fbpx

नेवा:तय्‌गु औकात

र‍ोशन श्रेष्ठ

गन गन गांमय् पाखाय् च्वंम्ह भाइपाजी छम्ह वया स्वनिग:या शिक्षित, सभ्य, सुसंस्कृत धका: न्हाय् फुलेयाइपिं नेवा:तय्‌त उथिबास याना जूगु झीसं झीगु हे मिखां खन ।

१ तिवारी भर्सेस १० लाख नेवार । हाय् हाय् । नेवा:तय्‌गु औकात गुलि क्वह्यं धका यच्चुक खन मखुला आ:?

थौं या दिनय् नं यलय् डोजर हया: ड्याम् ड्याम् नेवा:तय्‌गु सलंस: दँ न्हापां निसें अस्तित्व दुगु छेँ ल्यत्तुल्यया ध्वस्त याना च्वंगु दु । तर मेगु साइडय् आप्रवासीपिन्सं नकतिनि नकतिनि दयेका:त:गु प:खा: तक नं थियाच्वंगु मदु ।

अले थुनाच्वंगु छेँया मनूत हथाय् हथाय् सं थ:गु हलंज्वलं सुरक्षित यायेत ब्वाँय् ब्वाँय् जूगु खनेदु, आप्रवासी पुलिस त डोजर ड्राइवर त नाप बिन्ति बिन्ति याना मिखां ख्वबि हायेका: च्वंगु खनेदु, थजा:गु दृष्य खनीबलय् नुग: चे चे तु ।

नेवा:तसें यक्व यक्व गलति यायेधुंकल । न्ह्यलुवा: जूपिं नेवा:त राजनीतिक चेतना व आवश्यकता तिलांजली बिया खाली भाय् भाय् धका हाला जुल । संस्कृतिया नामय् खाली बाजं थायेगु प्याखँ हुलेगु, ब्वसा जुयेगु, धर्मया नामय् दासिव:गु चलन त सुधार मयासे तजिलजि धका: घय् घय् पुया जुल ।

भोय् व आडम्बर क्यनेगु प्रतिस्पर्धाय् कन्हय् मचाखाचाया भविष्य छु जुइ धका छुं छफुति वास्ता मयासे झी नेवा:तसें खाली थ:गु न्हाय् म्वाकेगु व फुँइफाँय् यायेगु ज्याय् जक तक्यना जीवन बरबाद याना जुल ।

थ: हे छेँज: दाजु किजा, तता केहेँ, काय् म्ह्याय, भोमचा जिचाभाजु, पाजु भिनमचा, आदि पिन्त मा:बलय् मा:कथं ग्वहालि बियेगु पलिसा अनावश्यक ईख तया ‘गुलि फुँइ याइ स्वये का ।’ धया छफुति हे घ्वासा मबिल । घ्वासा मबिउगु जक मखु, अझ गन गन जिल अन अन तुति सालेगु, पंग: तयेगु, असफल जुइमा धका आसिक फ्वनेगु, ह्वायेगु-फ्वायेगु-चुकली यायेगु, न्हाय्‌पनय् स्वाँ पुइगु, ल्वाकेगु, तछ्यायेगु आदि अनेक बाधा ब्यवधान याना जुइपिं नं थ:थिति नेवा:त हे दु । थथे दुष्ट थ:थिति जुया दु:ख सिल धका: शतप्रतिशत नेवा: नं धयाजूगु खनेदु ।

 

छु सकलें नेवा:त थथे हे दुष्ट ख: ला? थ: जक भिं, मेपिं सकलें मभिं धका: बयान याना जुइपिं नेवा:त स्वयादिसँ – छिगु छचा:खेरं लुयावइ । थ:म्ह छेज:यात, थ:थिति यात मभिं यानागु गलति जुल धका धाइपिं नेवा:त लुइके फुला ?

इतिहासय् खनेदु – ख्वपय् नारायणमान यात ख्वपं पिने नेवा:तसें ल्या: मदु, यलया सिद्धिलाल यात यलं पिने नेवा:तसें ल्या: मदु, सक्व या जोगमेहर सक्वय् हे लिकुन । दक्व दक्व नेवा: न्ह्यलुवा:त थ:गु चिकिचाधंगु घेरां पिने च्वंपिं नेवा: क:घायेगु कुत: मया – अपवाद छम्ह निम्ह कुत: याना स्वइपिन्त नं थ:गु घेरां पिनेयापिन्सं लसकुस मया: ।

नेवा:तय्‌गु संकुचित, कुण्ठित व अतिजलनया थ्व ऐतिहासिक गलतिं ब्यूगु दण्ड ख: कि थौं दशौं लाख नेवा:तय्‌गु मूलभुमि, पुस्तौं पुस्ता निसें राज याना वया च्वनागु भुमि, थ: हे सिंह जुया शेर जुया म्वायेगु भुमि, देवभुमि, पुण्यभुमि, नेपालभुमि – थजा:गु भुमिइ वया गजा:गजा:पिन्सं राज याना च्वन? निदँ प्यदँ न्ह्य: चप्पल प्याता प्याता याना, ध्वाथ: बसय् च्वना, बाज्य:वंगु झोला छपा: ज्वना, स्वनिगलय् दुहाँवया छेँदिया ख्यूँगु ध्याकुंचा बालं कया च्वना वं पिन्सं थौं झी नेवा:तय्‌त ख्याका: च्वनेमाल, लाक्वपाक्व धायेका च्वनेमाल, थ:गु भुमिपाखें थ:पिन्त हे लेँहेथना छ्व:सा नं मिखां ख्वबि पिकना नुग: चे चे तुका किंकर्तव्यबिमुढ जुया च्वनेमाल ।

ख:, धायेगु थाय् दु, राज्यसत्ता या बिभेद, भाषिक बिभेद, जातीय बिभेद, साम्प्रदायिक बिभेद – तर झीसं नुगलय् झ्वा:झ्वा: पिया स्वयागु दु कि मदु कि झी नेवा:तसें छुं नं गलति यानागु मदुला? करपिन्त जक दोष बियाच्वनेवं गा: ला? झीसं न्हापा यानागु व आ: यानाच्वनागु गलति दक्वं हिसाबकिताब करपिन्त दोष बिइवं दुरुस्त मिलान जुया वनीगु ख:ला? यदि ख:सा गथे झी नेवा:त दशौ लाख भर्सेस छम्ह तिवारी जूबलय् नं झीसं कथि छपु नं मुइके मफुत? ई छपात: छपात: जक फा:सा चुइका: छ्वये फुगु ता:गत झीके दुसां झी नेवा: गथे असहाय असंवेदनशील जुया वना च्वन? थ्व दक्वं न्ह्यस:या लिस: गब्ले मालेगु ?

थौं झीसं छु भोगेयाना, व दण्ड झीत झीगु हे इतिहासं ब्यूगु दण्ड ख: । १०० % खाइगु सत्य । थथे धायेबलय् छित: मयेय फु । मयेयका दिसँ । तर थ्व दण्ड छिं नं भोगे यानाच्वंगु दु । तथ्ययात मयेयकल धका: छिगु दण्ड म्हो जुया वनीमखु ।

इतिहासं दण्ड अवश्य बिइ । म्हिग:या गलत निर्णय व छनौट या दण्ड थौं भोगेयाना च्वन । थौं या गलत निर्णय व छनौट या दण्ड कन्हय् भोगे याये हे मालीतिनि । थौं छिकपिन्सं खनाच्वंगु दण्ड छु दण्ड ख: धका:? कन्हय् जुइगु दण्ड ला अझ भयङ्कर जुयावइतिनि । ऐया!! ऐया!! धका ख्वये तक नं मखनीगु दण्ड जुया वइतिनि । थ्व हे वार्निङ बिया थौं या सघन परिस्थिति या खँ थुइका: जक बिइ फुसा नं यक्व उद्दार जुइ ।

खँ थुइका दिसँ, मुसुकाया दिसँ ।

One thought on “नेवा:तय्‌गु औकात

  • May 16, 2019 at 7:54 am
    Permalink

    There is no icon to share on facebook. This is the “aukat’ of Newa.

    Reply

Leave a Reply

Your email address will not be published. Required fields are marked *