fbpx

सत्यमोहन जोशी १००दँ क्यंगुया हना ज्याझ्वः

झीगु संवाददाता
यल, बछलाथ्व नवमि । नेपालभाषाया च्वमि व नेवाः संस्कृतिविद अले नेपालभाषा एकेदमिया पुलांम्ह चान्सलर शताब्दीपुरुष डा. सत्यमोहन जोशी सछिदँ क्यंगु लसताय् ललितपुर महानगरपालिकां वय्कःया हनाय् सोमबार जन्मशताब्दी महोत्सव न्यायेकल ।

उगु झ्वलय् महानगरपालिकां व उपत्यका मेयर्स फोरमं अले मेमेगु संस्थां नं वय्कःयात हनापौ द्यछाःगु खः । लिसे .वय्कःयात नेवाः संस्कृतिकथं ख्येँ सगं नं बिल ।

किपा रेखा शाक्य
किपा रेखा शाक्य

ज्याझ्वलय् कार्यवाहक प्रधानमन्त्री व रक्षामन्त्री ईश्वर पोखरेल, येँ महानगरपालिकाया मेयर विद्यासुन्दर शाक्य, नेपालया लागि भारतीय राजदुत मञ्जिव सिंह पुरी, प्रतिनिधिसभा दुजःपिं पम्फा भुषाल, नवराज सिलवाल, समाजसेवी लक्ष्मीदास मानन्धर व मेमेपिं उपस्थित जुयादीगु खः ।

किपा रेखा शाक्य

ज्याझ्वलय् नवासें अभिनन्दित जोशी थ्व सम्मान थःत मखुसें थःगु मांभाय् नेपालभाषायात सम्मान याःगु अले व भाय् अतिकं सम्मान यायेबहजूगु खँ कनादिल । लिसें वय्कलं नेपाःया कला संस्कृति व सम्पदा धइगु विश्वय् ज्वः मदुगुलिं दक्व मिलेजुयाः संरक्षण यायेमाःगु खँ कनादिल ।

किपा रेखा शाक्य

यलया छम्ह सामान्य कुलय् जन्म जुयाः नं नेपाःया म्हसिका च्वन्ह्याकेत राष्ट्रया भाषा, कला, साहित्य व संस्कृतिया लिसें मूर्त अमूर्त सम्पदाया ज्ञाता जुयाः नेपाः देय्या न्हाय् हलिंन्यंक धस्वाकेत अनवरत रुपं यानाच्वनादिगु वय्कःया ज्वः मदुगु योगदानयात कदर यासें महानगरपालिकां दक्व जनताया प्रतिनिधिकथं थुकथंया दच्छियंकया ज्याझ्वःया ग्वसाः ग्वःसें नश्वर शरीर मदये धुंकाः गुणगान यायेगुया परम्परायात त्वाः थलेत, म्वाःसु दनीबलय् हे हनेगु परम्पराया शुरुवात यायेकथं महानगरपालिकां थुकथंया ग्वसाः ग्वयागु खँ आयोजकपिन्सं धाःगु दु ।

किपा रेखा शाक्य
किपा रेखा शाक्य

उकियालिसें व हे ज्याझ्वलय् यल महानगरपालिकां अन च्वंपिं सछिदँ पुलेधुंकूपिं वरिष्ठ नागरिकपिन्त नं हंगु खः ।

किपा रेखा शाक्य

जोशीयात भिंतुना बिइत ऊर्जामन्त्री गोकर्ण बिष्ट थौं सुथय् छेँय् झाल । राष्ट्रपति विद्यादेवी भण्डारी नं छेँय् झायेगु ज्याझ्वः दूगु खः तर वय्कलं शुभकामना सन्देश जक छ्वयादिल । अथे हे न्ह्यकुन्हु पूर्वप्रधानमन्त्री बाबुराम भट्टराई व आःयाम्ह उपप्रधानमन्त्री उपेन्द्र यादवं नं जोशीया छेँय् वनाः भिंतुना बियादिउगु खः ।

किपा रेखा शाक्य

महानगरपालिकाृ ज्याकूया क्यबय् औपचारिक ज्याझ्वः जुइ न्ह्यः मेयर महर्जनया ग्वसालय् जोशीयात मंगलबजारं निसें ईटी, कुमारीपाटी, जाउलाखेल जुयाः  पुल्चोकतक बग्गिइ फ्यतुकाः थीथी बाजं खलःतलिसे नगर परिक्रमा याकूगु खः । ज्याझ्वलय् यल लगायत नेपाःया हे थी थी थासं वःपिं द्वलंद्वः मनूतय्गु सहभागिता जूगु खः ।

किपा रेखा शाक्य

थुगु ज्याझ्वःया नितिं मेयर महर्जनया संयोजकत्वय् १११ सदस्यीय समिति गठन याःगु खः । उगु समितिइ राष्ट्रियसभाया सांसदपिं, प्रतिनिधिसभाया सांसदपिं, प्रदेशसभाया सांसदपिं, येँ महानगरपालिकाया मयेरया लिसें जःखः नगरपालिकाया मेयरपिन्त नं दुथ्या धकाः नं धाःगु खः ।

किपा रेखा शाक्य

आयोजकया धापु कथं जोशयिा बुदिं धकाः दच्छियंक हे थी थी कथंया ज्याझ्वःत न्ह्यानच्वनी । उकिइ मध्ये अशोक सम्राटया म्ह्याय चारुमतिया ब्याली क्यनेगु , ब्वनेकुथिइ जोशीया जीवनी दुथ्याकेत पहल यायेगु, वेभसाइटय् वय्कःनाप स्वापू दुगु सकतां जानकारी दुतिनेगु, जोशीया किपाः दूगु ब्यानर सगरमाथाया च्वकाय् ब्वयेकिगु, हुलाक टिकट प्रकाशन यायेगु, नेपाः सरकारनापं समन्वय यानाः जोशीया किपाः सहितया वहःया २५०० या १००० थान, १००० या २००० थान, १०० या ५००० थान मुद्रा निष्कासन यायेत प्रकृयाय् वनेगु, जोशीयात सिलु दर्शन याकेगु, न्हियान्हिथंया ज्याखँयात कयाः अडियो व भिडियो दयेकेगु, भण्डाक्यब वय्कःया ल्हातं सिलान्यास याकेगु, जोशीया झ्वाताः यलमहानगरया लागा दुने पार्क दयेकाः वय्कःया नामं नामाकरण यायेगु, वाङमयया लागाय् च्वछाय्बहःगु योगदान यानादिपिन्त सत्यमोहन सम्मान पदक बिइगु, वय्कःया जीवनी सम्बन्धी डकुमेन्ट्री दयेकेगु आदि लाः ।

किपा रेखा शाक्य

किपा रेखा शाक्य
किपा रेखा शाक्य
किपा रेखा शाक्य
किपा रेखा शाक्य
किपा रेखा शाक्य

Leave a Reply

Your email address will not be published. Required fields are marked *