भ्वजय् नापलाइपिं मनूत (बाखं)

शशिकला मानन्धर

 

‘आहासा…………….हिराया हार गुलि बांलाःगु । गुलि काःगु-‘ भमचित क्वसः बियाः थुखे वयाः पलख छु दना, रबिनां जिं क्वखायातयागु माः ल्हातं थियाः न्यन।
‘झिंन्यासः जक’ जिगु म्हुतुं च्वाक्क खःगु मू धायेवल।
‘नक्कली खनी’ वं न्हिलाः धाल।
‘थौकन्हय् लुँ तियाजुइ ग्यानापु, उकिं नक्कली तिसा तियागु-‘ जिं नं न्हिलाः धया।
‘थज्याःगु बिहा भ्वजय् नं छु नक्कली तिसा तिइगु- जितःया मयः। जितःला सक्कली तिसां जक तिइ यः’ धाधां वं क्वखायातःगु असफिर् माः मिलय् यात।
जिं वाताहाँ जुयाः वयात क्वथीक स्वया। वं गःपः खनेमदयेक चोकर नं क्वखायातःगु दु। न्हाय्पनय् ताःहाकःगु झुम्का सुयातःगु दु। झुम्काया च्वः न्हाय्पनं च्वय् यंकाः छ्यनय् कत्ताकातःगु दु। सिन्चुइ सिरबन्दी दु, नाडिइ प्वाँय्चिंक लुँचुरि न्हृयानातःगु दु। ज्वालाज्वालां थीगु दोपत्ता परसि सिनातःगु दु। थनिं झिदँ न्हृ्यः भमचा जुइ धुंकूम्ह रबिनायात थौं नं जिं भमचिया रुपय् खना। थौं भमचा जुयाच्वंम्ह वया दकलय् चीधिम्ह केँहें स्वयाः व भ्याः भचा हे क्वहृयंगु मखना।
थःथितिपिं वःगुलिं रबिना इपिंलिसे खँ ल्हाःवन। जि स्नाय्क्स नयेथाय् वना।
‘रेखा छ गबायती वया- जिं ला छंत नकतिनि जक खना’ कोकया ग्लास ज्वनाः मालां जितः नतूवल।
‘पलख जाल’ बीहःगु प्राउन ननं जिं धया।
‘लिबात कि झी पुलां पुलांपिं पासापिं नापमलाइ धकाः थौंला जि न्हापनं हे ब्यूटिपार्लर वना’ धाधां वं कोक त्वन।
‘भ्वय् छकः वनेत ब्यूटिपार्लर वनेमाः ला-‘ वयागु खँ मथुयाः जिं न्यना।
वं कोक त्वने सिधयेकल। प्वंगु ग्लास मेच तःलय् दुछ्वत।
‘भ्वय् वनेत छकःला न्हृ्याब्लें वना। डिजाइन डिजाइनं थथे सपः प्यायेत का, मसिउला छं- छं धकाः सतबतचा छगू थुल सिधल, जिमि छं थें सतबतचा थुइयःला- क्याटलग स्वस्वं सँया डिजाइन याये दुबलय् नापं थःत छाय् बांमलाकेगु-‘ वं परसि मिले यायां धाल।
जिगु मिखा मचायेक वया म्हय् द्युवन। थौं नं वं उकुन्हु पुषबलय् थें तसकं खोले जूगु ब्लाउज फिनातल। गुकिं यानाः वयागु तत्याःगु जँ, तेपुचा अले छ्वालुगु दुरुपा बच्छि बांलाक हे खने दयाच्वन। स्वये मखु धाःसां मजिउ, थ्व मिखा घरी घरी वयागु दुरुपाय् जक द्यूवनाच्वन।
‘फागुण वलं नं खोले मजूगु, लंचा छगलं दुगु ब्लाउज फिनातल तिनिका छं। अज्याःगु मिले जूगु स्लीम म्हयात छाय् त्वपुयागु- स्व रे परसि सिनातःगु नं गन थ्यंक। तेपुचा खनेदयेक ंसिउँ रे भचा छाँट वंक’ त्वपुयातयागु तेपुचा क्यनाः परसि सिनेत वं जितः सल्हा बिल।
‘स्व रे माला, जिं तेपुचां क्वय् इजार चिइ हे मफु। चिउसां थहाँ थहाँ जक वयाः हैरान याइगु। जिंला तसकं चिकु चाः धया, छं चिकु मचाःगु खनाः अजू चाः। गय् चिकु मचाःगु छं- पुषं हे ब्लाउज जक फिनाः भ्वय जुइफुम्ह। थुरुथुरु खाक्क छु भ्वय् नयेगु व’ जिं थःगु मनया खँ धयाबिया।
‘स्वीटर फितकि, गां न्यलकि परसिइ व  ब्लाउजय् भरे यानातइगु बुट्टा दक्व त्वपुइ मखंला- उलि जक ला तिसा नं त्वपुइगु’ वं न्हिलाः थःगु समस्या कन।र्
र्’इ ……….. छ ……………. ला………………. भरेयानातःगु बुट्टा व तिसा ब्वयेमाःम्ह मिसा लानाच्वन’ च्वाक्क धायेवल जितः।
‘खःनिसा …………………. उलि जक मखु, बांलाःगु  म्ह झं ब्वयेमाः। छ धकाः म्ह त्वपुयातइम्ह, बांलाके मसःम्ह, गामाःनी म्हुतु बेक्वयेक न्हिलाः वं धाल।
वयागु म्हुतुसिइ पिज्वःगु बेक्वःगु न्हिलां जिगु नुगलय् सुत्तु सुल। गुलि सहयायेगु- थथे भ्वजय् नापलाइपिं अप्वः धैथें मनूतयसं छाय् म्वाःमदुगु खँ ल्हानाः जितः नुगलय् स्याकीगु- इमित जवाः बी धाःसा इमि नुगलय् स्याइ धकाः ग्यानाः जवाः मबिसे अथें न्हिलाः सहयाना बीगु बानी जिगु। सहयाये जक अपुःला – अहँ, जिगु नुगलं अःपु  मधाः। सहयाये थाकु । थाकुक छाय् सहयायेगु- जिं आः सहयाये मखुत। जूजूगु जुइमा जिं आः म्वाः मदुगु खँ ल्हाइपिंत पटापट जवाः बियाबीगु क्वःछिना।
‘जितः छं म्ह त्वपुयातइम्ह, बांलाके मसःम्ह गामाःनी धाल। छ रे छ- जिं स्वयाः बांलाःम्ह, आधुनिकताय् भ्येलय्पुंम्ह जूसां तबि थःत पूवंक बांलाके मसःम्ह मिसा धाये……………..।’
‘छाय्-‘ वं मिखा तग्वयेक कनाः न्यन।
‘छाय्कि मचा निम्ह बुसांनिसें छंगु म्ह स्यनेधुंकल। तत्याःगु जँ, छ्वालुगु दुरुपा , तेपुचां क्वय्  ध्वःध्वः छ्यंगू गूगु थें खनेदुगु प्वाः, स्वयेबलय् तसकं घच्चायापु। छं स्वये बांलाः धकाः च्वनागुला- छं  थःगु म्हयात थथे उलेगु स्वयाः बरु त्वपुसा बांलाइ’ जिं नं वयात स्येल्लाःगु सल्हा बिया।
जिगु सल्हा न्यनाः व तंचाये नं मफुत, लय्ताये नं मफुत। ख्वाः हृयाउँकल। छुं लिसः बिइ मफुत वं। व बुत, जि त्यात।
‘हेल्लो रेखा बैनी। यक्व दिं लिपा झी नापलात’ अय्लाः दुगु गिलास ज्वज्व सुमंगल दाइ नं जितः नतूवल।
रबिनाया दाइ धायेमाःम्ह सुमंगल दाइ नं जितः नतूवःगु खनेवं छुं छां मधासे माला उखेपाखे वनाछ्वत।
‘ग्व छंला भ्वय् भी नं आःतक नकूगु मखु’ न्हृ्याबलें थें वं जिगु व्यक्तिगत जीवनय् प्रहार यात। वं स्वये जिं सहयानाः न्हि जक न्हिलाः च्वंच्वनी धकाः मत्ती तल जुइ। जिं थौं जवाः बी धकाः वं कल्पना तकं याःगु खइमखु।
‘छि थः स्वम्ह म्ह्याय्पिन्त बियाछ्वयाः भ्वय् नकेगु गबले ले-‘ वयागु ख्वाः स्वयाः न्हृयसः तयाबिया जिं। जिगु न्हृ्यसलं व वाल्ल जुल। छुं धायेमफुत।
‘सुमंगलदाइया तःधीम्ह म्हृयाय् स्वीन्यादँ दत, माइलीम्ह स्वीस्वदँ अले कान्छीम्ह स्वीछदँ दत। नीदं पुलेवं ब्याहाः यायेमाः धकाः जितः बरोबर खँ न्यंकीम्ह छिं थः म्हृ्याय्पिन्त गथे बियाछ्वये ल्वःमंगु’ जिं फयांफक्व प्रहार यानाबिया।
‘वला………….इमि …………..र्.र्.इच्छा जुल कि वं हे वनीनि’ अकमकय् जुयाः वं धाल।
‘छिं जितः नापलाक्वपतिकं गिजय् याइगु स्वयेबलय् ला छिकपिनि म्हृ्याय्पिनिर् इच्छा मजुसां इमिगु कक्कु तिनाःसां नीदँ पुलेवं इमित बियाछ्वये फयेके माःगु मखुला- थःगु छ्यनय् फसि घानांघानां, कर्पिनिगु छ्यनय् फसि खाःजुइम्ह सुमंगलदाइ का छि ला’ जिं अभ+m प्रहार यानाच्वना।
जिगु खं व नर्भस जुल। वयागु ख्वाः हृ्याउँयाः नं वँचुसे च्वन। वं छुं लिसः बीमफुत। व बुत। जि त्यात।
‘अहोसा रेखा, छगू जुग लिपा झी थन नापलात’ स्कूलयाम्ह पुलांम्ह पासा रश्मिलां जिगु ल्हाः ज्वंवल। झिगु तगिं पूमवंकं स्कूल त्वःतूम्ह पासा रश्मिलायात थय्क छकः स्वयाः सुमंगलदाइ सुम्क उखेपाखे वनाछ्वत।
‘झी नीदँ लिपा नापलानाच्वना। थन फ्यतुनाः खँ ल्हाये वा। दँदं त्यानुइ धुंकल जिं’ धया।     नापसं च्वंगु प्वंगु मेचय् जिपिं नापं फ्यतुना।
‘धात्थें नीदँ लिपा थौं जिं छंत खना।अय्नं छ न्हापा स्कूलबलय् गथे खः अथे हे स्लीम, अथे हे बांलाःनि। जि थें ल्हृ्वनाः छपति हे बुरि ख्वाः मवःनि छ ला। जि ला स्वये गतिपति मदयेक ल्हृ्वनाः…………. ‘ वं थःगु तग्वःगु प्वाः क्यनाः धाल।
‘अप्वः नलकि आमथे ल्हृ्वनी का’ जि ख्याः याये धें धया।
‘अप्वः नयाः मखु, परिवार नियोजनया वासः नसांनिसें थथे ल्हृवनावःगु। छं मनयाला वासः- वासः मनःसां कपर-टी तयातःगु दइ। कि सुइ कयाच्वंगु दइ, धा रे’ वं कर यानाः न्यन।
सः भचाः तसः जूगुलिं जिमिगु न्हृयःने फ्यतुनाच्वंपिं मिस्तय्सं वयात भ्वाँय्क स्वल।
‘जिं ब्याहा मयानानि । उकिं परिवार नियोजनया वासः नयेगु, कपर-टी तयेगु वा सुइ कायेगु झन्झट फयेम्वाःनि’ जिं वयागु भ्रम छत्थुं मदयेका बिया।
‘यमांसा……………..छ आःतक ब्याहा मयासे च्वनागुला- छ ला जि ज्वःम्ह हे खः। का स्व, स्वीन्यादँ मच्छि दयेधुंकल। जि ला झिंन्यादँ दुबलय् ला वनेधुन का भाःतया छेँय्’ वं ल्हाः च्वयेकाः अझ तसलं धाल।
‘गुलि याकनं छंत बियाछ्वःगु-‘ मचायेक जिगु म्हुतुं धायेवल।
‘जितः बियाछ्वःगु मखु, जि थःहे वनागु, मतलब जि थःहे बिसिउँवनागु’ वं ल्हाः ब्वयेकाः धाल।
‘मचाबलय् हे छ बिसिउँ वने सःगु ला-‘ मन्यँसे जि च्वने हे मफुत।
‘भाःत माल अले बिसिउँ वने सयेका’ वं गुलि अःपुक लिसः बिल।
वयागु सलं न्हृ्यःने फ्यतुनाच्वंपिं मिस्त हररर न्हिलाहल। जितः नं न्हिले मास्ति वल, न्हिलाबिया। जिपिं न्हिलागुलिं व बल्ल झस्के जुल। धाये मजिउगु खँ तसलं धायेवल धैथें जुल जुइ, बल्ल व मछालाख्वाः जिल्ल तयाः व मेचं जुरुक्क दन। वयागु ख्वाः स्वयाः जिं अनुमान याना कि वयात जिं छु जवाः बी म्वायेक हे व बुत, जि त्यात।
थौया भ्वजय् जिलिसें म्वाःमदुगु खँ ल्हाःवःपिं मनूतय्त जिं बुकेफुगुलिं जितः तसकं न्हृयइपुसे च्वन। आः हाकनं थज्याःपिं मनूत्ा सुं नापमलायेमा धैगु मती तयाः जि भ्वय् नयेत झवःछूवना।

साभार ‘सन्ध्या टाइम्स’ ने.सं. ११२३ सिल्लाथ्व

किपा ग्वहालि तिकिझ्याः वाःपौ

 

One thought on “भ्वजय् नापलाइपिं मनूत (बाखं)

  • April 15, 2018 at 12:06 pm
    Permalink

    सायाधाः क्वखं मसिउ जिगु जक छं गथे सिउगु ….!

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.