fbpx

अश्वघोष भन्तेया लुमन्तिइ गुणानुस्मरण तथा श्रद्धाजलि सभा

झीगु संवाददाता

येँ, चौलागा दुतिया । नेपाःया खुम्हम्ह संघनायक भिक्षु अश्वघोष महास्थविरया लुमन्तिइ येँय् आइतबारकुन्हु अखिल नेपाल भिक्षु महासंघ व मेमेगु बौद्ध संस्थां मंकाः गुणानुस्मरण तथा श्रद्धाजलि सभाया आयोजना यात ।

उक्त ज्याझ्वलय् मूपाहाँ वर्तमान संघनायक भिक्षु ञानपूर्णिक महास्थविर व नेकपा संसदीय दलया उपनेता सुबास नेम्बाङं भिक्षु् अश्वघोषया किपा न्ह्यःने देवा च्याकादिल । अथे हे मेमेगु आयोजक संस्थाया प्रतिनिधिपिन्सं नं वसपोलया किपा न्हयःने स्वां छाःगु खः ।
ज्याझ्वलय् थी थी व्यक्तित्वपिन्सं मदुम्ह अश्वघोष महास्थविरं नेपाःया बुद्धधर्मया विकास व विस्तारय् यानाबिज्याःगु भूमिका अले वसपोलया बहुआयामिक योगदानयात लुमंकाः वसपोलया निर्वाण कामना यानादीगु खः ।

संघनायक भिक्षु अश्वघोष महास्थविरं मदुम्ह अश्वघोष भन्तेया हठी मिजास व थःगु खँय् अडिग जुइगु स्वभावं यानाः भिक्षु संघय् अनुशासन तयातयेत अले नेपाःया बौद्ध जगतयात छगू अग्रगामी लँय् वनेत लुखा चाःगु खँ न्ह्यथना बिज्यात ।
धम्मावती गुरुमानं अश्वघोष भन्तें थःगु दक्व जीवन त्यागी जुयाः बितेयानाबिज्याःगु अले गांगामय् बुद्ध धर्म प्रचारया निंतिं फुकाबिज्याःगु खँ लुमंकाबिज्यात ।

कौडण्य भन्तेनं नेपाःया धर्म अनुशासन ल्यंकातयेत अश्वघोष भन्तेनं यानाबिज्याःगु योगदान अले वसपोलं बुद्धधर्म व कम्युनिज्मया दथुइ स्वापु मालाः हे नेपाःया बुद्ध धर्म व कम्युनिष्टतय्त छगू थासय् हयेत कुतः यानादीगु खँ कनाबिज्यात ।
ज्याझ्वलय् थेरवाद, महायान व वज्रयान स्वंगूलिं निकायया प्रतिनिधि धर्मगुरुपिं भन्ते, लामा व वज्राचार्यपिन्सं थःथगु पहलं पाठ ब्वनाः अश्वघोष भन्तेया निर्वाण कामना यानाबिज्यात ।

अथे हे ज्याझ्वलय् राष्ट्रपति व प्रधानमन्त्री या शोश सन्देश लगायत श्रीलंका सरकार, थाइल्याण्डया संघराज व मेमेगु धार्मिक संस्थातपाखें वःगुसमवेदना सन्देशत नं ब्वनाः न्यंकूगु खः ।

अश्वघोष भन्तेया जन्म विसं १९८३ जेष्ठ शुक्ल १५कुन्हु जूगु खःसा वसपोल २०७५ चैत्र २२ गते निधन जूगु खः ।

Leave a Reply

Your email address will not be published. Required fields are marked *