fbpx

प्रज्ञा–प्रतिष्ठानय् नेपालभाषा कवितायात्रा गोष्ठी जुल

झीगु संवाददाता

येँ, बछलाथ्व त्रियोदसि । नेपाल प्रज्ञा–प्रतिष्ठान व नेपालभाषा परिषद्या मंकाः ग्वलासय् जूगु नेपालभाषा कविता गोष्ठीइ च्वमि राजेन मानन्धरं थःगु कार्यपत्र प्रस्तुत यानादिल ।

नेपालभाषाया सामान्य परिचय व नेपालभाषाया साहित्यया प्रारम्भया खँ कँसें नेपालभाषा कविताया न्हापांगु कविता, मल्लकालया कविता, शाहकालया कविता, राणाकालय् जूगु पुनर्जागरण, जेलकाल, पञ्चायतकालया दमन अले प्रजातन्त्रकाल अले जनयुद्ध व गणतन्त्रया इलय् नेपालभाषा काव्य ख्यलय् वःगु हिउपाःया जानकारी वय्कलं बियादिल ।

ज्याझ्वलय् टिप्पणी यासें समालोचक पूर्ण ताम्राकारं उकिइ मगानाच्वंगु घटना व कृतिया उल्लेख यासे उगु कार्यपत्रं गैर नेवाःतय्गु दथुइ नेपालभाषा काव्य इतिहासया परिचय बिउगु खँ कनादिल ।

किपा रेखा शाक्य

उगु कार्यपत्रय् डा. पुष्पराज राजकर्णिकार, रास जोशी, गणेश राइ व श्रीराम श्रेष्ठं न्ह्यसः तयादिल ।

ज्याझ्वलय् नवासें प्रज्ञा–प्रतिष्ठानया निमित्त कुलपति डा. जगमान गुरुङं पहिचान धइगु थःगु कायम यायेमाः तर मेपिंलिसे फुँइ क्यनेत मखु धयादिल । अथे हे वय्कलं सकसितं आक्रोस जक मप्वंकुसें प्रज्ञा–प्रतिष्ठानय् थःगु हक क्यनाः कायेत नं इनाप यानादिल ।

अथे हे प्रज्ञा प्रतिष्ठानया सदस्य–सचिव प्रा जगतप्रसाद उपाध्यायं कार्यपत्र समग्ररुपय् बांलाःगु, नेपालभाषाया काव्यया इतिहास दक्वसिया न्ह्यःने तयाः नेपाःया हे साहित्यया इतिहास तःधंकाबिउगु धासें आः गोष्ठीइ वःगु सुझावयात नालाकयाः उकियात परिमार्जन यानाः प्रकाशित यायेत सुझाव नं बियादिल ।

किपा रेखा शाक्य

प्रज्ञा प्रतिष्ठानया मातृभाषा साहित्य विभागया प्रमुख लक्ष्मी मालीं प्रज्ञा–प्रतिष्ठान थी थी भाषाया साहित्यया अध्ययन अनुसन्धान व प्रवर्धन यायेत न्ह्याबलें तयार दूगु व उकिया लागि दक्व भाषाभाषीपिनिगु ग्वाहालि अत्याबश्यक जुयाच्वंगु कनादिल ।
प्रज्ञा प्रतिष्ठानया प्राज्ञ सभासदस्य व नेपालभाषा परिषद्या सचिव ध्रुव मधिकर्मीं थ्व ज्याझ्व विशेष रुपं गैर नेवाः साहित्यानुरागीपिनिगु लागि नेपालभाषा साहित्यया विस्तृत जानकारी बिइत आयोजना याःगु खँ न्ह्यथनादिल ।

ज्याझ्वलय् नेपाली व नेपालभाषा साहित्यया च्वमिपिं व ब्वमिपिं तःधंगु ल्याखय् उपस्थि जूगु खः ।

Leave a Reply

Your email address will not be published. Required fields are marked *