्लें थ:गु मांभासं च्वयाच्वना । छ नेवा: जुया छाय् सदां खय् भासं च्वयाच्वना ? छ नेवा: भाय् मस:म्ह मथूम्ह मखु । छं नं च्व ले नेवा: भासं ।

नेवा: (खसभाषाया कवि) – समुन्द्रय् लाल्कया च्वनाम्हसित तुंथिइ च्वं वा धयां जि च्वँ वइ ला ! निगू दसकया नेपाली साहित्यया चाकु सवा: काये धुंका: नेवा: साहित्यया खायुगु सवा: कायेगु जिगु इछ्या मदु । बरु छ आमु तुंथिं पिहाँ वा । ग्वाहाली मा:सा जिं याये छन्त ।

नेवा: (नेपालभाषाया कवि) – मखु जिं ला जिगु मांभाय् यात त्व:ते मफु ।

नेवा: (खसभाषाया कवि) – छ जिन्दगीभर व हे जिगु मांभाय् मांभाय् धकाः हाला च्वं । स्व पासा, छ जि सिबय् सीनियर ख: । छंगु साहित्य जिगु सिबय् बांला: । तर छन्त ब्वनीपिं हे मदु । छंगु सफू न्यानाबीपिं हे मदु । नेवा: तय्सं नेवा: भाय् ला मल्हाये धुंकल, छन्त ब्वनीगु सुनां ?

नेवा: (नेपालभाषाया कवि) – मौन ।

नेवा: (खसभाषाया कवि) – नेवा: साहित्य ख्यलय् च्वना: छन्त छु दत ! निस: स्वस: मनुखं छन्त म्हसिल । उलि हे मखु ला ? छंथाय्, न छंगु सफू पिकया बिइपिं प्रकाशकत दु । नं छंगु उचित मूल्यांकन याइपिं दु । न तत:धंगु पुरस्कार हे दु । थम्हं हे साहित्य च्व । थम्हं हे लगानी या । सफू पीका । थम्हं हे खर्च याना: सफू बिमोचन या । सछि सत्या सफू म्यु । अले बाकि सफू खाता तलय्, दराजय्, र्याकय् तया: पुजायाना ति । स्व पासा जिं धयागु खँ न्यं । नेपाली भासं च्व । नेपाली कवि जू । नेवा: कवि जुया: थ:त तुंया ब्यां यानातये मते ।

नेवा: (नेपालभाषाया कवि) – सः पिहाँ मवल ।

नेवा: (खसभाषाया कवि) – जितः स्व । जितः यक्वसिनं म्हस्यू । जिगु साहित्यया हजारौं फ्यानत दु । सयौं पसलय् जिगु सफूत बिक्री बितरण जुयाच्वनी । छुं छगू पत्रिकाय् जिगु लेख रचना पिदँसा पारिश्रमिक वइ । ब्वमि पिनिगुपाखें मान सम्मान गाक्कं दु । जिगु ऑटोग्राफ व जिलिसें फोटो छपा: कायेत जकसां जिगु सफू न्याइपिं वइ । जिगु साहित्यया प्रतिक्रिया न्हिथं धैथें जितः वयाच्वनी । दछि पुलांगु जिगु सफु नं थौं तिनि पिदंगुथें ताजा जुयाच्वनी । मिडियां उलि हे सपोर्ट यानाच्वनी । छं धा, थज्यागु छु दु छंगु नेवा: साहित्य ख्यलय् ।

नेवा: (नेपालभाषाया कवि) – मखु पासा, जिं काय् मिया च्य: लहिये मखु ।

नेवा: (खसभाषाया कवि) – मौन ।

नेवा: (नेपालभाषाया कवि) – छ थज्यापिन्सं याना ख: झीगु भाषा साहित्य थहाँ मव:गु । द दक्व नेवा: खसकरण जुयावनी अले गथे झीगु मांभाय् बिकास जुइ ! जिं मांभाय् या सेवा यानाच्वनागु जितः छुं दइ धकाः मखु । जिगु भाय् यात थकायेगु हे जिगु आज्जु ख: । जिगु मांभाय् हे मन्त धा:सा जिगु म्हसिका हे तनी । जिगु पहिचान ख: जिगु भाय् । जिगु नुगः नेवा: नुगः । जिगु हिनूलिइ नेवा: भाय् दु । जिं म्हगस तक हे नं नेवा: भासं खनी । जिं जिगु भाय् त्व:तेगु सवाल हे जुइ मखु ।

नेवा: (खसभाषाया कवि) – बी प्रैक्टिकल । भावुक जुये मते ।

नेवा: (नेपालभाषाया कवि) – जि म्वानाच्वंगु दु । उकिं जिके भाव दु । जि नेवा: ख: । उकिं जिके नेवा: भावना सदां दयाच्वनी । जि खस् साहित्यया बिरोधि मखु । जि थ: हे नं खस् साहित्य यक्व ब्वना: । तर खस् भाषी तयेसं खस् भाषा साहित्यया सेवा या:थें जिके नं जिगु भाषा साहित्यया सेवा यायेगु इछ्या सदां जुयाच्वनी । छ नेवा: ख: । छंगु नं कर्तब्य ख: थ:गु भाषाया सेवा यायेगु । तर छन्त थ:गु भाय् स्वयां कत: भाय् या सेवा याये मन दु सा जिगु छुं धायेगु मदु ।

नेवा: (खसभाषाया कवि) – छगू खँ छं सि हे सिउ । जिं नेवा:भासं बांलाक च्वये हे मसया । अले नेपाली साहित्य उलि मछिं नां जाम्ह जिं नेवा: भासं शुद्ध हे च्वये मसयेका गथे च्वये ! जिमि कलां हे नेवा: भाय् मल्हा: । मस्तय्सं ला नेवा: भाय् थू हे मथू । जिगु छेँज:पिन्सं हे मब्वनीगु, ब्वने मस:गु भासं जिं सफू गथे पिकाये ? मेगु खँ, गन साहित्य ब्वनीपिं हे मदु अन साहित्य च्वयां छुयाये ? गन सफू न्यानाबीपिं हे मदु अन सफू पिथना छु याये ? व नं थम्हं हे लगानी याना: !

नेवा: (नेपालभाषाया कवि) – सुम्क ।
नेवा: (खसभाषाया कवि) – सुम्क ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.