fbpx

मातृभाषा पत्रकार व बौद्ध अभियन्ता धर्माचार्य बुदिंया हन

झीगु संवाददाता
यल, बछलाथ्व त्रियोदसि । नेपालभाषाया न्हापांम्ह पत्रकार व बौद्ध धर्मया पुनर्जागरणया न्ह्यलुवा धर्मादित्य धर्माचार्यया बुदिं थौं थन वय्कःया झ्वाताय् स्वामालं क्वखायेकाः हन ।

धर्मादित्य धर्माचार्यं नेसं १०४५य् कलकत्ताय् च्वनाः बुद्धधर्म व नेपालभाषा नामं पत्रिका पिकयाः अबलय् नेपालय् बुद्धधर्मया प्रचार हे यायेमजिउबलय् नेपालय् नेवाः भासं बुद्धधर्मया महत्वया प्रचार यानदिल । अथे हे थुकियात नेपालभाषाया न्हापांगु पत्रिकायारुपय् नं कायेगु यानातःगु दु ।

ज्याझ्वलय् यल महानगरया मेयर चिरिबाबु महर्जन लगायत थी थी नेपालभाषा साहित्यप्रेमी व भाषा अभियन्तातय्सं वय्कःया झ्वातय् स्वानं छायाः श्रद्धा प्वंकूगु खः ।

व हे थासय् लिपा धर्मादित्य धर्माचार्ययात न्हापांम्ह मातृभाषा पत्रकारया रुपं स्वीकार यायेमाःगु खँ कँसे थी थी पत्रकारतय्सं वय्कःया पत्रकारिता ख्यलय् या देनया बारे चर्चा यानादिल । ज्याझ्वलय् मांभाय् पुचःया नायः हेरारत्न शाक्य, नेपाल पत्रकार महासंघया उपाध्यक्ष दिलिप थापामगर, आदिवासी जनजाति पत्रकार महासंघया नायः डण्ड गुरूङ, मधेसी पत्रकार समाजया नायः मोहन सिंह व मेमेपिन्सं थःगु बिचाः तयादीगु खः ।

ज्याझ्वलय्  धर्मादित्य धर्माचार्यया परिवारया प्रतिनिधि नं उपस्थित जूयादी ।
ज्याझ्वः मां भाय् पुचः व नेवाः पत्रकार राष्ट्रिय दबूया मंकाः ग्वसालय् जूगु खः ।

Leave a Reply

Your email address will not be published. Required fields are marked *