fbpx

नेवाःभूमिया अतिक्रमण : महानगरपालिकाया मिखाय् खुल्ला मञ्च

राजमाया पुतवार

लछिया दुने निगू समाचारं देशय् हे तहलका मचेयात । न्हापांगु नेपाःया प्रधानमन्त्री च्वनीगु छेँ दूगु सरकारी जग्गा हे व्यक्तिया नामय् लानाच्वंगु धइगु लुत । अनं मेगु चकं दबू अथवा खुल्लामञ्च छम्ह मनुखं येँ महानगरपालिकायाके सम्झौता याकाकयाः करोडौंतका बाहाः वइगु शटर दयेकाः सलामी कयाः हे बालं बिइगु यात । थज्याःगु खँ न्यनाः मेची महाकालीयापिं मनूत जुरुजुरुं दन, वाथावाथा कन, थ्व राज्यया सम्पति व जनताया सम्पतिया अतिक्रमण जुल धकाः सःतल । तर थःगु खल्ती ग्वःगू ग्वःगू संस्था तयाः मन्च लुतकि घण्टौ घण्टौं भासन यानाजुइपिं स्वघोषित नेवाः नेततातय्त कुसिं न्याःगुति नं मजू । न्ह्यलं मचाःनि वा न्ह्यःवः पह यानाः ग्वतुला हे च्वन ।

आःत न्यनेदुकथं येँया खुलामञ्च कब्जा याःगु संस्था जलेश्वर–स्वच्छन्द–बिकोई बिल्डर्स प्रालिं येँ महानगरपालिकालिसे याःगु सम्झौताय् किर्ते वा जालसाजी ज्या यानातःगु लूगु दु । उगु बिल्डर्सं महानगरपालिकालिसे याःगु सम्झौतापत्रय् ‘२०७३ वैशाख १३य् स्वीकृत यानातःगु नक्सास्वयाः विपरीतका संरचना निर्माण यायेदमखु’ धयातःगु दुसा ठेकेदारयाके दूगु थुकिया हे प्रतिलिपिइ धाःसा यायेदइ धकाः च्वयातःगु दु ।

ठेकेदारयात ‘नक्साविपरीतया संरचना निर्माण यायेदइमखु’ धकाः च्वयातःगु प्रति बिइधुंकाः महानगरपालिकाया कर्मचारीं थःगु अफिस कपिइ डटपेनं केरमेट यानाः ‘छ’ यात ‘छैन’ धइगु ब्यहोरा वनीकथं भिंकातःगु प्रमाण लुयावःगु दु।

महानगरपालिकाया प्रतिइ स्वीकृत नक्सा स्वयाः संरचना निर्माण यायेदइमखु अले द्वितीय पक्षयात मर्का जुइकथंया संशोधन यायेदइमखु धायेधुंकाः निगुलिं पक्षया सहमतिइ आकारप्रकारमा थपघट याययेदइ धकाः च्वयातःगु दु।
उगु सम्झौतापत्रय् येँ महानगरपालिका प्रशासन विभागया प्रमुख ज्ञानेन्द्र कार्की व जलेश्वर स्वच्छन्द बिकोई बिल्डर्स प्रालिया कार्यकारी अध्यक्ष मनोज भेटवालं ल्हाःचिं तयातःगु दु । उकिया साक्षीया रुपय् राजस्व महाशाखाया तत्कालीन प्रमुख महेश काफ्ले, महानगरपालिकाया निजी साझेदारी एकाइया प्रमुख सुमन अधिकारी व बिल्डर्सया लेखा प्रमुख गीता भट्ट च्वनाच्वंगु दु ।

थज्याःगु अवस्थाय् नं थज्याःगु समाचार हे वयेधुंकाः, सामाजिक संजालय् थुकिया रेशा रेशा छताछुल्ल जुइधुंकाः नं मेयर, उपमेयर उगु वडाया वडाअध्यक्ष अले मेमेपिं सरकारी कर्मचारी चुइँक्क हे नमवायेगु, सुयागु दोष खः धइगु हे ममालेगु धइगु देय्या हे बिडम्बना खः । अध्ययन यायेगु अले प्रतिवेदन वयेमाल धकाः जनतायात ध्वंलानाच्वंगु अवस्था तःन्हु तकया हे खः । लिपा जनताया तकसं हे विरोध वयेवं महानगरपालिका बाध्य जुयाः तुरुन्त हे डोजर हयाः व शटरत थुनाबिल । जनतां छगू हद तक राहतया सासः ल्हात ।

तर समस्या ज्युंकात्युं दनि । न खुल्लामञ्च खाली जुल, न मनूत अन वने खन, न नगरपालिका दुने सुयागु दोषं, गलतीं थपाय्जिगु सार्वजनिक जग्गा सुं छम्ह मनूया ल्हातिइ तयाबिया धकाः धइगु खँ पिहाँवल । दक्व गुपचुप गुपचुप हे च्वनाच्वंगु अवस्था । गलती धइगु गलती जुइ, चाहे व मेयर, उपमेयर वा प्रशासन विभागया प्रमुखया जुइमा ।

धयाच्वनेम्वाः गलती याम्हसित सजाय मबिइगु धइगु हे गलतीया साझेदार जुइगु खः । तप्यंक वा मेकथं सजाय बिइमाःपिं दक्व हे थ्व अरबौंया जालसाजीया भागिदारत खः, गुकियात अःपूगु भासं भ्रष्टाचार धाइ । दक्वस्यां सिउ थन गलती जूगु दु धकाः, थ्व उलि माले थाकुगु विषय नं मखु , भ्वँतं नवानाच्वंगु दु, सम्झौत पत्रय् डतपेनं केरमेट यानाः हे खःयात मखु धकाः उल्टापुल्टा जुइक खँ चाःहिइकीपिं धइपिं राष्ट्रघातीत खः उमित थौं, आः थन हे सजाय बिइमाः । यदि सरकारय् च्वंपिं हे थ्व ज्याय् संलग्न खःसा उमित नं जनतां सजाय बिइ ।

नगरपालिका झी दक्वसिगु खः । थन पाइपाइ ध्यबा जनतां थःगु नगर वा आदिभूमि बांलाकेमा, भिंकेमा, यचुपिचु दयेकेमा धकाः कर पुलातःगु दु । नगरपालिकां गनं अनुदान कयाहःसां अथवा ऋण हे कयाहःसां जनताया ख्वाः ब्वयाः कयाहःगु जुइ । मनूतय्सं थःथःगु स्वार्थ स्वयाः मेयर, उपमेयर, सिडिओ वा प्रधानमन्त्रीत जस बिया चाकरी बजेयानाच्वंगु दु तर थुकिया दोष सुयात वनी, धइगु खँ सुं नवायेत तयार मदु । आः न्ह्याम्हस्यां चाहे जूसां व भेटवालं करोडौं हे खर्च यानाः नं खुल्ला मञ्चया सार्वजनिक जग्गा हानं बालं बिइदइगु अवस्था मदु । धायेत ला वं छगू टेलिभिजन अन्तरक्रियाय् दक्वसित चुनौति बियाः नवात तर नं वयागु हे ध्यबा नःम्हस्यां नं वयात हानं व सार्वजनिक जग्गा भ्वँतय् प्वःचिनाः बिइगु सम्भावना मदु ।

खँ खुल्ला मञ्चयागु जक मखु । आः हे वःगु बालुवाटारया जग्गा गथे जुयाः अमुक मनूतय्गु ल्हातिइ लाःवन, अथे हे बौद्धया १५० रोपनी जग्गया लालपूर्जा दयेकाः हे हयात होटलयात बिल, अले अथे के मेमेगु सलंसः रोपनी सार्वजनिक वा गुथिया जग्गा व मेमेगु अज्याःगु गुलि दु गुलि । बिस्तारं मिडियां आगं प्वलेथें प्वला हःगु दु । न्ह्याथाय् थजु, उकिया गनं गनं जन्तर महानगरपालिकालिसे हे स्वानाच्वंगु दइ । मखु, मसिउ धयां पार जुइमखु ।

गबलेतक जनप्रतिनिधि जुयाः जनताया भोट कयाः जनताया हे सम्पतिया लिलाम याइ जुइ उमिसं, थ्व नं स्वये हे मानि । आः न्हापाथें याःयाःथे याकाः निगू प्यंगू लाख क्लबक्लिबया नामय् ध्यबा ज्वंकलकि आः जनता सुम्क च्वनीगु अवस्था मदु ।

Leave a Reply

Your email address will not be published. Required fields are marked *