fbpx

श्रीधर राणा रिम्पोछे व हृदय रत्न बज्राचार्यपिन्त लसकुस

झीगु स‌ंवाददाता

येँ चौलागा अस्तमि । बिद्याधर आचार्य महायोगी श्रीधर राणा रिम्पोछे व लुम्बिनी विश्वविद्यालयया उपकुलपति प्रो. डा. हृदय रत्न बज्राचार्यपिन्त शनिबार छगू ज्याझ्व:या दथुइ धर्मकीर्ति विहारय् लसकुस यायेगु ज्या जुल।

श्रद्धेय धम्मवती गुरुमांया सभापतित्वय् जूगु उगु ज्याझ्वलय् अगम्य रत्न कंसाकारं लसकुस यानादिइगु ख:सा मीना तुलाधरं सुभाय् द्यछानादिइगु ख:। धर्मकीर्तिया पाखें श्रद्धेय धम्मवती गुरुमामं धर्मोपहार द्यछानाबिज्या: उगु ज्याझ्वलय् वसपोलं ओबाद उपदेश बियाबिज्यासे आ: झी बौद्धमार्गीपिसं थेरवाद, महायान व बज्रयान मधासे बौद्धयान जक धया: झी फुक्क छगू ख: धका: न्ह्यावनेमा: धयाबिज्यात।

अथेहे न्ववायेगु झ्वलय् रिम्पोछे गुरु श्रीधर राणां थौंया इलय् झी बौद्धत सहनशीलता जक धका: च्वने मज्यु, सहनशीलतानापं प्रज्ञा नं दयेका: बुद्ध शिक्षा अनुकूल व्यवहार याना: न्ह्यावनेफत धा:सा बौद्ध एकता सम्भव जुइ धयाबिज्यात ।

थुकतं हे उपकुलपती प्रो. डा. हृदय रत्न बज्राचार्यजुं बुद्ध धर्म व बिज्ञान यक्कोहे ज्व:ला:सां बिज्ञानं बिध्वंश हयेय:सा बुद्ध धर्मं समाजय् शान्ति हयेगु ज्या याइ। अथे जुया: बुद्धया शिक्षा समाजय् थ्यंकेगु तातुना: लुम्बिनी बौद्ध बिश्वबिद्यालय्या थी थी योजना दयेकाच्वनागु खँ वसपोलं न्ह्यथनाबिज्यात।

हनेबह:पिं पाहाँपिन्त विहारया सह सचिव रमा शोभा कंसाकारं स्वाँ व खादा द्यछाना लसकुस या: उगु ज्याझ्व: सह कोशाध्यक्ष अरुण सिद्धि तुलाधरं न्ह्याकादिइगु ख: ।

बुखँ ग्वाहालि अरुण सिद्धि तुलाधर

Leave a Reply

Your email address will not be published. Required fields are marked *